Dja gastadu txeu dinheru na géra — Kal ki é otus prujuis?

Géra ta traze txeu prujuis.

• “Na anu pasadu, govérnus na mundu interu gasta 2,2 trilhon di dóla na txeu géra. Konparadu ku otus anu, kel-li é dinheru más txeu ki dja es gasta na géra.” — The Washington Post, 13 di febreru di 2024.

Kel prujuis li foi mutu más di ki dinheru. Pur izénplu, nu ben odja sobri kel géra na Ukránia:

• Trópas. Alguns spesialista ta kridita ma désdi 2022, kantu kel géra li kumesa, kuazi 500 mil trópa dja matadu ô dja panha pankada.

• Otus algen. Di akordu ku Nasons Unidu, más di 28 mil algen dja móre ô dja panha pankada. Má, un funsionáriu inportanti di Nasons Unidu, fla: “Nu ka ta konsigi fla sértu kantu algen ki dja fika prujudikadu pamodi kel géra li.”a

Kes algen ki sta ta sufri na mundu interu pamodi géra é txeu dimás.

• 114 milhon. Kel-li é nunbru di pesoas na mundu interu ki ti setenbru di 2023, tevi ki bandona ses kaza pamodi géra i violénsia.

• 783 milhon. Kel-li é nunbru di pesoas ki sta ta sufri pa txeu ténpu pamodi fómi. “Géra inda é un di kes kuza ki más ta traze fómi. Entri kes algen ki sta pasa fómi na mundu, 70 pursentu ta vive na kes lugar undi ten géra i violénsia.” — Programa Alimentar Mundial.

Géra algun dia ta ben kaba? Nu pode ten speransa ma ta ben ten pas? Un dia ningen más ka ta ben ser póbri, i tudu algen ta ben ten kel ki es meste pa kume? Kuzê ki Bíblia ta fla?

Un ténpu di géra

Bíblia dja flaba ma ta ben tinha géra na mundu interu. El pâpia di un ómi ki staba montadu na kabalu pa pâpia di géras.

• “I sai un otu kabalu ki éra kor di lumi. Kel ki staba montadu na el dadu autoridadi pa tra pas di téra, asi pa pesoas mataba kunpanheru, i el dadu un spada grandi.” — Apokalipse 6:4.

Dipôs di kel ómi ki staba montadu na kabalu, ki ta reprizenta géra, sai más dôs ómi montadu na kabalu, ki ta reprizenta fómi ku mórti pamodi duénsa i otus kuza. (Apokalipse 6:5-8) Pa bu prende más sobri kel profesia di Bíblia li i pamodi ki nu pode ten serteza ma el sta ta kunpri na nos ténpu, lé artigu “Quem são os cavaleiros do Apocalipse? ”.

Un ténpu di pas

Ka ta dura, rikéza di es mundu ka ta ben uzadu pa géra más. Má, kel-li ka ta ben kontise pamodi sforsu ki ómis ta faze. Bíblia ta fla:

• Deus ta ben ‘kaba ku géra na téra interu.’ — Salmo 46:9.

• Deus ta ben kaba ku tudu prubléma ki géra ta traze. “El ta ben linpa tudu lágua di ses odju, i ka ta ben ten más mórti, nen tristéza, nen txoru nen dór. Kes kuza ki tinha antis ka ta ben ten más.” — Apokalipse 21:4.

• Deus ta ben garanti ma tudu algen ta ben vive na pas. ‘Nha povu ta ben mora na un lugar ki ten pas, na kazas suguru i na lugaris di diskansu trankuilu.’ — Isaías 32:18.

Di akordu ku profesias di Bíblia géra i otus kuza ki nu sta ta odja ta kontise oji ta mostra ma kel ténpu di pas sta kuazi ta txiga.

Modi ki Deus ta ben traze kel pas li? El ta ben faze kel-li através di se govérnu, ô se Reinu ki sta na séu. (Mateus 6:10) Pa bu prende más sobri kuzê ki é kel Reinu li i kuzê ki el pode faze pa bo, odja vídiu Kuzê ki é Reinu di Deus?.