Modi ki nu pode djuda óras ki kontise un dizastri na naturéza?

Dizastri na naturéza sta ta bira kada bês más txeu na nos ténpu. Óras ki ta kontise un dizastri, kes sforsu ki ta fazedu pa djuda kes ki meste ten ki ser ben organizadu. Pamodi kel-li, Grupu Enkaregadu di Óbra da orientason pa kria Dipartamentu di ajuda na ténpu di dizastri na tudu filial.

Óras ki irmons ki ta faze párti di kel dipartamentu li ta fika ta sabe ma kontise un dizastri, es ta pâpia lógu ku ansions pa sabe kuzê ki irmons ta ba meste. Si kes stragu é más di ki kel ki irmons na kel lugar ta pode rezolve, kel dipartamentu ta skodje irmons kualifikadu pa kuida di kel trabadju. Kes irmon li pode pidi voluntárius ki sta dispostu na ba djuda, es pode pidi kontribuisons di kuzas ki irmons sta ba meste ô es pode kunpra kes kuza la mê na kel lugar i distribui.

Ten txeu vantaji na faze kuzas di kel manera li. Pamodi óras ki irmons ka ta aji di es pa es, nu ta ivita faze sforsu sen nisisidadi, ivita konfuzon i gasta kontribuisons i material atoa.

Kes irmon ki filial ta skodje ta disidi kantu dinheru i kantu voluntáriu ki mestedu pa djuda. Tanbê es pode konxe autoridadis na kel lugar ki txeu bês pode djuda-s faze kel trabadju más faxi. Nton si bu ka mandadu, ka bu pidi kontribuisons, ka bu manda material pa djuda ô ka bu viaja pa kel lugar ki kontise dizastri.

Má, óras ki ta kontise un dizastri nu ta krê djuda. (He 13:16) Nu ta ama nos irmons! Kuzê ki nu pode faze? Kuza más inportanti ki nu pode faze é ora pa kes ki sta sufri pamodi kel dizastri i tanbê pa kes ki sta djuda-s. Tanbê nu pode faze kontribuisons pa apoia nos trabadju na mundu interu. Ku orientason di Grupu Enkaregadu di Óbra, kes filial ta sabe kal ki é midjór manera di uza kes kontribuison. Si nu krê viaja pa ba djuda, nu pode prenxe Petição para Voluntário do Departamento Local de Projeto/Construção (DC-50) pa mostra ma nu sta disponível.

ODJA VÍDIU TXEIA KI FAZE TXEU STRAGU NA BRAZIL. DIPÔS RESPONDE KEL PERGUNTA LI:

Kuzê ki dexa-u dimiradu sobri kel sforsu ki Tistimunhas di Jeová faze pa djuda dipôs ki kontise kel dizastri na Brazil na 2020?