Armajedon ta kumesa na Israel? — Kuzê ki Bíblia ta fla?

Bíblia ta mostra ma Armajedon é ka un géra ki ta ben kontise na un lugar entri govérnus di ómi, má el é un géra ki ta ben kontise na mundu interu entri tudu kes govérnu di ómi i govérnu di Deus.

• “Mensajen ki ta ben di dimónis. . . ta bai pa kes rei di téra interu, pa djunta-s pa kel géra di kel grandi dia di Deus, kel Tudu-Poderozu. . . . Es djunta-s na kel lugar ki na ebraiku ta txomadu Armajedon.” — Apokalipse 16:14, 16.

Palavra “Armajedon” ta ben di palavra ebraiku Har Meghiddóhn, ki ta siginifika “Monti Mejidu”. Mejidu éra un sidadi di ténpu antigu ki ta fazeba párti di tiritóriu di Israel. Pamodi kel-li, alguns algen ta atxa ma Armajedon é un géra ki ta ben kontise na Israel. Má, ka ten ninhun lugar na Mejidu ô kalker otu lugar na Orienti Médiu ki ta da pa djunta tudu “kes rei di téra interu” i ses trópa.

Kes informason ki sta na livru di Apokalipse dadu através di “sinal”. (Apokalipse 1:1) Armajedon ka ta reprizenta un lugar na téra, má el é un géra na mundu interu ki tudu kes governanti ta djunta pa últimu bês pa luta kóntra govérnu di Deus. — Apokalipse 19:11-16, 19-21.