Pulítikus sta fla ma Armajedon sta kuazi ta kontise — Kuzê ki Bíblia ta fla?

Na sugunda-fera di palmanhan, dia 10 di otubru di 2022, Rúsia ataka alguns sidadi di Ukránia ku txeu mísil. Rúsia faze kel-li pa vinga pamodi dôs dia antis Ukránia distrui kel ponti inportanti, ki ta ligaba Krimeia ku Rúsia. Kes kuza li kontise poku ténpu dipôs ki alguns pulítiku aviza ma Armajedon sta kuazi ta kontise.

• “Nunka nu ka staba tantu pértu si di Armajedon désdi ténpu di [Prizidenti di Mérka, John] Kennedy i di krizi di mísil kubanu. . . N ta atxa ma é ka posível uza un arma nukliar sen poi Armajedon ta kontise.” — Prizidenti di Mérka, Joe Biden, 6 di otubru di 2022.

• “N ta kridita ma Armajedon sta kuazi ta kontise, i kel-li pode poi nos planéta interu na risku.” — Prizidenti di Ukránia, Volodymyr Zelensky, kantu ki es pergunta-l kal ki ta ser rezultadu di uza armas nukliar, BBC News, 8 di otubru di 2022.

Armajedon pode kontise si govérnus uza armas nukliar? Kuzê ki Bíblia ta fla?

Armas nukliar ta traze Armajedon?

Nau. Palavra “Armajedon” ta parse sô un bês na Bíblia na Apocalipse 16:16. El ka krê fla un géra entri nasons, má un géra entri Deus i kes ‘reis di tudu téra’. (Apocalipse 16:14) Deus ta ben uza géra di Armajedon pa kaba ku govérnus di ómi. — Daniel 2:44.

Pa bu sabe más sobri kuzê ki ta ben kontise ku téra na Armajedon, lé artigu Kuzê ki é géra di Armajedon?.

Téra i kes algen ki ta vive na el ta ben distruídu na un géra nukliar?

Nau. Sikrê govérnus di ómi ben uza armas nukliar na futuru, Deus ka ta ben dexa pa téra distruídu. Bíblia ta fla:

• ‘Téra ta fika pa tudu ténpu.’ — Eclesiastes 1:4.

• ‘Téra ta ben ser di kes algen justu i es ta ben vive na el pa tudu ténpu.’ — Salmo 37:29.

Má, profesias di Bíblia i kuzas ki sta ta kontise ta mostra ma nu sta ta txiga na un ténpu ki situason di mundu ta ben muda. (Mateus 24:3-7; 2 Timóteo 3:1-5) Pa bu sabe kuzê ki Bíblia ta fla sobri futuru, sprimenta studa Bíblia ku nos.