Kuzê ki N ta faze si N sta visiadu na pornografia?
Kuzê ki bu pode faze
Ntende kuzê ki é pornografia. Pornografia é un manera di mostra falta di ruspetu pa un kuza ki Deus krê pa nu da valor. Si nu pensa asi sobri pornografia, kel-li, ta djuda-nu ‘ôdia kel ki é mau.’ — Salmo 97:10.
Pensa na kuzê ki pode kontise. Kes algen ki ta faze pornografia ka ta ruspetadu. Tanbê pornografia ta rabaxa kes algen ki ta odja-l. É pur isu ki Bíblia ta fla: ‘Algen prudenti ta odja prigu i el ta sukundi.’ — Provérbios 22:3.
Faze un promésa. Un ómi fiel ki txomaba Jó fla: ‘N faze un promésa sériu pa N ka odja pa un minina ku dizeju.’ (Jó 31:1, Today’s English Version) Odja alguns ‘promésa sériu’ ki bu pode faze:
N ka ta uza internet óras ki N sta mi sô.
N ta fitxa lógu kalker site ô janela na internet ki ta mostra kuzas di séksu.
N ta pâpia ku un amigu ki ten más spiriénsa si N torna odja pornografia.
Pornografia ta vísia algen — kantu más bu odja, más difísil ta fika di larga-l
Faze orason. Un skritor di Salmo pidi Jeová: ‘Ka bu dexa nhas odju odja kuzas ki ka ten valor.’ (Salmo 119:37) Deus krê pa bu ser filís i si bu faze orason el ta djuda-u faze kel ki é dretu! — Filipenses 4:13.
Pâpia ku algen. Pâpia ku un algen ki bu ta kúnfia na el, pode djuda-u larga es vísiu. — Provérbios 17:17.
Lenbra: Sénpri ki bu ivita odja pornografia, bu sta ta ten un grandi vitória. Pâpia ku Jeová sobri es vitória i agradise-l pa forsa ki el da-u. Óras ki bu ivita odja pornografia, Jeová ta fika txeu kontenti ku bo! — Provérbios 27:11.