4 | Konsedjus di Bíblia ki ta sirbi

Kuzê ki kel-li krê fla

Enbóra Bíblia é ka un livru di saúdi, el ten konsedjus ki ta sirbi i ki ta djuda-nu. Konsedjus ki el ta da pode djuda un algen ki sta ta luta kóntra un duénsa ki ta afeta se menti. Nu ben odja alguns izénplu.

Modi ki kel-li pode djuda-nu

“Kes algen ki tene saúdi ka meste dotor, má é kes duenti ki meste.” — MATEUS 9:12.

Bíblia ta rekonhese ma talvês nu meste djobe ajuda di un dotor. Txeu algen ki ten prublémas di saúdi mental xinti aliviadu kantu es faze piskiza pa atxa informasons di kunfiansa sobri ses duénsa. Tanbê otu kuza ki djuda-s é djobe ajuda di un dotor.

“Izersísiu fíziku é bon pa bu korpu”. — 1 TIMÓTEO 4:8, Contemporary English Version.

Tra ténpu i forsa pa ten ábitus ki é bon pa saúdi pode djuda-u midjora bu saúdi mental. Alguns di kes ábitu li é faze izersísiu tudu dia, kume kumida ki é bon pa saúdi i durmi kel ki bu korpu meste.

‘Korason kontenti é un bon ramedi, má spritu dizanimadu ta kaba ku forsa di algen.’ — PROVÉRBIOS 17:22.

Lé kes párti di Bíblia ki ta da algen koraji i poi métas ki bu ta konsigi alkansa, pode djuda-u fika kontenti. Si bu konsentra na kes kuza dretu ki ta kontise na bu vida i bu kridita ma kuzas ta ben midjora na futuru, kel-li ta djuda-u lida ku bus duénsa ki ta afeta bu menti.

‘Sabedoria sta ku kes algen ki é modéstu.’ — PRÓVERBIOS 11:2.

Bu pode da kónta ma bu ka ta konsigi faze tudu kuza ki bu krê bo sô. Pur isu, seta ajuda di otus algen. Amigus ku família pode krê djuda-u, má es pode ka sabe modi ki es ta faze kel-li. Dexa-s sabe kuzê ki es pode faze pa djuda-u. Ka bu spéra pa es faze txeu kuza pa bo, i agradese-s sénpri pa ajuda ki es ta da-u.

Modi ki kes konsedju di Bíblia sta ta djuda kes ki sta sufri

“N xinti ma algun kuza ka staba dretu ku mi. Pur isu, N bai konsulta na un dotora. El konsigi diskubri kuzê ki N tinha. Kel-li djuda-m intende nha prubléma i sabe ki tratamentu ki éra midjór pa nha saúdi.” — Nicole,a ki ten un duénsa ki ta pô-l fika tristi ô kontenti di un óra pa kel otu.

“N da kónta ma lé Bíblia tudu dia djuntu ku nha mudjer, ta djuda-m kumesa kada dia ku pensamentus puzitivu i ki ta inkoraja-m. I txeu bês, na kes dia ki é más difísil, ten un versíklu na Bíblia ki ta toka nha korason.” — Pedru, ki ten depreson.

“Éra difísil konta otus algen sobri nha prubléma, pamodi N tinha txeu vergónha. Má un amiga obi-m ku atenson i ku bondadi. El tenta intende modi ki N staba ta xinti. El djuda-m xinti midjór i N xinti ma N ka staba mi sô.” — Ji-yoo, ki ten prubléma na kume.

“Bíblia djuda-m ser ikilibradu, durmi kel ki nha korpu meste i ka trabadja txeu dimás. Se sabedoria djuda-m lida ku kuzas ki N ta xinti ki ta prujudika-m i ki N ta lida ku el sénpri.” — Timótiu, ki ten ideias negativu ki ta pô-l ta xinti mariadu.