Kuzê ki Bíblia ta fla sobri géra nukliar?

Nos planéta ta kontinua na prigu di kontise un géra nukliar timenti govérnus di mundu sta ta omenta ses arma di géra nukliar. Nton, pesoas ta fika preokupadu pamodi kantu más arma nukliar ten, xansi di ten un géra nukliar é más txeu. Tanbê pesoas ten medu ma si uzadu un bonba nukliar pikinoti, kel-la pode kumesa un géra nukliar ki ta distruíba nos planéta. Sima un rilatóriua ta fla, nu sta ta vive ku “prigu di ten un géra nukliar kalker óra.”

Pode kontise mê un géra nukliar? Si kel-li kontise, nos planéta ta ben sobrivive? I modi ki nu pode lida ku preokupason ma pode kontise un géra nukliar? Kuzê ki Bíblia ta fla?

Na kel artigu li

Bíblia ta fla ma ta ben ten un géra nukliar?

Bíblia ka ta fla klaru ma ta ben ten un géra nukliar. Má dja el flaba di atitudis i di kuzas ki pode poi ta ten un géra nukliar.

Odja alguns versiklu di Bíblia ki ta pâpia di kuzas ki sta ta kontise oji:

Testus di Bíblia: Disiplus di Jizus pergunta-l: “Kal ki ta ben ser sinal di bu prezénsa i di fin di es mundu?” Jizus fla-s: “Nason ta ben labanta kóntra nason i reinu kóntra reinu”. — Mateus 24:3, 7.

Kuzas ki sta kontise na mundu: Kada bês sta ta ten más géra na kes país ki ten ô ki pode faze armas nukliar.

“Na es últimus anu, mundu sta ku más violénsia ki antis i sta ta ten kada bês más géras.” — Prujétu pa lokaliza Géras i Informasons sobri kuzas ki kontise (ACLED, sigla na inglês).

Testu di Bíblia: ‘Na ténpu di fin, rei di sul ta ben fika el ku rei di nórti ta pintxa kunpanheru’. — Daniel 11:40.

Kuzas ki sta kontise na mundu: Sima Bíblia dja flaba, nasons ki é inimigu di kunpanheru i kes ki ta apoia-s, sta ta pintxa ô ta konpiti pa ten más puder. Enbóra oji kes país ki ten más arma nukliar ka sta ta ataka kunpanheru diretamenti, es sta kontinua ta faze más arma nukliar i ku más kapasidadi.

“Na kes últimu 10 anu li, kes géra entri país bira más txeu i kel-li ta inklui kes géra ki kes país más fórti ba apoia kes país ku ménus puder.” — The Uppsala Conflict Data Program.

Testus di Bíblia: “Na ténpu di fin, situason ta fika konplikadu i difísil di aguenta. Pamodi ómis. . . ka ta krê konkorda ku otus, ta ser kaluniador, diskontroladu, runhu”. — 2 Timótiu 3:1-3.

Kuzas ki sta ta kontise na mundu: Sima txeu algen oji, governantis di mundu ka krê konkorda ku kunpanheru. Envês di es rezolve ses prubléma na pas, es ta tenta rezolve ses prubléma através di amiasa ô forsa. Kes kuza li ta omenta prigu di ten un géra nukliar.

“Dja ki es ka sta ta atxa un manera dretu pa trabadja ku kunpanheru, ta ben ten kada bês más géra.” — Samir Saran i Jane Harman, Fórum Económico Mundial.

Deus ta ben dexa un géra nukliar kontise?

Bíblia ka ta fla. El ta fla ma ‘kuzas ki ta da algen medu’ ta ben kontiseba na nos ténpu. (Lukas 21:11) Un izénplu di kes kuza ki kontise é kes bonba atómika ki lansadu duránti Sugundu Géra Mundial. Bíblia ta splika pamodi ki Deus ta dexa géra kontise. Pa sabe más, odja vídiu Pamodi ki Deus ta dexa maldadi ku sufrimentu kontise?.

Nos planéta ta ben sobrivive?

Sin. Sikrê ómis torna uza armas nukliar, Deus ka ta dexa pa situason fika di tal manera ki téra ta fika tudu distruídu. Bíblia ta fla ma nos planéta ka sô ta ben sobrivive, má tanbê ta ben ten pesoas ta vive na el pa tudu ténpu.

‘Téra ta fika pa tudu ténpu.’ — Eclesiastes 1:4.

‘Deus, Kel ki forma téra, ka kria-l pa nada, má el faze-l pa moradu na el’. — Isaías 45:18.

Alguns algen ta imajina ma na futuru sô alguns algen ta ben vive na téra, ki ta ben sta poluídu pamodi géra nukliar. Má Bíblia ta fla ma kalker stragu ki géra faze na téra ta ben konpodu.

‘Dizértu i téra séku ta ben fika kontenti, kes lugar planu na dizértu ta ben grita ku txeu alegria i es ta ben da flor sima asafron.’ — Isaías 35:1.

Pesoas sta trabadja tudu djuntu i es sta vive sábi na Paraízu. — Deus krê pa nu vive filís na un téra bunitu

Nos Kriador faze téra ku kapasidadi di rekupera di kalker stragu. I tanbê Deus ta ben uza se puder pa rekupera téra. Téra ta ben ser un kaza sábi i nu ta ben vive na el pa tudu ténpu. — Salmo 37:11, 29; Apokalipse 21:5.

Modi ki nu pode lida ku preokupason ma pode kontise un géra nukliar?

Alguns algen ta fika preokupadu dimás pamodi es ten medu pa kontise un géra nukliar i kes mau rezultadu ki pode ten pamodi kel-li. Kes promésa di Bíblia i kes konsedju ki el ta da pode djuda kes algen ki ten medu fika ménus preokupadu. Modi?

Bíblia ta pâpia di un futuru sábi pa téra i pa kes algen ki ta vive na el. Prende sobri kel speransa li pode ser sima “un ánkura pa nos vida”, i kel-li ta pô-nu ta fika ménus preokupadu. (Ebreus 6:19, nóta di rodapé) Tanbê nu pode fika ménus preokupadu si nu vive un dia di kada bês, sen konsentra dimás na kuzê ki pode ben kontise na futuru. Sima Jizus fla: “Kada dia ten ses prubléma.” — Mateus 6:34.

É inportanti nu kuida di nos saúdi mental i di nos sentimentus. Nu pode faze kel-li óras ki nu ta ivita lé, odja ô obi txeu informason ki ta dexa-nu preokupadu, sima kes dibati, previzon i opinion sobri kes últimu arma nukliar ki sta ta fazedu. Kel-li ka krê fla ma nu sta ta iginora kuzê ki sta ta kontise. Envês di kel-li, nu sta ta faze kel ki nu ta pode pa nu ka fika preokupadu dimás ku kuzas ki nu ka ta pode kontrola i ki talvês nunka ka ta ben kontise.

‘Preokupason dimás é un karga pa korason di un ómi, má un palavra sábi ta poi korason fika kontenti.’ — Provérbios 12:25.

Ka bu fika ta odja sô kes notísia kasábi. Envês di kel-li, konsentra na kes kuza puzitivu di bu vida.

“Pa kel Deus ki ta da speransa intxi nhos di tudu alegria i pas pamodi nhos ta kunfia na el”. — Romanus 15:13.

Dizenhus: Un ómi sta ta odja ku kunfiansa pa futuru. 1. Tras di el sta ku géra i kel-li ta inklui un avion di géra, mísil nukliar i un núven di fumu. 2. Pa se frenti sta un téra linpu i ku pas, ku rótxa, vali verdi, un riu i pasus. — Bíblia ta da-nu serteza di un futuru midjór

Prende más sobri kes promésa di Deus pode da-u speransa, alegria i pas déntu bo.

Bíblia ta fla ma Armajedon é un géra nukliar?

Alguns algen ta atxa ma Armajedon é un géra nukliar. Di serteza es ta pensa na kes kuza mariadu ki un géra sima kel-li pode traze.

Bíblia ta uza palavra “Armajedon” pa pâpia di un géra entri “kes rei di téra interu,” ô kes govérnu di ómi ku Deus.b(Apokalipse 16:14, 16) Armajedon é ka un géra nukliar ki ta kaba ku tudu algen i ku tudu kuza. Envês di kel-li, na Armajedon Deus ta ben distrui sô kes algen mau i kel-li ta ben traze pas di verdadi i suguransa na mundu. — Salmo 37:9, 10; Isaías 32:17, 18; Mateus 6:10.

Kal ki é soluson ki Bíblia ta da pa kaba ku géra?

‘El ta kaba ku géra na téra interu. El ta kebra arku i el ta kaba ku lansa, el ta kema kes karu di géra ku lumi.’ — Salmo 46:9.

Jeovác Deus ta ben uza se puder pa kaba ku géras entri nason i pa kaba ku tudu kes arma di géra. Pa faze kel-li, el ta ben uza se Reinu, ki é un govérnu na séu, pa ben governa téra interu. — Daniel 2:44.

Reinu di Deus ta ben inxina pesoas modi ki es ta vive na pas i ku union. Dja ki ta ben ten sô un govérnu ki ta ben governa téra interu, ka ta ben ten dizentendimentu entri govérnus, i pesoas ka ta ben prende géra más! (Miqueias 4:1-3) Kal ki ta ben ser rezultadu? ‘Kada un di es ta ben xinta baxu di se pé di uva i baxu di se pé di figu, i ka ta ten ningen pa pô-s ta xinti medu’. — Miqueias 4:4.

a Boletim dos Cientistas Atômicos.

b Odja artigu “Kuzê ki é géra di Armajedon?”.

c Jeová é nómi di Deus. (Salmo 83:18) Odja artigu “Ken ki é Jeová?”.

Livru di Apocalipse ta pâpia di un géra nukliar?

Alguns algen ta atxa ma livru di Apokalipse ta pâpia di un géra nukliar ki ta kaba ku téra interu. (Apokalipse 6:14; 8:7-12; 16:1-21) Pur izénplu, el ta fla ma “lumi ta dixi di séu pa téra”. (Apokalipse 13:11-13) Tistimunhas di Jeová ta intende ma kel-li ka sta pâpia di un géra nukliar ki ta kontise na téra interu, má é kes bonba atómika ki uzadu duránti Sugundu Géra Mundial.

Enbóra livru di Apokalipse ta pâpia di kes géra nukliar, se obijetivu é ka pâpia tin-tin pa tin-tin di kes kuza mariadu ki ta kontise. Óras ki bu ta lé livru di Apokalipse, lenbra:

Kel livru ta uza txeu sinal, ô sinblu, ki ta uzadu sima un konparason. — Apokalipse 1:1.
Obijetivu di kel livru é ka poi algen medu. Má se mensajen ta da alegria pa kes algen ki ta intende-l i aplika-l. — Apokalipse 1:3.

Pa más informason, odja artigu “Kuzê ki siginifika livru di Apokalipse?”.