2 | ‘Konsolu ki nu ta resebe di Skrituras’

BÍBLIA TA FLA: ‘Tudu kes kuza ki skrebedu antis, skrebedu pa nos instruson, asi, pa nu pode ten speransa através di nos kapasidadi di aguenta firmi i di konsolu ki nu ta resebe di Skrituras.’ — ROMANOS 15:4.

Kuzê ki kel-li krê fla

Bíblia ten palavras ki ta da-nu forsa, ki ta konsola-nu i ki pode djuda-nu óras ki nu tene pensamentus negativu. Bíblia tanbê ta da-nu speransa ma kel dór ki nu ta xinti na korason ka ta dura ta ben kaba.

Modi ki kel-li pode djuda-nu

Alvês nos tudu nu pode xinti kasábi. Má kes ki ta lida ku depreson ô ansiadadi pode xinti dór na korason tudu dia. Modi ki Bíblia pode djuda-nu?

Bíblia ten txeu kuza puzitivu ki nu pode poi na lugar di kes pensamentu negativu. (Filipensis 4:8) El pode intxi nos menti ku pensamentus ki ta konsola-nu, ta kalma-nu i ta djuda-nu kontrola kuzê ki nu sta xinti. — Salmo 94:18, 19.
Bíblia pode djuda-nu para di pensa ma nu ka ten valor. — Lukas 12:6, 7.
Ten txeu párti na Bíblia ki ta da-nu sertéza ma nu ka sta nos sô i ma Deus, ki é nos Kriador, ta intende dretu kuzê ki nu sta xinti. — Salmo 34:18; 1 João 3:19, 20.
Bíblia ta promete ma Deus ta ben kaba ku kes lenbransa kasábi. (Isaías 65:17; Apocalipse 21:4) Óras ki nu sta sufri ku kes pensamentu i sentimentu kasábi, kel promésa li ta da-nu forsa pa nu aguenta firmi.

Modi ki Bíblia sta ta djuda Jésika

Modi ki depreson ta afeta-m

“Kantu N tinha 25 anu, N bira ka ta konsigi faze kes kuza normal na dia-dia i N atxadu ku depreson gravi. Di un óra pa kel otu, N ta tinha lenbransas kasábi di kuzas ki kontise ku mi na pasadu ki N ka ta konsigi kontrolaba. Kes dotor djuda-m intende ma kuzê ki ta poba mi ku depreson éra kes ideia negativu ki N tinha pamodi kes kuza kasábi ki kontise ku mi. Alén di toma ramedi pa kel prubléma li, N meste fazeba tratamentu pa djudaba mi sabe kal ki éra kes pensamentu negativu ki N tinha i modi ki N ta konpoba es.”

Modi ki Bíblia sta ta djuda-m

“Óras ki nha depreson sta fórti, N ta xinti txeu medu, txeu ansiadadi i N ta fika sen sónu. Txeu bês di noti, N ta fikaba sen forsa pamodi N ta tinha pensamentus ki ta inkomodaba mi i ki N ka ta konsigi kontrolaba. Sima Salmo 94:19 ta splika, óras ki preokupasons ta toma kónta di nos, Deus pode konsola-nu i pô-nu ta fika kalmu. Óras ki N ka ta konsigi durmi, N ta lé alguns versíklu di Bíblia, asi N ta dexa pensamentus di Deus konsola-m.

“Bíblia ta fla pa nu tra kes pensamentu ki é kóntra kel ki nu sabe sobri Deus. Na pasadu, N staba konvensidu ma N ka tinha valor i ma ningen ka ta amaba mi. Má, N prende ma kes ideia li é kóntra kel ki Bíblia ta fla. Bíblia ta fla ma Deus é un Pai ki ten txeu amor i konpaxon i el ta preokupa ku kada un di nos. Poku-poku N konsigi kontrola nhas pensamentu, envês di dexa-s kontrola-m. N prende odja nha kabésa sima Deus ta odja-m. Kel-li foi un kuza inportanti ki djuda-m tra kes pensamentu negativu ki N tinha sobri nha kabésa.

“N tene gana pa txiga kel ténpu ki tudu kes lenbransa kasábi i kes pensamentu negativu ta ben kaba. N sabe ma kes prubléma di duénsa mental ta ben kaba na futuru. Kel-li ta djuda-m aguenta firmi gósi i el ta da-m un speransa sábi ma nha depreson ta ben kaba na futuru.”