PERGUNTAS KI JÓVENS TA FAZE
Kuzê ki N ta faze pa N ka fika kansadu dimás?
Bu ta atxa ma bo é un algen ki sta kuazi ta fika kansadu dimás? Si bu ta atxa ma sin, kel artigu li pode djuda-u!
Pamodi ki kel-li ta kontise
Txeu kuza pa faze. Un jóven ki txoma Julie fla: “Na tudu ária di vida, nu ta fladu pa nu kontinua ta faze kada bês más txeu i más midjór, pa nu poi métas más grandi i pa nu alkansa kes midjór rezultadu. É ka fásil aguenta kel preson li ki ta sta tudu óra riba di algen!”
Tekinolojia. Pamodi telemóvel, tablet i otus aparelhu, algen pode txoma-nu ô manda-nu mensaji kalker óra duránti dia. Kel-li pode pô-nu ta fika stresadu i nu pode kaba pa fika kansadu dimás.
Durmi poku. Un jóven ki txoma Miranda fla: “Txeu jóven ta labanta sédu i es ta durmi tardi asi pa es konsigi da kónta di skóla, trabadju i diverson. Es ta kontinua ta faze kel-li un bês bai sikrê kel-li ta prujudika-s.” Kel-li pode poi algen ta fika kansadu dimás.
Pamodi ki kel-li é inportanti
Bíblia ta fla ma é inportanti nu ser trabadjador. (Provérbios 6:6-8; Romanos 12:11) Má el ka ta insentiva-nu trabadja txeu dimás ti ki nu ta prujudika otus kuza na nos vida sima nos saúdi.
“Un bês, N staba txeu konsentradu ta faze monti kuza ki N tinha pa faze ki N ka kume nada duránti kel dia interu. N prende ma é ka bon N seta faze tudu kuza ki N pididu si kel-la ta prujudika-m.” — Ashley.
Bíblia ten razon óras ki el ta fla: ‘Un katxor bibu é midjór di ki un lion mortu.’ (Eclesiastes 9:4) Óras ki bu ta sforsa txeu, talvês duránti un ténpu bu pode xinti ma bu tene forsa sima kel di un lion. Má bu pode kaba ku bu saúdi si bu faze txeu kuza ti ki bu fika kansadu dimás.
Kuzê ki bu pode faze
Prende fla nau. Bíblia ta fla: ‘Sabedoria sta ku kes algen ki é modéstu.’ (Provérbios 11:2) Kes algen ki é umildi, ta rekonhese ma es ten limiti i es ka ta tenta faze más di ki kel ki es ta pode.
“Un algen ki ka sabe fla nau i ki ta tenta faze tudu kuza ki el pididu, ten grandi xansi di fika kansadu dimás. Un algen ki é si ka ta rekonhese ma el ten limiti. I sédu ô tardi, el ta fika kansadu dimás.” — Jordan.
Diskansa dretu. Bíblia ta fla: ‘É midjór ten un mô xeiu di diskansu di ki ten dôs mô xeiu di trabadju duru i ta kóre tras di béntu.’ (Eclesiastes 4:6) Alguns algen ta fla ma durmi é sima “kumida pa menti”, má txeu jóven ka ta durmi di 8 ti 10 óra pa noti sima es devia.
“Antis, kantu N ta tinha txeu kuza pa faze, N ka ta durmiba sima N devia. Má alvês si N durmi sô un óra más sédu, kel-la ta txiga-m pa N sta más animadu i pa N konsigi faze más kuza kel otu dia.” — Brooklyn.
Ser organizadu. Bíblia ta fla: ‘Planus di un algen ki ta sforsa, di sertéza ta ten bons rezultadu.’ (Provérbios 21:5) Prende uza bu ténpu dretu i sabe kantu kuza ki bu ta pode faze, é un kapasidadi ki ta djuda-u pa réstu di bu vida.
“Si bu faze un prugrama bu ta ivita fika kansadu dimás. Óras ki bu ten un prugrama, é más fásil bu odja undi ki bu pode faze algun mudansa pa bu ka fika kansadu dimás.” — Vanessa.