Géra na Ukránia traze más falta di kumida na mundu

Na dia 19 di maiu di 2022, Konsedju di Suguransa di Nasons Unidu, obi más di 75 responsável na mundu, i es fla ma “falta di kumida na mundu pamodi koronavírus i mudansa di klima, sta ta fika kada bês más piór pamodi géra na Ukránia i na alguns lugar ku prigu di ten fómi.” Poku ténpu dipôs, un revistaa fla ma “pamodi géra, es mundu ki dja tene txeu prubléma, ta ben ten más algen ta pasa fómi.” Bíblia dja flaba ma ta ben tinha falta di kumida na nos ténpu, má tanbê el ta djuda-nu lida ku el.

Bíblia dja flaba ma ta tinha falta di kumida

• Jizus dja flaba: ‘Nason ta ben labanta kóntra nason i reinu kóntra reinu, ta ben ten falta di kumida’. — Mateus 24:7.

• Na livru di Apocalipse ta pâpia di kuatu ómi montadu na kabalu. Un di kes ómi na kabalu ta reprizenta géra. Se tras ta ben un otu ki ta reprizenta fómi. Kel-li krê fla un ténpu ki ta ten poku kumida i el ta ser karu dimás. ‘N odja un kabalu prétu. Kel ki staba montadu na el tinha un balansa na mô. N obi un kuza sima un vós, ta fla: “Un litru di trigu ta kusta vensimentu di un dia i três litru di sevada ta kusta vensimentu di un dia.”’ — Apocalipse 6:5, 6, Contemporary English Version.

Kes profesia di Bíblia sobri falta di kumida sta ta kunpri gósi, na ténpu ki Bíblia ta txoma ‘ténpu di fin’. (2 Timóteo 3:1) Pa bu sabe más sobri ‘ténpu di fin’ i kes kuatu ómi na kabalu di Apocalipse, odja vídiu Mundu muda désdi 1914 i lé artigu “Quem são os cavaleiros do Apocalipse?”

Modi ki Bíblia pode djuda-nu

• Na Bíblia nu ta atxa bons konsedju ki pode djuda-nu lida ku situasons difísil, sima présu di kumida ki sta subi ô ti mésmu falta di kumida. Odja alguns izénplu na artigu “Modi ki nu pode vive ku ménus dinheru?”

• Tanbê Bíblia ta da-nu speransa ma kuzas ta ben midjora. El ta promete un ténpu ki ‘ta ben ten kumida avontádi na Téra,’ i tudu algen ta ben ten txeu kuza di kume. (Salmo 72:16) Pa bu sabe más sobri speransa ki Bíblia ta da pa futuru i pamodi ki bu pode kunfia na el, lé artigu “Bu pode spéra un futuru midjór”.