Mostra ruspetu pa otus algen

1. Pamodi ki tudu algen gosta pa es ruspetadu? (Provérbios 22:1)

BU GOSTA pa otus algen mostra-u ruspetu? Klaru ki sin. Tudu algen meste xinti ma es ta ruspetadu. Nu ta xinti sábi óras ki otus algen ta ruspeta-nu. É pur isu ki Bíblia ta fla ma ‘ser ruspetadu é midjór di ki prata i oru.’ — Lé Provérbios 22:1.

2-3. Pamodi ki alvês é ka fásil mostra ruspetu pa otus algen i kuzê ki nu sta ben prende na es studu?

² Alvês pode ser difísil mostra ruspetu pa otus algen. Un di kes razon é pamodi nu ta odja inperfeison di otus. Tanbê nu sta ta vive na un ténpu ki txeu algen ka ta mostra ruspetu pa kunpanheru. Má nu meste ser diferenti. Pamodi? Jeová krê pa nu onra ô mostra ruspetu pa “pesoas di tudu tipu.” — 1 Ped. 2:17.

³ Na es studu nu sta ben odja kuzê ki siginifika mostra ruspetu i modi ki nu pode mostra ruspetu (1) pa nos família, (2) pa nos irmons na kongregason i (3) pa kes algen ki ka ta sirbi Jeová. Nu ta ben odja prinsipalmenti modi ki nu pode mostra ruspetu pa otus algen mésmu óras ki é difísil faze kel-li.

KUZÊ KI KRÊ FLA RUSPETA OTUS ALGEN?

4. Kuzê ki krê fla ruspeta otus algen?

⁴ Pa bo kuzê ki siginifika ruspetu? Na alguns língua, kes palavra “ruspetu” i “ónra” sta ligadu ku kunpanheru. Modi? “Ruspetu” krê fla kuzê ki nu ta pensa di un algen. Óras ki nu ta ruspeta otus algen, nu ta atxa ma es merese nos atenson pamodi kualidadis ki es ten, ses autoridadi ô kuzas ki es konsigi faze. I “ónra”, krê fla modi ki nu ta trata un algen. Nu ta da otus algen ónra óras ki nu ta trata-s di un manera ki es ta xinti ma es ten valor. É klaru ki ónra di verdadi ten ki ben di korason. — Mat. 15:8.

5. Kuzê ki pode djuda-nu mostra ruspetu pa otus algen?

⁵ Jeová krê pa nu mostra ruspetu pa otus algen. Pur izénplu, el ta fla-nu ma nu debe ruspeta “autoridadi.” (Rom. 13:1, 7) Má alguns algen pode fla: “N gosta di mostra otus ruspetu, désdi ki es konporta dretu.” É dretu pensa di kel manera li? Dja ki nos é sérvus di Jeová, nu ta mostra otus algen ruspetu ka sô pamodi kuzê ki es ta faze, má pamodi Jeová krê pa nu faze kel-li i nu krê dexa-l kontenti. — Juz. 4:14; 1 Ped. 3:15.

6. Nu ta pode mostra ruspetu pa un algen ki ka ta trata-nu ku ruspetu? Splika. (Odja imajen na kapa.)

⁶ Alguns algen pode pergunta: ‘Nu ta pode mostra ruspetu pa un algen ki ka ta trata-nu ku ruspetu?’ Sin. Odja alguns izénplu. Rei Saul rabaxa se fidju Jonatan na frenti di otus algen. (1 Sam. 20:30-34) Má simé, ku ruspetu, Jonatan djuda se pai na géra ti dia ki el móre. (Ézu. 20:12; 2 Sam. 1:23) Eli, ki éra saserdóti prinsipal, akuza Ana di sta moku. (1 Sam. 1:12-14) Má, Ana pâpia ku el ku ruspetu, sikrê tudu algen na Israel sabia ma Eli fadja na kunpri se responsabilidadi di saserdóti prinsipal i di pai. (1 Sam. 1:15-18; 2:22-24) I kes ómi di Atenas insulta Paulu, i es txoma-l di “papiador.” (Atus 17:18) Má simé, Paulu pâpia ku es ku ruspetu. (Atus 17:22) Ta fika klaru ma nos amor pa Jeová i nos medu di dexa-l tristi, ta pô-nu ta mostra ruspetu pa otus algen ka sô óras ki é fásil, má tanbê óras ki é difísil faze kel-li. Nu ben odja kenha ki nu debe ruspeta i pamodi.

MOSTRA RUSPETU PA KES ALGEN DI BU FAMÍLIA

7. Pamodi ki pode ser difísil pa nos trata kes algen di nos família ku ruspetu?

⁷ Dizafiu. Nu ta pasa txeu ténpu ku nos família. Pur isu nu konxe ses kualidadi i ses inperfeison. Alguns pode ten un duénsa i pamodi kel-li é difísil kuida di es ô es pode sta ta sufri pamodi ansiadadi. I otus pode fla ô faze kuzas ki ta magua-nu. Envês di djuda pa kaza bira un lugar di diskansu i di pas, alguns algen ta trata kes algen di ses família sen ruspetu. I pamodi kel-li, es ka ta da dretu ku kunpanheru. Nu pode konpara família ku un korpu. Un duénsa pode ka dexa korpu di un algen trabadja dretu. Di mésmu manera, óras ki kes algen di un família ka ta ruspeta kunpanheru pode ser difísil pa es trabadja djuntu i unidu. Má sima txeu duénsa pode tratadu, kes algen di un família pode prende mostra ruspetu pa kunpanheru.

8. Pamodi ki é inportanti mostra ruspetu pa kes algen di nos família? (1 Timótiu 5:4, 8)

⁸ Pamodi ki nu debe mostra ruspetu? (Lé 1 Timótiu 5:4, 8.) Na se primeru karta pa Timótiu, Paulu mostra ma nu debe kuida di nisisidadi di nos família. El splika ma nu debe da nos família ónra, ka pamodi nos é obrigadu, má pamodi nu “ta adora Deus”. Kel-li krê fla ma nu ta da nos família ónra pamodi nu ta ama Jeová i pamodi kel-li ta faze párti di nos adorason pa el. É Jeová ki kria família. (Efé. 3:14, 15) Nton, óras ki nu ta da ónra pa nos família, nu sta ta da ónra pa Jeová ki é kel ki kria família. (1 Timótiu 5:4.) Nu ten un bon razon pa nu mostra ruspetu pa kes algen di nos família!

9. Modi ki un maridu i un mudjer pode mostra ruspetu pa kunpanheru? (Odja imajen.)

⁹ Modi ki nu ta mostra ruspetu? Un maridu ki ta da se mudjer ónra, ta mostra ma se mudjer ten txeu valor pa el óras ki es sta es sô i óras ki es sta ku otus algen. (Pro. 31:28; 1 Ped. 3:7) Nunka el ka ta sota-l, rabaxa-l ô pô-l ta xinti ma el ka ten valor. Adilson,a ki ta mora na Arjentina, fla: “Pamodi prubléma di saúdi ki nha mudjer ten, alvês el ta fla kuza ki ta magua-m. Óras ki kel-li ta kontise N ta tenta lenbra ma kuzê ki el ta fla nen sénpri é kuzê ki el ta xinti. I na kes momentu N ta lenbra di 1 Koríntius 13:5, ki ta mostra ma N debe pâpia ku ruspetu, envês di N pâpia ku raiba.” (Pro. 19:11) Un mudjer ta da se maridu ónra óras ki el ta pâpia dretu di el pa otus algen. (Efé. 5:33) El ka ta kritika-l di manera duru, el ka ta goza ku el, nen el ka ta insulta-l. El sabe ma si el faze kel-li, el ta distrui ses kazamentu. (Pro. 14:1) Un irman na Itália ki se maridu ta lida ku txeu ansiadadi, fla: “Alvês, N ta xinti ma nha maridu ta preokupa dimás. Antis, kes kuza ki N ta flaba i nha róstu ta mostraba falta di ruspetu pa el. Má N da kónta ma kantu más N pasa ténpu ku pesoas ki ta pâpia di otus ku ruspetu, más N ta xinti motivadu na ruspeta nha maridu.”

10. Modi ki jóvens pode mostra ma es ta ruspeta ses pai ku ses mai?

¹⁰ Jóvens, nhos obi ku kes régra ki nhos pai ku nhos mai ta da nhos. (Efé. 6:1-3) Pâpia ku bu pai i ku bu mai ku ruspetu. (Ézu. 21:17) Óras ki bu pai ku bu mai bira algen grandi, bu ta mostra-s ruspetu óras ki bu ta djuda-s ku kes kuza ki es meste. Faze bu midjór pa kuida di es. Odja izénplu di Maria, ki se pai é ka Tistimunha di Jeová. Kantu se pai fika duenti, fika difísil pa Maria kuida di el pamodi se pai ta trataba el di manera mariadu. El fla: “N ta oraba ka sô pa N ten ruspetu pa nha pai, má tanbê pa N mostra-l ruspetu. N da kónta ma si Jeová ta pidi-m pa N da nha pai ku nha mai ónra, nton el ta djuda-m faze kel-li. Ku ténpu N da kónta ma N meste trataba nha pai ku ruspetu sikrê el kontinua ta trata-m di manera mariadu.” Óras ki nu ta da nos família ónra sikrê es ta fadja ku nos, nu ta mostra ma nu ta ruspeta Jeová, ki é kel ki kria família.

MOSTRA RUSPETU PA IRMONS NA KONGREGASON

11. Pamodi ki pode ser difísil trata nos irmons ku ruspetu?

¹¹ Dizafiu. Nos irmons ta tenta faze ses midjór pa vive di akordu ku kel ki Bíblia ta inxina-nu. Má, alvês es pode trata-nu sen bondadi, julga-nu di manera injustu ô xatia-nu. Si un irmon da-nu razon pa nu “kexa kóntra” el, nu debe sforsa pa kontinua ta trata-l ku ruspetu. (Kol. 3:13) Kuzê ki pode djuda-nu faze kel-li?

12. Pamodi ki é inportanti mostra ruspetu pa nos irmons? (2 Pedru 2:9-12)

¹² Pamodi ki nu debe mostra ruspetu? (Lé 2 Pedru 2:9-12.) Pedru fla ma alguns di kes kriston na kongregason di primeru séklu staba ta pâpia sen ruspetu “di kes gloriozu”, kel-li krê fla kes ansion di kongregason. Modi ki kes anju fiel ki odja kel-li reaji? “Pamodi ruspetu ki es ten pa Jeová,” es ka fla palavras pa ofende kes algen. Imajina kel-li! Kes anju perfeitu ka fla palavras duru kóntra kes ómi orgulhozu. Envês di kel-li, es dexa Jeová julga kes ómi i kastiga-s. (Rom. 14:10-12; konpara ku Judas 9.) Nu pode prende un lison ku anjus. Si nu debe trata kes algen ki ta faze-nu opozison ku ruspetu, nu ten más razon inda pa mostra ruspetu pa nos irmons ku irmans, ki Jeová ta ama. Nu debe “ser primeru” na da ónra pa kunpanheru. (Rom. 12:10) Faze kel-li ta mostra ma nu ta ruspeta Jeová.

13-14. Modi ki nu pode mostra ruspetu pa irmons na kongregason? Da izénplus. (Odja imajens.)

¹³ Modi ki nu ta mostra ruspetu? Ansions, óras ki nhos ta inxina otus, sénpri nhos faze-l ku amor. (Flm. 8, 9) Si bu meste konsedja un algen, faze-l ku bondadi i ka na óra ki bu sta xatiadu. Irmans, nhos pode djuda txeu pa kongregason ser un lugar ki tudu algen ta xinti ruspetadu. Pur isu, ka nhos pâpia na vida di algen i ka nhos kalúnia otus. (Titu 2:3-5) Nos tudu nu pode mostra ma nu ta ruspeta kes ansion na kongregason óras ki nu ta kolabora ku es i nu ta mostra nos gratidon pa ses trabadju duru pa faze runion, pa orienta trabadju di pregason i pa djuda kes algen ki sta “bai pa mau kaminhu.” — Gál. 6:1; 1 Tim. 5:17.

¹⁴ Foi difísil pa un irman ki txoma Roza mostra ruspetu pa un ansion ki da-l konsedju. El fla: “N xinti ma el foi duru ku mi. Na kaza N pâpia di manera negativu sobri el. Enbóra N tenta ka mostra kel-li, N xinti ma el ka ta preokupaba ku mi i N ka obi se konsedju.” Kuzê ki djuda Roza? El fla: “Na nha leitura di Bíblia, N lé 1 Tesalonisensis 5:12, 13. Kantu N da kónta ma N ka staba ta mostra ruspetu pa kel irmon, nha konsénsia kumesa ta fika pizadu. N ora pa Jeová i N faze piskiza na nos publikason pa N atxa informasons ki pode djudaba mi muda nha atitudi. Kel-li djuda-m odja ma prubléma ka éra kel irmon, má éra nha orgulhu. Gósi N ta intende ma N meste ser umildi pa N pode mostra ruspetu pa otus algen. Inda N sta ta sforsa pa N mostra ruspetu pa otus algen. Má N ta xinti ma Jeová ta da valor pa sforsu ki N sta ta faze.”

MOSTRA RUSPETU PA KES ALGEN KI KA TA SIRBI JEOVÁ

15. Pamodi ki pode ser difísil mostra ruspetu pa kes algen ki ka ta sirbi Jeová?

¹⁵ Dizafiu. Txeu bês nu ta atxa pesoas na pregason ki ta parse ma ka ten interesi na kes verdadi di Bíblia. (Efé. 4:18) Alguns ta prifiri fika na iginoránsia pamodi kuzê ki es inxinadu désdi pikinoti. Nu pode ten un koléga di skóla ô un koléga di trabadju ki ka ta mostra bondadi ô nu pode ten un patron ô un profesor ki é difísil di lida ku el. Ku ténpu, nu pode perde ruspetu pa kes algen li i para di trata-s ku bondadi.

16. Pamodi ki é inportanti mostra ruspetu pa kes algen ki inda ka ta sirbi Jeová? (1 Pedru 2:12; 3:15)

¹⁶ Pamodi ki nu debe mostra ruspetu? Lenbra ma Jeová ta presta atenson na modi ki nu ta trata kes algen ki ka ta adora-l. Apóstlu Pedru lenbra kristons ma ses bon konportamentu pode poi otus ta “da Deus glória.” Pur isu, el fla-s pa es difende ses fé “ku brandura i ku txeu ruspetu.” (Lé 1 Pedru 2:12; 3:15.) Ka ta inporta si es sta ta difende ses fé frenti di autoridadi ô frenti di kalker otu algen, es debe faze-l ku ruspetu sima si es sta frenti di Deus. Alén di kel-li, Jeová ta odja i el ta obi kuzê ki nu ta fla i modi ki nu ta fla-l. Kel-li é un bon razon pa nu trata kes algen ki ka ta sirbi Jeová ku ruspetu!

17. Modi ki nu pode mostra ruspetu pa kes algen ki ka ta sirbi Jeová?

¹⁷ Modi ki nu ta mostra ruspetu. Óras ki nu sta na pregason, nunka nu ka krê poi otus algen ta xinti ma es é ménus inportanti di ki nos pamodi konhisimentu ki nu ten sobri Bíblia. Envês di kel-li, nu krê poi otus algen ta xinti ma es ten txeu valor pa Deus i ma es é midjór di ki nos. (Ageu 2:7; Flp. 2:3) Si un algen insulta-u pamodi kes kuza ki bu ta kridita na el, sforsa pa bu ka insulta-l tanbê. (1 Ped. 2:23) Si bu fla un algen un kuza ki bu ta rapende, pidi diskulpa lógu. Modi ki bu pode mostra ruspetu pa otus na trabadju? Ser un bon trabadjador i tenta odja kuzas bon na bus koléga di trabadju i na kes algen ki bu ta trabadja pa es. (Titu 2:9, 10) Óras ki bo é onéstu i bo é un bon trabadjador, bu pode agrada pesoas ô nau, má di serteza bu ta agrada Jeová. — Kol. 3:22, 23.

18. Pamodi ki é inportanti mostra ruspetu pa otus?

¹⁸ Nu ten txeu bons motivu pa nu mostra ruspetu pa otus. Nu odja ma óras ki nu ta mostra ruspetu pa nos família, nu sta ta da ónra pa nos xéfi di família, ki é Jeová. Di mésmu manera, óras ki nu ta mostra ruspetu pa nos irmons ku irmans, nu sta da ónra pa nos Pai na séu. I óras ki nu ta mostra ruspetu pa kes algen ki ka ta sirbi Jeová, nu sta abri kaminhu pa es da glória ô ónra pa nos Deus. Sikrê otus nunka ka mostra-nu ruspetu, é inportanti sénpri nu mostra-s ruspetu. Pamodi? Pamodi Jeová ta abensua-nu. El promete: “N ta onra kes ki ta onra-m.” — 1 Sam. 2:30.