Bíblia ta da-nu orientasons di kunfiansa

Nu ka pode ten serteza ma nos disizons ta ben ten bons rezultadu si nu ta disidi sô ku bazi na nos opinion ô na opinion di otus algen. Bíblia ta fla pamodi ki kel-li ta kontise. Tanbê, el ta djuda-nu sabe kuzê ki é dretu i kuzê ki é mariadu, i kel-li ta djuda-nu ten un vida filís.

NU MESTE PA DEUS ORIENTA-NU

Na Bíblia, Jeováa Deus ta splika ma ómis meste di se orientason i ma es é ka kapás di gia ses kabésa. (Jeremias 10:23) Pur isu, através di Bíblia Deus ta da-nu orientasons e leis di konportamentu. El ta ama pesoas i el ka krê pa nu toma maus disizon ki pode pô-nu ta sufri i bira nos vida más difísil. (Deuteronômio 5:29; 1 Juan 4:8) Tanbê, dja ki el é nos Kriador, el ten sabedoria i konhisimentu pa da-nu kes midjór konsedju ki ten. (Salmo 100:3; 104:24) Má, Deus nunka ka ta obriga pesoas vive di akordu ku se leis.

Jeová da primeru ómi ku mudjer, Adon ku Eva, tudu kel ki es mesteba pa es ser filís di verdadi. (Génesis 1:28, 29; 2:8, 15) Tanbê el da-s un orientason sinplis ki el ta speraba ma es ta obiba ku el. Má, el dexa-s skodje di es pa es si es ta ba obiba ku kes orientason ô nau. (Génesis 2:9, 16, 17) Infilismenti, Adon ku Eva skodje vive di akordu ku kel ki es ta atxaba ma éra dretu ô mariadu envês di obi ku orientasons di Deus. (Génesis 3:6) Kal ki foi rezultadu? Pesoas sta más filís? Nau. Sima ténpu ba ta pasa fika klaru ma ka obi ku orientasons di Deus ka ta traze pas i filisidadi. — Eclesiastes 8:9.

Bíblia ta da-nu kes orientason ki nu meste pa nu pode toma bons disizon ki ta djuda-nu, ka ta inporta na undi ki nu ta vive ô modi ki nos família é. (2 Timótiu 3:16, 17; odja kuadru “Un livru pa tudu algen”.) Odja modi ki Bíblia ta djuda-nu.

Odja pamodi ki Bíblia ta txomadu di “palavra di Deus”. — 1 Tesalonisensis 2:13. Odja vídiu Ken ki é autor di Bíblia?, na jw.org.

PAMODI KI ALGUNS ALGEN KA TA ATXA MA BÍBLIA PODE DJUDA-S

Alguns algen ta atxa ma Bíblia ka ten bons konsedju ki nu pode kunfia na el. Odja alguns kuza ki pesoas ta fla.

Alguns algen ta fla: “Kes kuza ki sta na Bíblia ka sta di akordu ku kunpanheru.”

Verdadi: Enbóra alguns párti di Bíblia ta parse ma ka sta di akordu ku kunpanheru, óras ki nu ta prende sobri modi i na ki ténpu ki es skrebedu nu ta odja ma na verdadi es sta di akordu ku kunpanheru.

Pa odja alguns izénplu, lé artigu “Bíblia ta kontradize se kabésa?”, na jw.org.

Alguns algen ta fla: “Kes algen ki ta sigi Bíblia ta faze kuzas mariadu, nton Bíblia ka ten bons konsedju sobri konportamentu.”

Verdadi: Bíblia é ka kulpadu pa konportamentu mariadu di kes algen ki ka ta faze kel ki el ta inxina. Bíblia dja flaba ma txeu algen, ki ta inklui xéfis di relijion, ta ben flaba ma es ta sigi Bíblia, má es ka ta ben fazeba kuzê ki el ta fla. Tanbê, el ta fla ma pamodi kel-li alguns algen ta ben ‘papiaba mal’ di Bíblia. — 2 Pedru 2:1, 2.

Pa bu odja un izénplu di modi ki txeu xéfi di relijion ka sta sigi kuzê ki Bíblia ta inxina, lé artigu “Relijion é sô un grandi nogósiu?”, na jw.org.

Alguns algen ta fla: “Kes algen ki ta sigi Bíblia ka ta ruspeta otus algen ki é ka sima es.”

Verdadi: Bíblia ta fla ma nu debe trata otus algen ku ruspetu. El ta fla ma nu ka debe...

atxa ma nos é más inportanti di ki otus algen. — Filipensis 2:3.
mostra falta di ruspetu pa pesoas ki ka ten mésmu prinsípius ki nos ô ki ka ta kridita na mésmu kuza ki nos. — 1 Pedru 2:17.
obriga otus algen pa konkorda ku nos. — Mateus 10:14.

Bíblia ta mostra ma Deus sénpri ta trata pesoas ku bondadi i justisa, i ma Deus krê pa nu trata otus algen di mésmu manera. — Romanus 9:14.

Pa más informason, lé artigu “Toleránsia — Kuzê ki Bíblia ta fla”, na jw.org.

BÍBLIA TA FLA-NU KUZÊ KI DEUS KRÊ PA NU FAZE

Bíblia ten stórias ki ta mostra modi ki Deus lida ku pesoas désdi ténpu antigu. Kes kuza ki el ta fla ta djuda-nu intende kuzê ki Deus ta atxa ma é dretu ô mariadu, kuzê ki ta djuda-nu i kuzê ki ta prujudika-nu. (Salmo 19:7, 11) El ta da-nu konsedjus ki ka ta muda i ki ta djuda-nu toma bons disizon na nos dia-dia.

Pur izénplu, odja kel konsedju li ki nu ta atxa na Provérbios 13:20: ‘Ken ki ta anda ku algen ki ten sabedoria, ta ganha sabedoria, má ken ki ta sta djuntu ku algen ki ka ten juís, ta ten prublémas.’ Kel konsedju li ta sirbi na nos ténpu sima el sirbi na pasadu. Bíblia sta xeiu di konsedjus ki ta djuda-nu na nos dia-dia i ki ten txeu valor. — Odja kuadru “Konsedjus di Bíblia inda ta djuda-nu”.

Má talvês bu pode pensa: ‘Modi ki N pode ten serteza ma konsedjus di Bíblia pode djuda-m?’ Na kel otu artigu nu ta ben odja modi ki konsedjus di Bíblia djuda alguns algen.

a Jeová é nómi di Deus. — Salmo 83:18.

KONSEDJUS DI BÍBLIA INDA TA DJUDA-NU

Enbóra dja pasa kuazi dôs mil anu désdi ki Bíblia tirmina di skrebedu, inda el sta kontinua ta djuda-nu. Pesoas sénpri krê sérba filís i ten un vida sábi. (Eclesiastes 1:9) Konsedjus di Bíblia inda ta djuda-nu alkansa kel obijetivu li.

Onestidadi

“Nu krê konporta ku onestidadi na tudu kuza.” — Ebreus 13:18.
“Kel ki ta furta pa el ka furta más, má pa el trabadja duru”. — Efézius 4:28.

Modi ki nu pode da dretu ku otus algen

“Pa kada algen kontinua ta djobe, ka se própi vantajen, má kel di otu algen.” — 1 Koríntius 10:24.
“Nhos kontinua ta aguenta kunpanheru i sta sénpri prontu pa púrdua kunpanheru”. — Kolosensis 3:13.

Modi ki nu ta toma disizon

‘Algen nosenti ta kridita na tudu palavra, má ken ki é prudenti ta pensa antis di el da kada pasu.’ — Provérbios 14:15.
‘Algen prudenti ta odja prigu i el ta sukundi, má kes ki ka ten spiriénsia ta kontinua ta bai i es ta kai na prublémas.’ — Provérbios 22:3.