Kuzê ki Bíblia ta fla sobri falta di kumida ki ten oji?

“Kaba ku fómi na mundu.” É kel-li ki kes líder di mundu krê faze pa es pode rezolve un di kes prubléma más grandi ki ten, ki é pa tudu algen na mundu ten kumida ki ta txiga-s.a Má algun dia fómi ta kaba na mundu? Kuzê ki Bíblia ta fla?

Bíblia dja flaba ma ta tinha falta di kumida

Bíblia dja flaba ma falta di kumida ta ben kontiseba na nos ténpu, un ténpu ki el ta txoma di “ténpu di fin”. (2 Timótiu 3:1) Deus é ka kulpadu pa falta di kumida ki ten oji, má el aviza-nu ma kel-li ta kontiseba. (Tiagu 1:13) Odja dôs profesia di Bíblia.

“Ta ben ten falta di kumida. . . na un lugar tras di kel otu.” (Mateus 24:7) Kel profesia di Bíblia li fla ma ta tinha fómi na txeu lugar. Un rilatóriu di kes organizason ki ta studa modi ki kumida ta produzidu i ta distribuidu fla si: “Situason na mundu sobri fómi, falta di kumida ki é bon pa saúdi ô kumida ki ta txiga pa tudu algen, sta ta piora.”b Ten senténas di milhon di algen, na dizénas di país, ki ka ta konsigi ten kel kumida ki es meste. Pur isu, txeu di es ka ta konsigi skapa.

“N odja un kabalu prétu. Kel ki staba montadu na el tinha un balansa na mô.” (Apokalipse 6:5) Na kel profesia li, kel kabalu i kel algen ki sta montadu na el, ta reprizenta fómi na ténpu di fin.c Kel balansa ki kel algen ki sta montadu na kabalu tene na mô ta sirbi pa peza kumida, asi pa tudu algen pode atxa un bokadinhu. Timenti kel ómi sta ta bai na kabalu, un vós ta fla ma présu di kumida ta ben subiba txeu i el ta aviza pesoas pa ka straga kes kumida ki más nu meste. (Apokalipse 6:6) Kel-li ta mostra klaru kel falta di kumida ki ten na mundu oji, undi ki bilhons di algen ka ta pode nen atxa ô kunpra kumida ki é bon pa saúdi.

Modi ki falta di kumida ta ben kaba

Spesialistas ta fla ma nos planéta ta produzi kumida más di ki kel ki tudu algen meste pa vive. Nton, kal ki é kes prubléma ki sta poi ta ten falta di kumida? I kuzê ki Bíblia ta fla ma Jeová,d ki é nos Kriador, ta ben faze pa rezolve kes prubléma li?

Prubléma: Govérnus ka ta pode kaba ku pobréza i kes injustisa ki ta poi pesoas ta fika ku fómi.

Soluson: Reinu di Deus, ki é un govérnu perfeitu, ta ben toma lugar di govérnus di ómi ki é inperfeitu. (Daniel 2:44; Mateus 6:10) Oji, txeu algen póbri ta luta pa ten kumida, má dibaxu di Reinu di Deus kel-li ta ben muda. Bíblia ta fla kel-li sobri Jizus Kristu, ki é Rei di Reinu di Deus: ‘El ta ben salva kes algen póbri ki ta sta ta txora ta pidi ajuda, i tanbê kes algen umildi i tudu kes ki ka ten algen pa djuda-s. . . . Ta ben ten kumida avontádi na téra, i riba monti ta ben ten un monti kumida.’ — Salmo 72:12, 16.

Prubléma: Géra ta traze distruison i ta prujudika ikonomia, i pamodi kel-li ta bira difísil pa pesoas ten kumida ki es meste.

Soluson: ‘[Jeová] ta kaba ku géra na Téra interu. El ta kebra arku i el ta kebra lansa padás-padás, karus di géra el ta kema-s na lumi.’ (Salmo 46:9) Deus ta ben distrui armas di géra i kes algen ki ta poi géra ta ten. Pur isu, tudu algen ta ben ten kumida di manera suguru i fásil. Bíblia ta promete: ‘Justu ta ben bira txeu, i ta ben ten txeu pas.’ — Salmo 72:7.

Prubléma: Mau ténpu i dizastris na naturéza ta kaba ku kodjéta i ta mata animal.

Soluson: Deus ta ben kontrola kes forsa di naturéza di téra i ta ben ten bon klima pa kumida pode da. Bíblia ta fla: ‘[Jeová] ta kalma tenporal di béntu; i óndias di mar ta fika kalmu. El ta bira dizértu na un lagoa xeiu di junku, i el ta bira téra séku na un fonti di agu. El ta poi kes algen ki ten fómi ta mora la. . . Es ta símia kanpu i es ta faze plantason di uva ki ta produzi txeu.’ — Salmo 107:29, 35-37.

Prubléma: Kes algen ki é ganansiozu i koruptu ta produzi kumida ki é ka suguru pa kume ô es ka ta dexa kumida txiga na kes algen ki meste.

Soluson: Reinu di Deus ta ben kaba ku tudu kes algen ki é dizonéstu i koruptu. (Salmo 37:10, 11; Isaías 61:8) Bíblia ta fla ma Jeová é ‘Kel ki ta faze justisa pa kes algen ki ta sploradu i Kel ki ta da pon pa kes ki sta pasa fómi.’ — Salmo 146:7.

Prubléma: Tudu anu ta perdedu ô ta stragadu un térsu di kumida na mundu.

Soluson: Dibaxu di Reinu di Deus kes ki é responsável pa dividi kumida ta bai uza-l dretu. Kantu Jizus staba na téra, el faze manera pa kumida ka straga. Pur izénplu, un bês el faze un milagri i el da más di 5 mil algen kumida. Dipôs el fla se disiplus: “Nhos djunta kes padás ki resta, asi pa nada ka straga.” — Juan 6:5-13.

Dja ki Reinu di Deus ta ben kaba ku kes prubléma ki ta poi fómi na mundu, tudu algen ta ben ten txeu kumida ki é bon pa saúdi. (Isaías 25:6) Pa sabe más sobri ki ténpu ki Reinu di Deus ta ben faze kel-li, djobe artigu “Ki ténpu ki Reinu di Deus ta ben governa Téra?”.