Kuzê ki siginifika ser un kriston? — Kuzê ki Bíblia ta fla?

Oji txeu algen na mundu interu ta fla ku orgulhu ma es é kriston, má es ta faze kuzas ki ta prujudika otus algen. Alguns algen ta pensa sô na ses kabésa, es é dizonéstu ô es é mau. Otus algen é ka fiel pa ses maridu ô ses mudjer. Ses konportamentu ta poi alguns algen ta faze kel pergunta li: ‘Kuzê ki siginifika ser un kriston?’

Kuzê ki siginifika ser un kriston?

É fásil pa un algen fla ma el é kriston. Má ten txeu kuza involvidu. Di akordu ku Bíblia, un kriston é un algen ki é disiplu di Jizus Kristu. (Atus 11:26) É própi Jizus ki fla: “Si nhos kontinua na nhas palavra, nhos é própi nhas disiplu”. (Juan 8:31) É klaru ki, ninhun di nos nu ka ta pode obi ku palavras di Jizus di manera perfeitu. Má un kriston ta sforsa pa sigi kes kuza ki Jizus inxina i el ta mostra kel-li na kuzas ki el ta faze kada dia. Odja alguns izénplu.

Kristons ta mostra amor sen finjimentu

Kuzê ki Jizus fla: “N ta da nhos un mandamentu novu, pa nhos ama kunpanheru. Sima N ama nhos, nhos ama kunpanheru tanbê. Tudu algen ta fika ta sabe ma nhos é nhas disiplu, si nhos ten amor pa kunpanheru.” — Juan 13:34, 35.

Kuzê ki Jizus faze: Jizus mostra amor sen finjimentu pa tudu algen, ka ta inporta puzison ki es tinha na sosiadadi, kantu dinheru ki es tinha ô di undi ki es éra. El kura kes algen ki staba duenti, el da kumida pa kes algen ki staba ku fómi i ti mésmu el da se vida pa otus algen. — Mateus 14:14-21; 20:28.

Kuzê ki kristons ta faze: Kristons ta mostra amor sen finjimentu óras ki es ta dividi kuzê ki es ten ku otus algen, es ka ta faze diferénsa di algen i es ta púrdua otus. Es ta djuda kes algen ki sta meste di ajuda i es sta sénpri prontu pa faze sakrifisiu pa otus algen. — 1 Juan 3:16.

Kristons é onéstu

Kuzê ki Jizus fla: “Ami é. . . verdadi”. — Juan 14:6.

Kuzê ki Jizus faze: Jizus éra onéstu na tudu kuza ki el ta flaba i ki el ta fazeba. Nunka el ka tenta ingana otus algen pa pô-s ta faze kuzê ki el kreba i nen el ka ta poba es ta kridita na algun kuza ki ka éra verdadi. Tudu algen sabia ma el éra onéstu sikrê kel-li ta poba el na prubléma. — Mateus 22:16; 26:63-67.

Kuzê ki kristons ta faze: Kristons ka ta konta mintira. Es ta paga ses inpostu, es ka ta furta i es ta faze ses trabadju ku onestidadi. (Romanus 13:5-7; Efézius 4:28) Es ka ta ingana otus algen, es ka ta kôpia na testi i nen es ka ta falsifika dukumentu ô otus informason. — Ebreus 13:18.

Kristons ta mostra bondadi

Kuzê ki Jizus fla: “Nhos ben pa mi, nhos tudu ki sta trabadja duru i ki sta kansadu, i N ta anima nhos. Nhos poi nha kanga riba nhos i nhos prende ku mi, pamodi ami é mansu i umildi di korason, i nhos ta xinti aliviadu. Pamodi nha kanga é suavi i nha karga é lébi.” — Mateus 11:28-30.

Kuzê ki Jizus faze: Jizus ta dexaba pesoas avontádi pa txiga na el i el ta trataba es ku bondadi. El ta resebeba kriansas, el ta konsolaba kes algen ki staba dizanimadu i el ta trataba otus algen ku ruspetu. — Markus 10:13-15; Lukas 9:11.

Kuzê ki kristons ta faze: Kristons ta pâpia ku bondadi ku otus algen, es é ka mal idukadu i nen es ka ta uza palavras ki ta ofende. (Efézius 4:29, 31, 32) Es ta preokupa ku otus algen i es ta djobe manera di djuda-s. — Gálatas 6:10.

Kristons é fiel pa ses maridu ô ses mudjer

Kuze ki Jizus fla: “Kel ki Deus djunta na mésmu kanga, ómi ka debe sipara.” — Markus 10:9.

Kuzê ki Jizus faze: Enbóra Jizus nunka ka kaza, el insentiva maridu ku mudjer pa ser fiel pa kunpanheru. (Mateus 19:9) El aviza sobri alguns kuza ki pode kaba ku un kazamentu. — Mateus 5:28.

Kuzê ki kristons ta faze: Kristons ta ivita faze kuzas ki ta mostra falta di ruspetu pa kazamentu. (Ebreus 13:4) Maridu ku mudjer ta trata kunpanheru ku amor i ruspetu. — Efézius 5:28, 33.