Midjór manera di lida ku injustisa

1-2. Modi ki txeu algen ta reaji óras ki ta kontise injustisa, i ki perguntas nu pode faze?

NU STA vive na un mundu injustu. Pesoas ta sufri injustisa pamodi es é póbri, pamodi ses país, ses aparénsia ô pamodi otus motivu. Txeu algen ta sufri pamodi governantis koruptu i alguns algen di nogósiu ki ta preokupa sô ku dinheru. Kes-li i otus injustisa ta afeta nos tudu di un manera ô di otu.

² Nu ka ta fika dimiradu pamodi txeu algen sta xatiadu ku injustisa ki es sta ta odja na mundu oji. Nos tudu nu krê vive na un mundu justu i ki nu ta xinti suguru. Alguns algen ta tenta rezolve prublémas ki es ta odja na mundu ô na ses país. Es ta faze manifestason kóntra govérnu i leis ô es ta vota na xéfis di pulítika ki ta promete rezolve prublémas. Má nos ki é sérvus di Jeová, nu ta inxinadu ma nu ‘ka debe faze párti di mundu’ i nu debe spera pa Reinu di Deus ben kaba ku tudu injustisa. (Juan 17:16) Má simé nu ta fika tristi i xatiadu óras ki nu ta odja pesoas ta tratadu ku injustisa. Nu pode pergunta: ‘Modi ki N debe lida ku injustisa? Ten algun kuza ki N pode faze pa rezolve injustisa gósi?’ Pa responde kes pergunta li, primeru nu ben odja modi ki Jeová i Jizus ta xinti óras ki pesoas ta tratadu ku injustisa.

JEOVÁ I JIZUS TA ÔDIA INJUSTISA

3. Pamodi ki nu ta fika xatiadu ku injustisa? (Isaías 5:7)

³ Bíblia ta splika-nu pamodi ki nu ka gosta di injustisa. El ta splika ma Jeová faze-nu sima el i ma ‘el ta ama retidon i justisa.’ (Sal. 33:5; Jén. 1:26) Nunka el ka ta faze injustisa i nen el ka krê pa otus algen aji asi! (Deut. 32:3, 4; Miq. 6:8; Zac. 7:9) Pur izénplu, duránti ténpu di proféta Izaías, Jeová obi ‘gritu di frónta’ di txeu israelita ki staba ta maltratadu pa otus israelita. (Lé Isaías 5:7.) Jeová kastiga kes algen ki kontinua ta dizobidese se Lei i ki staba ta trata otus ku injustisa. — Isa. 5:5, 13.

4. Modi ki Jizus xinti kantu el odja un algen ta tratadu ku injustisa? (Odja imajen.)

⁴ Sima Jeová, Jizus ta ama justisa i el ta ôdia injustisa. Un dia Jizus odja un ómi ku mô manku. Jizus xinti péna di kel ómi i el kura se mô. Má kantu kes xéfi di relijion odja kel-li, es fika xatiadu. Es staba más preokupadu na kunpri kes lei duru ki es kria sobri sábadu, envês di preokupa ku sufrimentu di kel ómi. Modi ki Jizus xinti ku kel-li? El xinti “txeu tristi pamodi es tinha korason duru”. — Mar. 3:1-6.

5. Pamodi ki nu ka debe kontinua xatiadu óras ki nu odja injustisa ta kontise?

⁵ Jeová i Jizus ta fika xatiadu óras ki es ta odja injustisa. Pur isu é normal nos tanbê, nu xinti di mésmu manera. (Efé. 4:26 i nóta na Bíblia di studu na “Fiquem irados”) Má nu debe kontrola nos raiba i lenbra ma nu ka ta konsigi kaba ku injustisa. Si nu kontinua txeu ténpu xatiadu, nu pode fika duenti ô deprimidu. (Sal. 37:1, 8; Tia. 1:20) Nton, kuzê ki nu debe faze óras ki nu ta odja injustisa? Nu pode prende txeu ku izénplu di Jizus.

MODI KI JIZUS LIDA KU INJUSTISA

6. Ki injustisa Jizus odja kantu el staba na téra? (Odja imajen.)

⁶ Jizus odja txeu injustisa kantu el staba na téra. El sabia ma kes xéfi di relijion faze txeu régra ki poi vida di pesoas ta bira difísil dimás. (Mat. 23:2-4) Tanbê el sabia ma kes autoridadi di Roma ta maltrataba pesoas. Txeu judeu krê fikaba livri di govérnu di Roma. Ti mésmu alguns di es, sima kes zeloti, faze grupu pa luta kóntra govérnu di Roma. Má Jizus ka faze párti di ninhun di kes grupu ki staba ta luta pa muda govérnu. Kantu Jizus fika ta sabe ma pesoas staba ta faze planu pa bira-l rei, el sai di ses meiu. — Juan 6:15.

7-8. Pamodi ki Jizus ka tenta kaba ku injustisa kantu el staba na téra? (Juan 18:36)

⁷ Kantu Jizus staba na téra, el ka involve na pulítika pa tenta kaba ku kes injustisa ki el staba ta odja. Pamodi? El sabia ma umanus ka ten direitu, nen kapasidadi pa governa ses kabésa. (Sal. 146:3; Jer. 10:23) Tanbê es ka ta konsigi kaba ku kes prubléma ki ta poi injustisa ta kontise. É Satanás ki sta ta governa kel mundu li. El é mau i txeu algen ta faze kuzas sima el. (Juan 8:44; Efé. 2:2) I pamodi inperfeison, ti mésmu kes algen ku bon intenson ka ta konsigi rezolve prubléma di kel mundu li dja ki nen sénpri es ka ta faze kel ki é justu. — Ecl. 7:20.

⁸ Jizus sabia ma é sô Reinu di Deus ki ta konsigi kaba ku tudu kes prubléma ki ta poi injustisa ta kontise. É pur isu ki el uza se ténpu i se forsa pa ‘prega i pa pâpia di kes notísia sábi di Reinu di Deus.’ (Luk. 8:1) Di kel manera li el garanti “kes ki tene fómi i sedi di justisa” ma korupson i injustisa ta ben kabadu ku el. (Mat. 5:6 i nóta na Bíblia di studu; Luk. 18:7, 8) Ninhun govérnu di ómi ka ta konsigi faze kel mudansa li. É sô Reinu di Deus ki ta konsigi i el “ka ta faze párti di es mundu.” — Lé Juan 18:36.

IMITA JIZUS ÓRAS KI BU TA ODJA INJUSTISA

9. Kuzê ki ta da-u serteza ma é sô Reinu di Deus ki ta ben kaba ku tudu injustisa?

⁹ Nu sta ta vive na “ténpu di fin” di kel mundu li, pur isu ten más injustisa di ki kantu Jizus staba na téra. Má sima na ténpu di Jizus, kenha ki ta poi injustisa ta kontise é Satanás i kes algen mau. (2 Tim. 3:1-5, 13; Apo. 12:12) Sima Jizus, nu sabe ma é sô Reinu di Deus ki ta ben kaba ku kes prubléma ki ta poi injustisa ta kontise. Dja ki nu ta apoia Reinu di Deus di tudu korason, nu ka ta partisipa na marxa, na manifestason i na otus kuza ki ta fazedu pa tenta kaba ku injustisa. Odja spiriénsia di un irman ki txoma Stacy.a Antis di prende verdadi, Stacy sénpri ta partisipaba na marxa kóntra injustisa. Má algun ténpu dipôs, el kumesa ta ten dúvida si kel ki el staba ta faze na verdadi staba ta djuda pesoas i ta rezolve ses prubléma. El fla: “Óras ki N ta staba na kes marxa, alvês N ta pensaba ma talvês kel-la é ka éra midjór manera di luta kóntra injustisa. Gósi N ta apoia Reinu di Deus i N sabe ma é sô el ki ta pode kaba ku injustisa. N sabe ma Jeová ta ben kaba ku tudu sufrimentu, ki é un kuza ki N ka ta pode kaba ku el.” — Sal. 72:1, 4.

10. Di akordu ku Mateus 5:43-48, pamodi ki nu ka ta tenta muda lei i govérnu? (Odja imajen.)

¹⁰ Txeu algen oji ta apoia grupus ki sta ta tenta muda govérnu. Má txeu di es ta fika xatiadu, pur isu es ka ta obidese lei i es ta prujudika otus algen. Má é ka kel-li ki Jizus inxina-nu pa nu faze. (Efé. 4:31) Un irmon ki txoma Jeffrey fla: “N sabe ma óras ki pesoas ta faze manifestason é fásil pa es fika xatiadu, kumesa ta straga i furta kuzas di otus algen, ô da kunpanheru pankada.” Má Jizus inxina-nu pa nu trata tudu algen ku amor, sikrê es ka ta konkorda ku nos ô es ta pirsigi-nu. (Lé Mateus 5:43-48.) Dja ki nos é sérvus di Jeová, nu ta faze nos midjór pa nu ivita kalker kuza ki ka sta di akordu ku kel ki Jizus inxina-nu.

11. Pamodi ki alvês pode ser difísil imita Jizus?

¹¹ Enbóra nu sabe ma é Reinu di Deus ki ta ben kaba ku injustisa pa tudu ténpu, nu pode atxa difísil imita Jizus óras ki nu ta tratadu ku injustisa. Odja kuzê ki kontise ku Jania, ki pesoas ta fazeba el diskriminason pamodi se kor di péli. El fla: “N fika xatiadu. Tanbê N xinti maguadu i N kreba pa kes algen kastigadu pamodi kuzê ki es faze-m. Dipôs N pensa na apoia un grupu ki ta fazeba manifestason kóntra rasismu i diskriminason. N ta atxaba ma si N fazeba kel-li kuzas ta midjoraba.” Má ku ténpu Jania da kónta ma el meste mudaba se manera di pensa. El fla: “N odja ma envês di N kunfiaba na Jeová, N kumesa ta kunfia na pesoas i ta dexa-s muda nha manera di pensa. Pur isu N disidi sai di kel grupu i ka involve más na kuzas sima kes-li.” Nu debe ten kuidadu pa nu ka dexa kalker raiba ki nu ta xinti pô-nu ta mete na asuntus di mundu. — Juan 15:19.

12. Pamodi ki nu debe toma kuidadu ku kuzê ki nu ta lé, odja ô obi?

¹² Kuzê ki pode djuda-nu kontrola raiba ki nu ta xinti pamodi injustisa? Nu debe toma kuidadu ku kuzê ki nu ta lé, odja ô obi. Alguns kuza ki pesoas ta poi na internet é pa poi pesoas ta fika xatiadu i pa reklama di govérnu. Txeu bês kes jornalista pode da ses opinion, envês di fla kuzê ki kontise. Sikrê kes informason é verdadi, si nu fika ta obi kes notísia, nu ta konsigi rezolve kel prubléma? Si nu pasa txeu ténpu ta odja ô ta obi kes notísia li, nu pode fika ku ansiadadi, tristi i xatiadu. (Pro. 24:10) Ô más piór inda, nu pode para di poi Reinu na primeru lugar na nos vida i skese ma é sô Reinu ki ta ben rezolve tudu injustisa.

13. Modi ki lé Bíblia tudu dia ta djuda-nu lida ku injustisa?

¹³ Si nu lé Bíblia tudu dia i nu midita na el, el pode djuda-nu lida ku injustisa. Un irman ki txoma Alia fika txeu xatiadu pamodi manera ki es ta trataba pesoas na undi ki el ta moraba. Ta parseba ma kes algen ki ta maltrataba otus éra kastigadu. El fla: “N tevi ki para i pergunta nha kabésa: ‘N ta kridita mê ma Jeová ta ben rezolve tudu kes prubléma li?’ Foi duránti kel ténpu li ki N lé Jó 34:22-29. Kes versiklu li lenbra-m ma Jeová ta odja tudu kuza. Sô El ki ta pode faze justisa di manera perfeitu i rezolve kuzas pa tudu ténpu.” Má timenti nu sta ta spera pa Reinu di Deus rezolve tudu prubléma, kuzê ki nu pode faze gósi?

KUZÊ KI NU PODE FAZE GÓSI PA NU LIDA KU INJUSTISA?

14. Kal ki é un di kes kuza ki nu pode faze gósi? (Kolosensis 3:10, 11)

¹⁴ Nu ka ta pode muda modi ki pesoas ta trata otus algen, má nu ta pode sforsa pa nu trata otus algen dretu. Sima dja nu odja, nu ta imita Jizus óras ki nu ta mostra amor. Kel amor li ta pô-nu ta trata otus algen ku ruspetu, sikrê es maltrata-nu. (Mat. 7:12; Rom. 12:17) Jeová ta fika kontenti óras ki nu ta trata tudu algen ku bondadi i di manera justu. — Lé Kolosensis 3:10, 11.

15. Modi ki nu pode djuda pesoas óras ki nu ta inxina-s kes verdadi di Bíblia?

¹⁵ Midjór manera di djuda pesoas é inxina-s kes verdadi di Bíblia. Pamodi ‘konhisimentu di Jeová’ pode muda un algen ki antis éra violéntu i pô-l ta bira un algen ki ta mostra bondadi, pas i amor. (Isa. 11:6, 7, 9) Antis di prende verdadi di Bíblia, un ómi ki txoma Jemal ta fazeba párti di un grupu rebéldi ki ta lutaba kóntra un partidu pulítiku pamodi el ta atxaba ma kel partidu éra injustu. El fla: “Bu ka ta pode muda pesoas aforsa. Ami ningen ka obriga-m muda, má kantu N prende kes verdadi di Bíblia, kel-li pô-m ta muda.” Kuzê ki Jemal prende pô-l ta para di luta. Pur isu, óras ki nu ta inxina pesoas kes verdadi di Bíblia, nu pode djuda-s para di faze kuzas ki ta prujudika otus algen.

16. Pamodi ki bu krê pâpia ku otus algen sobri Reinu di Deus?

¹⁶ Sima Jizus, nu ten txeu vontadi di fla pesoas ma Reinu di Deus ta ben rezolve injustisa pa tudu ténpu. Kel speransa li pode djuda kes algen ki sta tratadu mariadu. (Jer. 29:11) Stacy, ki dja nu papiaba di el antis, fla: “Prende verdadi djuda-m lida ku injustisa ki N staba ta odja i ta pasa pa el. Jeová ta uza mensajen di Bíblia pa konsola-nu.” Nu meste sta priparadu pa konsola otus algen ku kes promésa di Bíblia. Kantu más serteza bu ten ma kes verdadi ki nu pâpia di el na kel studu li é di kunfiansa, más ben priparadu bu ta sta pa pâpia di kel asuntu li ku jetu si papiadu di el na skóla ô na trabadju.b

17. Modi ki Jeová ta djuda-nu lida ku injustisa ki nu sta ta pasa pa el?

¹⁷ Nu sabe ma nu ta ben kontinua ta pasa pa injustisa timenti Satanás é “governanti di es mundu”. Má nu ka sta sen ajuda, nen sen speransa timenti nu sta ta spera pa Satanás ser distruídu. (Juan 12:31) Através di Bíblia, Jeová ta mostra-nu ka sô pamodi ki nu sta ta pasa pa injustisa, má tanbê modi ki el ta xinti ku kes injustisa ki nu ta pasa pa el. (Sal. 34:17-19) Através di se Fidju, Jeová ta inxina-nu kuzê ki nu debe faze óras ki nu ta pasa pa injustisa i modi ki ka ta dura se Reinu ta ben kaba ku injustisa pa tudu ténpu. (2 Ped. 3:13) Nton, nu kontinua ta prega kes notísias sábi di Reinu di Deus ku zelu i nu kontinua ta spera pa kel ténpu ki téra ta ben sta xeiu di ‘justisa i retidon’. — Isa. 9:7.