Ten bon skóla i txeu dinheru pode da-nu un futuru midjór?

Txeu algen ta pensa ma kes ki ten bon skóla i ki é riku ta ten un futuru midjór. Es ta kridita ma bai universidadi ta djuda un algen ser un bon trabadjador, ser un bon ménbru di família i un bon sidadon. Tanbê es ta atxa ma un algen ki ten bon skóla ta konsigi ten un trabadju ki ta pagadu txeu dinheru i ma é kes algen la ki ta ser filís.

UN DIZISON KI TXEU ALGEN TA TOMA

Odja kuzê ki Zang Xen, ki ta vive na Xina, fla: “N ta kriditaba ma si N tinha un diplóma di universidadi N ta saíba di pobréza, N ta tinha un trabadju ki N ta resebeba txeu dinheru i N ta tinha un vida filís.”

Txeu algen ta atxa ma pa es ten un vida midjór, es ten ki bai studa na kes universidadi famozu, talvês na otu país. Kel-li staba ta kontise txeu, má pamodi duénsa di COVID-19, fika más difísil pesoas bai studa fóra di ses país. Dja ten uns 10 anu ki un organizason faze un studu i el fla: “Más di metadi di tudu kes studanti ki ta bai studa na otu país é di Ázia.”

Txeu bês pai ku mai ta faze txeu sakrifisiu pa ses fidju pode bai studa na universidadi na otu país. Kixiang, di Taiuan, fla: “Nha pai ku nha mai ka éra riku, má es manda nos tudu, ses kuatu fidju pa bai studa na universidadi, na Mérka.” Sima txeu otus família ta faze, pai ku mai di Kixiang tevi ki nprista txeu dinheru pa paga universidadi di ses fidju.

TEN BON SKÓLA PODE DA-NU UN FUTURU MIDJÓR?

Un di kes minina sta xintadu frenti di konputador i dja sta noti. El sta parse kansadu i stresadu. — Txeu algen ki npenha pa ten un bon skóla i rikéza fika diziludidu

Skóla pode midjora nos vida di algun manera, má nen sénpri el ka ta traze kes rezultadu ki studantis ta spéra. Pur izénplu, monti algen tevi txeu anu ta faze sakrifisiu i es nprista txeu dinheru pa paga skóla, má es ka konsigi atxa kel trabadju ki es kreba. Un jornalista di Singapura, ki txoma Rakel Mui, fla: “Txeu di kes algen ki finda universidadi ka konsigi atxa trabadju.” Jenji di Taiuan, ki ten txeu skóla, fla: “Un monti algen ka sta konsigi atxa trabadju na kel kursu ki es faze. Pur isu, es ten ki seta un trabadju ki ka ten nada aver ku ses kursu.”

Ten txeu algen ki konsigi atxa trabadju na kel profison ki es skodje, má simé es diskubri ma ses vida ka midjora sima es staba ta spéra. Dipôs ki Niran, di Tailándia finda universidadi na Europa, el atxa un trabadju na kel kursu ki el faze. El fla: “Sima N staba ta spéra, nha diplóma djuda-m atxa un trabadju ki ta pagaba txeu dinheru. Má N tevi ki trabadja duru i txeu óra pa N ganhaba kel dinheru. Dipôs, kel inpréza manda maioria di ses trabadjador pa kaza i mi tanbê. N da kónta ma ka ten ninhun trabadju ki ta da-nu un futuru suguru.”

Ti mésmu kes algen ki é riku ô ki ta parse ma ten un vida dretu, ta ten prublémas na família, es ta duense i es ta fika preokupadu ku ses dinheru. Kasutoxi di Japon, fla: “N tinha txeu dinheru, má N ka staba filís pamodi otus algen tinha siumis di mi i es ta trataba mi mariadu.” Un mudjer ki txoma Lam, ki ta vive na Vietnan, fla: “N ta odja txeu algen ta sforsa pa konsigi ten un trabadju ki ta pagadu txeu dinheru, pa es pode ten un vida midjór. Má na verdadi, txeu bês es ta fika más preokupadu i ti es ta fika duenti i deprimidu.”

PAMODI KI TEN SKÓLA I DINHERU KA TA TXIGA PA NU TEN UN VIDA MIDJÓR?

É klaru ki pesoas meste ten algun skóla i dinheru pa es konsigi sustenta i kuida di ses família. Má sô kes kuza li ka ta txiga pa nu ten un futuru midjór. Pamodi? Odja kuzê ki un livru sagradu ta fla.

KURSU SUPIRIOR NEN SÉNPRI KA TA DA-NU UN VIDA MIDJÓR.

‘Kes algen ki ta kóre faxi nen sénpri ka ta ganha korida, algen intilijenti nen sénpri ka ta ten rikéza, algen ki ten konhisimentu nen sénpri ka ta ten susésu; pamodi ténpu i kuzas ki algen ka sta spéra ta kontise ku tudu es.’ — ECLESIASTES 9:11.

Sikrê un algen ten txeu skóla, el pode ka konsigi ten susésu na vida, pamodi ten txeu kuza ki el ka ta konsigi kontrola. Ka ta nporta kantu skóla ki un algen ten, si kontise prublémas na ikonomia ô na pulítika na se país, ô si otus algen ten algun kuza kóntra el, el pode ka konsigi faze kuzê ki el krê.

RIKÉZA KA TA DURA PA TUDU TÉNPU.

‘Ka bu kansa dimás ta djobe rikéza. Para i mostra ma bu ten ntendimentu. Óras ki bu poi bus odju na el, el ta dizaparse, pamodi di sertéza el ta kria aza sima un ágia i el ta bua pa séu.’ — PROVÉRBIOS 23:4, 5.

Kalker suguransa ki dinheru ta traze ka ta dura pa tudu ténpu. Un algen pode perde tudu dinheru ki el djunta duránti se vida di un óra pa kel otu. Dizastris na naturéza sima tremor di téra, lumi na florésta i furakon, pode dexa un algen sen dinheru i sen lugar di mora.

DINHERU TXEU BÊS TA TRAZE PRUBLÉMAS.

‘Fartura di riku ka ta dexa-l durmi.’ — ECLESIASTES 5:12.

Frank, ki ta vive na Hong Kong, odja ma kel provérbiu li é verdadi. El tinha txeu skóla i un trabadju ki ta pagaba txeu dinheru. Dipôs el podu jerenti di kel inpréza. El fla: “Stress kumesa ta prujudika nha saúdi. N ta fikaba preokupadu dimás ki N ka ta konsigi durmiba.” Ku ténpu N ka konsigi aguenta más. Tanbê el fla: “N kumesa ta pergunta pamodi ki N staba ta faze kel-li, i N kumesa ta pensa más txeu na obijetivu di vida.”

‘Ka bu kansa dimás ta djobe rikéza.’ — PROVÉRBIOS 23:4.

Sima Frank, txeu algen dja odja ma ten kuza más inportanti na vida di ki ten un bon skóla i rikéza. Envês di konsentra ses vida na kuzas material, alguns algen ta sforsa pa ser un algen dretu i pa faze kuzas dretu pa otus. Es ta atxa ma faze kes kuza li ta djuda-s ten un futuru midjór. Má kel-li é verdadi? Nu odja respósta na kel otu artigu.