Kontinua ta prende ku kes ensinu prinsipal di Bíblia

1. Modi ki kes ensinu prinsipal di Bíblia muda nos vida?

KES verdadi prinsipal di Bíblia muda nos vida. Pur izénplu, kantu nu prende ma nómi di Deus é Jeová, nu da kel primeru pasu pa nu bira se amigu. (Isa. 42:8) Kantu nu prende verdadi sobri kuzê ki ta kontise óras ki un algen móre, nu ka fika ta pergunta si kes algen ki nu ta ama ki dja móre sta ta sufri. (Ecl. 9:10) I kantu nu prende sobri kel promésa di Deus di bira téra un paraízu, nu ka fika preokupadu más ku nos futuru. Nu ten serteza ma nu pode ben vive ka sô pa poku ténpu, sima 70 ô 80 anu, má pa tudu ténpu. — Sal. 37:29; 90:10.

2. Modi ki 2 Pedru 1:12, 13 ta mostra ma kes ensinu prinsipal di Bíblia pode djuda ti mésmu un sérvu di Jeová maduru?

² Nunka nu ka debe skese modi ki kes verdadi prinsipal di Bíblia é inportanti. Na se sugundu karta, apóstlu Pedru skrebe pa kes kriston ki staba “ben finkadu na verdadi.” (Lé 2 Pedru 1:12, 13.) Má, na kel ténpu tinha pesoas mau na kongregason, ki krê disviaba kes irmon di verdadi. (2 Ped. 2:1-3) Pedru krê djudaba ses irmon ku irmans asi pa es pode tinha forsa pa es aguentaba kes difikuldadi. Pa faze kel-li, el lenbra-s di alguns kuza ki dja es prendeba. Kes kuza ki es prende pode djudaba es kontinua ta ser lial pa Jeová ti fin.

3. Pamodi ki tudu sérvu di Jeová debe kontinua ta midita na kes verdadi prinsipal di Bíblia ki es prende? Da un izénplu.

³ Sima nu ta ba ta bira un sérvu di Jeová maduru, nu ta dizenvolve kapasidadi di prende novus lison di kes verdadi prinsipal di Bíblia. Pur izénplu, un algen ki é bon na kuzinha i un algen ki sta kumesa ta prende pode uza kes mésmu ingridienti prinsipal pa pripara un kumida. Leba ténpu pa kel algen ki é bon na kuzinha prende modi ki el ta uza dretu kes ingridienti i uza-s di manera diferenti i ki ta poi kel kumida ta fika más sábi. Di mésmu manera, kes algen ki dja ten txeu ténpu ta sirbi Jeová i kes algen ki kumesa ta studa Bíblia gósi konxe kes mésmu verdadi prinsipal di Bíblia. Má es pode prende lisons diferenti ku kes mésmu verdadi di Bíblia. Di ki manera? Pur izénplu, nos situason ô priviléjiu na sirvisu di Jeová talvês muda désdi ki nu batiza. Óras ki nu ta pensa na kes kuza ki nu prende dja ten txeu ténpu, nu ta odja otus manera ki es pode djuda-nu gósi. Nu ben odja kuzê ki sérvus di Jeová maduru pode prende di três di kes verdadi prinsipal di Bíblia.

JEOVÁ É KRIADOR

4. Modi ki prende ma Jeová é Kriador muda nos vida?

⁴ “Ken ki faze tudu kuza é Deus.” (Ebr. 3:4) Nu sabe ma tevi un Kriador ki ten tudu sabedoria i puder ki kria nos planéta i vida ki ten na el. É el ki faze-nu, pur isu el konxe-nu dretu. Alén di kel-li, el ta preokupa ku nos. El sabe kuzê ki é midjór pa nos. Sabe di kel verdadi sinplis li, ma Jeová é nos Kriador, ta muda nos vida di txeu manera i el ta da-nu obijetivu na vida.

5. Ki verdadi pode djuda-nu ser umildi? (Isaías 45:9-12)

⁵ Sabe ma Jeová é Kriador pode djuda-nu ser umildi. Dipôs ki Jó fika ta pensa sô na el i na otus algen, Jeová lenbra-l ma el é kel Kriador Tudu-poderozu. (Jó 38:1-4) Kel-li djuda Jó odja ma tudu kel ki Jeová ta faze é sénpri dretu. Di akordu ku kel-li, proféta Izaías más tardi skrebe: ‘Baru debe fla Oleru: “Kuzê ki bu sta ta faze?”’ — Lé Isaías 45:9-12.

6. Na ki situason é txeu inportanti pensa na sabedoria i puder di nos Kriador? (Odja imajen.)

⁶ Sima un sérvu di Jeová ta ba ta ganha spiriénsia, el pode kumesa ta kunfia más na se opinion envês di djobe orientason na Jeová i na se Palavra, Bíblia. (Jó 37:23, 24) Óras ki kel-li kontise, é bon kel algen para i pensa txeu na puder i sabedoria di se Kriador ki ka ten konparason. (Isa. 40:22; 55:8, 9) Kel verdadi inportanti li ta djuda kel algen kontinua umildi i odja ma pensamentus di Jeová é mutu más inportanti di ki di sel.

7. Kuzê ki Raela faze pa seta un novu orientason?

⁷ Lenbra ma Jeová é Kriador, djuda Raela, ki ta mora na Slovénia, seta un mudansa na organizason. El fla: “Alvês, é ka fásil pa N seta kes mudansa ki kes algen ki ta toma kónta di organizason ta faze. Pur izénplu, mésmu dipôs ki N sisti kel Rilatóriu di Grupu Enkaregadu di Óbra di 2023 nunbru 8, N fika spantadu di odja pa primeru bês un irmon ku barba ta faze diskursu. Nton, N faze orason pa Jeová djuda-m seta kel mudansa li.” Raela rekonhese ma dja ki Jeová é Kriador di séu ku téra, sénpri el sabe kuzê ki é midjór pa se organizason. Si bu ta atxa difísil seta un novu intendimentu ô un novu orientason, pamodi ki bu ka ta tra ténpu pa midita na sabedoria i na puder di bu Kriador? — Rom. 11:33-36.

DEUS É KA KULPADU PA SUFRIMENTU

8. Modi ki prende pamodi ki Deus ta dexa sufrimentu kontise djuda-nu?

⁸ Pamodi ki Deus ta dexa sufrimentu kontise? Alguns algen ki ka sabe respósta pa kel pergunta li ta fika xatiadu ku Deus ô es ta pensa ma Deus ka ta izisti! (Pro. 19:3) Bu prende ma pesoas ta sufri i es ta móre pamodi pekadu i inperfeison, ka pamodi Jeová faze algun kuza mariadu. Pamodi Jeová sta ta mostra paxénxa pa pesoas, kel-li da xansi pa milhons di algen konxe-l i prende modi ki el ta ben kaba ku sufrimentu pa tudu ténpu. (2 Ped. 3:9, 15) Kes verdadi li konsola-u i pô-u ta ser más se amigu.

9. Na ki situasons nu meste lenbra pamodi ki Jeová ta dexa sufrimentu kontise?

⁹ Nu ta intende ma nu meste ten paxénxa timenti nu sta spera pa Jeová kaba ku sufrimentu. Má óras ki nos ô un di kes algen ki nu ta ama ta pasa pa prublémas, injustisa ô ta móre nu pode pergunta pamodi ki Jeová ka sta ta aji faxi. (Hab. 1:2, 3) Na kes situason li, é bon nu pensa na kes motivu di pamodi ki Jeová ta dexa ki kes algen justu pasa pa sufrimentu.a (Sal. 34:19) Tanbê nu pode pensa na modi ki el ta ben kaba ku sufrimentu pa tudu ténpu.

10. Kuzê ki djuda Anne xinti konsoladu dipôs ki se mai móre?

¹⁰ Sabe pamodi ki Deus ta dexa sufrimentu kontise pode djuda-nu aguenta prublémas. Anne, ki ta vive na ilha di Mayotte, na Osianu Índiku, fla: “Dja ten alguns anu ki nha mai móre i kel-li dexa-m txeu tristi. Má, sénpri N ta lenbra nha kabésa ma Jeová é ka kulpadu pa sufrimentu. El krê kaba ku tudu tipu di sufrimentu i resusita kes algen ki nu ta ama ki dja móre. Midita na kes verdadi li ta da-m un pas déntu mi i txeu bês N ta fika dimiradu.”

11. Sabe pamodi ki Jeová ta dexa sufrimentu kontise ta motiva-nu faze kuzê?

¹¹ Sabe pamodi ki Deus ta dexa sufrimentu kontise pode motiva-nu kontinua ta prega. Dipôs di splika ma paxénxa di Jeová ta siginifika salvason pa kes ki rapende, Pedru skrebe: “Nhos pensa na ki tipu di algen ki nhos debe ser. Nhos debe ser algen ki ta konporta di manera santu i ki ta faze kuzas ki ta mostra ma nhos ta adora Deus”. (2 Ped. 3:11) Un di kes kuza “ki ta mostra ma nu ta adora Deus,” é nos trabadju di pregason. Sima nos Pai, nu ta ama pesoas. Nu krê pa es ben vive na kel mundu novu justu di Deus. Ku paxénxa, Jeová sta ta da kes algen undi bu ta mora, un oportunidadi di adora-l. É un priviléjiu grandi bu trabadja ku Deus i djuda más algen ki bu ta pode prende sobri el antis di fin ben! — 1 Kor. 3:9.

NU STA TA VIVE NA “TÉNPU DI FIN”

12. Modi ki prende ma nu sta ta vive na “ténpu di fin” ta djuda-nu?

¹² Bíblia ta fla tintin pa tintin modi ki pesoas ta sérba na “ténpu di fin”. (2 Tim. 3:1-5) Si nu djobe na nos vólta nu ta odja modi ki kel profesia li sta ta kunpri. Sima nu ta odja konportamentu di pesoas ta piora, nu ta fika ku más serteza ma Palavra di Deus é di kunfiansa. — 2 Tim. 3:13-15.

13. Di akordu ku kel ilustrason di Jizus ki sta na Lukas 12:15-21, ki perguntas nu pode faze?

¹³ Sabe ma nu sta ta vive na ténpu di fin ta djuda-nu konsentra na kuzê ki é más inportanti di verdadi. Nu pode prende pamodi ki faze kel-li é inportanti na kel ilustrason di Jizus ki nu ta atxa na Lukas 12:15-21. (Lé.) Pamodi ki kel ómi riku ‘ka tinha juís’? Ka éra pamodi kel ómi éra riku, má pamodi el ka staba konsentradu na kes kuza más inportanti. El ‘djunta tizoru pa el, má el ka éra riku pa Deus.’ Uza se ténpu di manera mariadu foi un grandi éru pamodi kel ómi dja ka tinha txeu ténpu di vida. Deus fla kel ómi: “Kel noti li bu ta móre.” Oji, sima kel mundu li ta ba ta txiga na fin nu pode pergunta: ‘Nhas méta ta mostra ma N sta ta uza nha ténpu di midjór manera? Ki métas N sta ta djuda nhas fidju ten? N sta ta uza nha forsa, nha ténpu i kes kuza ki N ten pa N ten rikézas ô pa N djunta tizorus na séu?’

14. Modi ki izénplu di Miki ta djuda-nu odja pamodi ki é inportanti nu lenbra ma nu sta ta vive na ténpu di fin?

¹⁴ Óras ki nu ta lenbra ma nu sta ta vive na ténpu di fin, kel-li ta djuda-nu toma bons disizon. É kel-li ki kontise ku un irman ki txoma Miki. El fla: “Kantu N tirmina liseu, N kria un trabadju ki N tinha ki studaba sobri animal. Tanbê N tinha méta di ser pionera fíksu i di sirbi undi ten más nisisidadi. Amigus maduru konsedja-m pa N pensa si N ta konsigi ten un karera i omésmu ténpu konsigi alkansa nhas méta na sirvisu di Jeová. Es lenbra-m ma fin di kel mundu li sta kuazi ta txiga. I na mundu novu N ta ben ten tudu ténpu pa N studa kes animal ki N gosta. Nton, N skodje faze un formason ki ta djudaba mi atxa un trabadju i ki ka ta tomaba mi txeu ténpu. Di kel manera li N atxa un trabadju ki ta djudaba mi na nha sirvisu di pioneru i dipôs pa N bai pa Ekuador, undi ten más nisisidadi.” Gósi Miki i se maridu ta faze trabadju di vizita kongregasons na kel país.

15. Pamodi ki nu ka debe dizisti di kes algen ki inda ka mostra interesi pa notísias sábi? Da un izénplu. (Odja imajen.)

¹⁵ Nu ka debe fika dizanimadu óras ki pesoas ka ta seta notísias sábi lógu. Pesoas pode muda. Odja izénplu di Tiagu ki éra irmon di Jizus. El odja Jizus ta kria, ta bira Misías i ta inxina di un manera ki ninhun otu algen ka inxina. Simé, duránti txeu anu Tiagu ka sigi Jizus. É sô dipôs ki Jizus resusitadu ki se irmon bira un disiplu. Na verdadi, el bira un disiplu zelozu!b (Juan 7:5; Gál. 2:9) É inportanti bu ka dizisti di bus família ki inda ka mostra interesi i kontinua ta prega pa kes algen ki ka krê obiba bo. Lenbra ma nu sta ta vive na ténpu di fin, nton nos trabadju di pregason é urjenti. Dipôs pesoas pode pensa sobri kuzê ki bu fla-s gósi i aji di akordu ku kel-la, talvês dipôs ki grandi tribulason kumesa.c

KONTINUA TA MOSTRA GRATIDON PA KES VERDADI PRINSIPAL DI BÍBLIA

16. Modi ki kes verdadi di Bíblia ta djuda-nu? (Odja kuadru “Uza kes verdadi di Bíblia pa djuda otus algen”.)

¹⁶ Alguns di kes kumida spritual ki nu ta resebe ta priparadu pa djuda kes algen ki nunka ka obi kes verdadi prinsipal di Bíblia. Pur izénplu, diskursu pa públiku, alguns artigu i vídiu na jw.org i nos revista pa públiku, ta priparadu pa djuda prinsipalmenti kes algen ki é ka Tistimunha di Jeová. Má simé, kes verdadi ta djuda nos tudu. Es ta djuda-nu ten un amor más fórti pa Jeová, es ta bira nos fé más fórti na se Palavra i es ta djuda-nu sta más ben priparadu pa inxina kes verdadi prinsipal pa otus algen. — Sal. 19:7.

17. Na ki situason nu meste pensa na kes verdadi prinsipal di Bíblia?

¹⁷ Nos ki é Tistimunhas di Jeová, nu ta fika txeu kontenti óras ki ten un intendimentu novu di un verdadi di Bíblia. Má tanbê nu ten txeu gratidon pa kes verdadi inportanti di Bíblia ki nu prende pa primeru bês i ki djuda-nu bira amigu di Jeová. Si nu xinti tentadu na insisti na nos própi opinion envês di sigi orientason di organizason di Jeová, ku umildadi, nu pode lenbra ma kenha ki sta ta orienta kel organizason li é kel Kriador ki ten tudu puder i tudu sabedoria. Óras ki nos ô un algen ki nu ta ama sta ta lida ku un prubléma, nu pode mostra paxénxa i pensa na pamodi ki Jeová sta ta dexa sufrimentu kontise. I óras ki nu ta disidi modi ki nu ta uza nos ténpu i kuzas ki nu ten, nu debe lenbra ma nu sta ta vive na ténpu di fin i ma falta poku ténpu pa fin ben. Si nu faze si, kes verdadi ki Jeová ta inxina-nu ta kontinua ta da-nu forsa, ta motiva-nu pa nu kontinua ta ten sabedoria i ta djuda-nu kontinua ta sirbi Jeová di manera lial.