Ki ténpu ki géra ta kaba? — Kuzê ki Bíblia ta fla?

Dipôs ki Iran ataka Israel na sábadu, dia 13 di abril di 2024, António Guterres, ki é sekretáriu jeral di Nasons Unidu, fla: “Gósi é ténpu di nu faze algun kuza pa bira es situason ménus difísil i ménus prigozu. Gósi é ténpu di nu ten más kuidadu ku kuzê ki nu ta faze.”

Kel géra ki sta kontise na Orienti Médiu é sô un izénplu di kuzê ki sta kontise na mundu interu.

“Gósi sta ta kontise más géra na mundu, désdi Sugundu Géra Mundial. Kel-li sta ta afeta 2 bilhon di algen, ki é un na kada kuatu algen.” — Konsedju di Suguransa di Nasons Unidu, 26 di janeru di 2023.

Kes lugar ki sta na géra ta inklui Israel, Gaza, Síria, Azarbeijon, Ukránia, Sudon, Itiópia, Níjer, Mianmar i Aiti.a

Ki ténpu ki géra ta kaba? Govérnus di mundu pode traze pas? Kuzê ki Bíblia ta fla?

Un mundu na géra

Kes géra ki sta ta kontise oji ta mostra ma ka ta dura tudu géra na mundu ta ben kaba. Kes géra li sta ta kunpri un profesia di Bíblia sobri kel ténpu ki nu sta ta vive gósi. Bíblia ta txoma kel ténpu ki nu sta ta vive gósi di “fin di es mundu”. — Mateus 24:3.

• “Nhos ta ben obi ta papiadu di géra i di notísias di géra. . . . Nason ta ben labanta kóntra nason i reinu kóntra reinu”. — Mateus 24:6, 7.

Pa bu odja modi ki profesias di Bíblia sobri géra sta ta kunpri oji, lé artigu “Kal ki é sinal di ‘ténpu di fin’?”.

Un géra ki ta ben kaba ku tudu kes otu géra

Bíblia dja flaba ma kes géra na mundu ta ben kaba. Modi ki kel-li ta kontise? É ka ómis ki ta konsigi kaba ku géra, má Deus ta ben faze kel-li na Armajedon, ki é “kel géra di kel grandi dia di Deus, kel Tudu-Poderozu.” (Apokalipse 16:14, 16) Dipôs di kel-li, Deus ta ben kunpri se promésa, asi pa tudu algen na téra pode ten pas pa tudu ténpu. — Salmo 37:10, 11, 29.

Pa bu prende más sobri kel géra li, ki Deus ta ben uza pa kaba ku tudu kes otu géra, lé artigu “Kuzê ki é géra di Armajedon?”.