PERGUNTAS KI JÓVENS TA FAZE
Modi ki N pode uza nha ténpu dretu?
Pamodi ki bu debe uza bu ténpu dretu?
Ténpu é sima dinheru. Si bu ka uza-l dretu, óras ki bu ta ben meste-l bu ka ta ten. Má si bu uza bu ténpu dretu, inda ta sobra pa bu faze alguns kuza ki bu gosta!
Prinsípiu di Bíblia: ‘Kel ki é prigisozu ta dizeja txeu má nada el ka ten, má ken ki é trabadjador ta ten tudu kel ki el meste.’ – Provérbios 13:4.
Konkluzon: Si bu uza bu ténpu dretu, bu ta ten más liberdadi, envês di ménus liberdadi.
Sabe uza ténpu dretu é un kapasidadi ki ta ben djuda-u óras ki bu bira más grandi. Ti el pode djuda-u ka perde bu trabadju. Si bu tinha un nogósiu, bu ta dexaba un npregadu ki sénpri ta txiga atrazadu, kontinua ta trabadja ku bo?
Prinsípiu di Bíblia: ‘Ken ki é fiel na poku tanbê el é fiel na txeu i ken ki é injustu na poku tanbê el é injustu na txeu.’ — Lucas 16:10.
Konkluzon: Manera ki bu ta uza bu ténpu ta mostra ki tipu di algen ki bo é.
É verdadi ma é ka fásil uza ténpu dretu. Nu ben odja sô alguns dizafiu.
Dizafiu 1: Amigus
“Óras ki nhas amigu ta pidi-m pa N sai ku es, kuazi sénpri N ta bai, mésmu si N ka tene ténpu. N ta pensa: ‘Dipôs, óras ki N txiga kaza N ta konsigi faze faxi kes kuza ki N ten pa faze’. Má nen sénpri kuzas ka ta bai sima N ta pensa i alguns bês N panha mau pamodi kel-la.” — Cynthia.
Dizafiu 2: Kuzas ki ta distrai-nu
“Tilivizon ta tenta algen. É ka fásil para di odja kes prugrama ku filmi.” — Ivy.
“N pode pasa un monti di óra ta mexe na nha tablet. N ta xinti kulpadu óras ki N ta para sô pamodi karga di tablet seka.” — Marie.
Dizafiu 3: Ábitu di dexa tudu pa dipôs
“N ta dexa nhas trabadju di skóla i otus kuza inportanti pa N faze dipôs. N ta ba ta perde ténpu ku kuzas ki é ka inportanti ti ki N ta kaba pa fika sen faze nhas trabadju. Kel-li é ka uza ténpu dretu.” — Beth.
Si bu uza bu ténpu dretu, bu ta ten más liberdadi, envês di ménus liberdadi
Kuzê ki bu pode faze
Faze un lista di kuzas ki bu tene pa faze. Pur izénplu, bu pode poi bus trabadju di skóla i trabadjus ki bu ta faze pa djuda na kaza. Toma nóta di kantu ténpu ki bu meste pa simana pa faze kada kuza di bu lista.
Prinsípiu di Bíblia: ‘Nhos konfirma kuzê ki é más inportanti’. — Filipenses 1:10.
Faze un lista di kuzas ki bu gosta di faze na bu ténpu livri. Bu pode poi na kel lista li kuzas sima uza redi sosial i odja tilivizon. Skrebe tanbê kantu óra ki bu ta gasta pa simana ku kada un di kes kuza.
Prinsípiu di Bíblia: ‘Nhos kontinua ta anda ku sabedoria, ta uza nhos ténpu di midjór manera posível.’ — Colossenses 4:5.
Faze un planu. Torna djobe pa kes dôs lista ki bu faze. Bu tra ténpu ki ta txiga pa kes kuza más inportanti? Bu meste pasa ménus ténpu ta divirti i más ténpu ku kes kuza más inportanti?
Ideia: Faze un lista di kuzas ki bu tene pa faze tudu dia. Kada bês ki bu tirmina di faze un kuza, poi un marka na se frenti.
Prinsípiu di Bíblia: ‘Planus di un algen ki ta sforsa, di sertéza ta ten bons rezultadu’. — Provérbios 21:5.
Sigi kel planu. É verdadi ma alvês bu ten ki fla ‘nau’ pa un konviti di un amigu pa bu konsigi faze tudu kel ki bu tene pa faze. Má asi bu ta da kónta ma bu ta fika ku más ténpu livri pa bu uza sima bu krê i bu ta xinti más sábi.
Prinsípiu di Bíblia: ‘Nhos ser trabadjador, ka prigisozus.’ — Romanos 12:11.
Rekonpensa bu kabésa, má na ténpu sértu. Un jóven ki txoma Tara fla: “Alvês, N ta kaba di faze dôs kuza di nha lista, nton N ta pensa: ‘Ok, N pode odja uns 15 minutu di tilivizon i dipôs N ta kontinua ta trabadja.’ Bon, 15 minutu ta bira 30 minutu i kes 30 minutu ta bira un óra i antis di N da kónta, dja N perde uns dôs óra ta odja tilivizon!”
Kal ki é soluson? Odja diverson sima un rekonpensa ki bu merese sô dipôs ki bu konsigi tirmina di faze bus trabadju.
Prinsípiu di Bíblia: ‘Ka ten nada midjór pa un ómi di ki goza di se trabadju duru.’ — Eclesiastes 2:24.