Modi ki nu pode djuda kes algen ki ten prublémas di saúdi mental

Kuzê ki kel-li krê fla

É fásil nu fika kansadu óras ki nos amigu tene un duénsa ki ta afeta se menti. Má nu pode mostra ma nu ta preokupa ku nos amigu óras ki nu ta djuda-l lida ku un prubléma ki ta afeta se menti. Modi?

Modi ki kel-li pode djuda-nu

‘Sta prontu pa obi’. — TIAGO 1:19.

Un di kes midjór manera di djuda bu amigu é obi-l óras ki el krê pâpia. Ka bu atxa ma bu ten ki responde tudu kuza ki el ta fla. Dexa-l sabe ma bu sta ta obi kuzê ki el ta fla i ma bu ta preokupa ku el. Tenta intende modi ki el sta ta xinti i ka bu julga-l. Lenbra ma el pode fla alguns kuza ki el ka krê flaba i dipôs el pode rapende. — Jó 6:2, 3.

‘Nhos konsola kes ki sta diprimidu’. — 1 TESSALONICENSES 5:14.

Bu amigu pode tene ansiadadi ô el sta ta luta kóntra kel ideia ma el ka ten valor. Óras ki bu ta mostra-l ma bu ta preokupa ku el, bu pode konsola-l i da-l koraji, sikrê bu ka sabe kuzê ki bu ta fla.

‘Un amigu di verdadi ta ama tudu óra’. — PROVÉRBIOS 17:17.

Da ajuda na kel ki el meste. Envês di atxa ma bu sabe modi ki bu ta djuda-l, pergunta-l kuzê ki bu pode faze. Si é difísil pa bu amigu fla-u kuzê ki el meste, tenta fla-l algun kuza ki nhos pode faze djuntu, sima ba faze un kaminhada. Ô bu pode djuda-l faze kónpra, linpa kaza, ô faze algun otu kuza. — Gálatas 6:2.

‘Ten paxénxa’. — 1 TESSALONICENSES 5:14.

Bu amigu pode ka ta krê pâpia tudu óra. Dexa-l sabe ma bu ta fika kontenti di obi-l óras ki el krê pâpia. Pamodi se duénsa, bu amigu pode fla ô faze kuzas ki ta magua-u. El pode fla-u ma ka ta da más pa nhos faze kuzas ki dja nhos konbinaba ô el pode irita-u. Óras ki bu ta djuda-l na kuzas ki el meste, ten paxénxa i intende-l. — Provérbios 18:24.

Bu pode djuda bu amigu

“N ta dexa-l sabe ma mi é un amiga ki el pode konta ku el. Sikrê N ka ta konsigi rezolve se prublémas, N ta tenta obi kuzê ki el ten pa fla. Alvês kuzê ki nha amiga meste é un algen pa obi-l i kel-li ta pô-l ta xinti midjór.” — Fátima,a ki se amiga ten prubléma na kume, ansiadadi i depreson.

“Un di nhas amiga ta mostra txeu amor i el é puzitivu. El konvida-m pa N ba kume un kumida sábi ku el na se kaza. Na kel anbienti sábi, N xinti avontádi pa N fla-l kuzê ki N staba ta xinti. Kel-li inkoraja-m!” — Aiumi, ki ten depreson.

“Ten paxénxa é rei di inportanti. Óras ki nha mudjer ta faze algun kuza ki ta xatia-m, N ta lenbra nha kabésa ma é se duénsa ki ta pô-l ta faze kel-la, é ka pamodi el é si própi. Kel-li ta djuda-m ka fika xatiadu i da-l más atenson.” — Jacob, ki se mudjer ten depreson.

“Nha mudjer ta djuda-m txeu i el ta konsola-m. Óras ki ansiadadi ta toma kónta di mi, nunka el ka ta obriga-m pa N faze algun kuza ki N ka krê faze. Kel-li krê fla ma alvês el ka ta faze un kuza ki el gostaba di faze. El é spesial pa mi, pamodi el gosta di da i el ta faze sakrifisiu pa mi.” — Enrico, ki ten ansiadadi.