Provérbios 17:17 — ‘Un amigu di verdadi ta ama tudu óra’

Kuzê ki Provérbios 17:17 ta siginifika

Un amigu di verdadi é un algen ki sénpri bu pode kunfia na el i ki sta prontu pa djuda-u. Sima irmons ki é txeu amigu di kunpanheru, kel tipu di amigu li é lial, ta mostra bondadi i ta preokupa ku bo, prinsipalmenti na momentus difísil.

‘Un amigu di verdadi ta ama tudu óra’. Kel frazi li tanbê pode krê fla ma “amigus sénpri ta mostra ses amor”. Kel palavra ebraiku pa “ama” ki uzadu na kel frazi li ta involve más di ki ten sentimentu pa un algen. É un amor di verdadi ki un pesoa ta mostra através di kes kuza ki el ta faze. (1 Koríntius 13:4-7) Amigus ki ta mostra kel tipu di amor li pa kunpanheru, ta kontinua lial mésmu óras ki ses amizadi ta podu na próva, talvês pamodi es tevi algun dizentendimentu ô pamodi algun prubléma ki es sta ta pasa pa el. Tanbê es ta sta sénpri prontu pa púrdua kunpanheru. (Provérbios 10:12) I un amigu di verdadi ka ta fika ku invéja óras ki kontise un kuza dretu ku kel otu. Envês di kel-li, el ta fika kontenti ku se amigu. — Romanus 12:15.

‘Un amigu di verdadi é un irmon ki nase pa ténpu di frónta.’ Kel provérbiu li ten bazi na ideia ma irmons di sangi é txeu amigu di kunpanheru. Nton, óras ki nu ta faze nos midjór pa djuda un amigu ki sta ta pasa pa un momentu difísil, nu sta ta aji sima un irmon ô un irman di verdadi. Alén di kel-li, amizadi asi ka ta fika fraku pamodi prubléma. Má na verdadi, óras ki es ta pasa pa prubléma, amor i ruspetu ki es ten pa kunpanheru ta omenta.

Kuzê ki kes testu antis i dipôs di Provérbios 17:17 ta fla

Livru di Provérbios ten txeu konsedju ki ten sabedoria. El ten txeu frazi kurtu i sinplis ki ta poi ken ki sta lé ta pensa. É rei Salumon ki skrebe maior párti di kel livru di Bíblia li. I el skrebe-l di un manera ki el ta parse ku poezia ebraiku. Envês di uza rima, kel tipu di poezia li ta uza ideias ki ta parse ku kunpanheru pa distaka pontu prinsipal ô ideias diferenti pa mostra diferénsa. Provérbios 17:17 é un izénplu di un poezia ki ta uza ideias ki ta parse ku kunpanheru. Kel sugundu párti di versiklu ta distaka kel ideia ki sta na primeru párti. Provérbios 18:24 é un izénplu ki ta mostra diferénsa entri dôs ideia. El ta fla: ‘Ten amigus ki sta prontu pa kaba ku kunpanheru, má ten un amigu ki ta pega na bo más di ki un irmon.’

Timenti Salumon staba ta skrebe Provérbios 17:17, talvês el staba ta pensa na kel amizadi fórti entri se pai, Davidi, i Jonatan, fidju di rei Saul. (1 Samuel 13:16; 18:1; 19:1-3; 20:30-34, 41, 42; 23:16-18) Enbóra Davidi ku Jonatan ka éra família, es éra más amigu di kunpanheru di ki irmons di verdadi. Jonatan ti poi se vida na risku pa proteje se amigu.a

Odja kel vídiu li pa bu sabe más sobri livru di Provérbios.