3 | Izénplus di Bíblia

BÍBLIA TA PÂPIA DI...Ómis ku mudjeris fiel ki tinha ‘sentimentus sima di nos’. — TIAGO 5:17.

Kuzê ki kel-li krê fla

Bíblia sta xeiu di stórias verdaderu di ómis ku mudjeris ki tevi sentimentus diferenti. Óras ki nu ta lé ses stória, nu pode odja ma algun di es tevi kes mésmu sentimentu ki nos.

Modi ki kel-li pode djuda-nu

Nos tudu nu meste pa otus algen intende-nu. Inda más óras ki nu sta lida ku un duénsa ki ta afeta nos menti. Óras ki nu ta lé Bíblia, nu ta prende sobri otus algen ki pensa i xinti di mésmu manera ki nos. Pur isu, nu ta da kónta ma otus algen sufri sima nos i nu ka ta xinti nos sô óras ki nu sta lida ku ansiadadi i ku sentimentus ki ta inkomoda-nu.

Na Bíblia nu ta atxa kuzas ki alguns algen ki staba ta xinti sen ajuda i dizusperadu fla. Algun bês dja bu pensa: ‘Ka ta da pa aguenta más di ki si’? Muizés, Elias i Davidi pensa si tanbê. — Números 11:14; 1 Reis 19:4; Salmo 55:4.
Bíblia ta pâpia di un mudjer ki txomaba Ana, ki staba ‘disgostadu dimás’ pamodi el ka ta konsigiba tinha fidju i se rival ta provokaba el txeu pamodi kel-li. — 1 Samuel 1:6, 10.
Bíblia ta pâpia di un ómi ki txomaba Jó, ki talvês nu ta konsigi intende modi ki el xinti. Enbóra el tinha un fé fórti na Jeová, el sufri txeu i un bês el fla: ‘N ta ôdia nha vida, N ka krê kontinua ta vive.’ — Jó 7:16.

Óras ki nu prende modi ki kes algen ki Bíblia ta pâpia di el lida dretu ku pensamentus negativu, nos tanbê nu pode atxa forsa ki nu meste pa nu lida ku nos prubléma.

Modi ki Bíblia sta ta djuda Kevin

Modi ki un duénsa ki ta poi algen tristi ô kontenti di un óra pa kel otu ta afeta-m

“Kantu N tinha kuazi 50 anu, N atxadu ku un duénsa ki ta afeta menti ki ta poba mi un óra tristi un óra kontenti. Ten óra ki N ta xinti ma N pode lida ku kalker prubléma ki kontise na nha vida. Má ten otu óra ki N ta xinti ma ka bale péna kontinua ta vive.”

Modi ki Bíblia sta ta djuda-m

“Un algen ki Bíblia ta pâpia di el ki N ta xinti sima el, é apóstlu Pedru. El faze kuzas mariadu ki pô-l ta xinti ma el ka tinha valor. Má envês di Pedru kontinua ta pensa di kel manera la, el djobe amigus ki ta preokupaba ku el. Óras ki N sta ta ten un dia difísil pamodi nha prubléma, nhas éru pode toma kónta di mi i pô-m ta xinti sen valor. Sima Pedru, N prende tenta fika pértu di nhas amigu ki krê djuda-m ka dizisti.

“Un otu algen ki Bíblia ta pâpia di el ki ta konsola-m txeu, é rei Davidi. Txeu bês, el ta fikaba diprimidu pamodi se situason i el ta fikaba tristi pamodi kes kuza mariadu ki dja el fazeba. N ta xinti sima el pamodi alvês N ta faze ô N ta fla kuzas ki dipôs N ta rapende. Kes palavra ki Davidi fla na Salmo 51 ta konsola-m. Na versíklu 3, el fla: ‘N sabe dretu di pekadus ki N faze, i nha pekadu sta sénpri nha dianti.’ É si ki N ta xinti óras ki N tene depreson fórti. É difísil pensa di manera puzitivu sobri nha kabésa. Má tanbê N ta xinti sima Davidi fla na versíklu 10: ‘Ó Deus, kria na mi un korason puru, i poi déntu mi un spritu novu, un spritu firmi.’ N ta fla Deus un kuza kuazi sima kel-li óras ki N ta pidi-l pa el djuda-m ten otu ideia sobri nha kabésa. I versíklu 17 ta konsola-m. El ta fla: ‘Un korason maguadu i dizanimadu, ó Deus, bu ka ta dispreza-l.’ Kel versíklu li ta da-m sertéza ma Deus ta ama-m.

“Óras ki N ta konsentra na kes izénplu di Bíblia i na kuzê ki Deus sta ta da-m gósi, nha speransa pa futuru ta bira más fórti. Kes promésa di Bíblia bira rial pa mi i kel-li ta djuda-m kontinua.”