Provérbios 3:5, 6 — ‘Ka bu kunfia na bu própi ntendimentu’

‘Kunfia na Jeová di tudu bu korason; ka bu kunfia na bu própi ntendimentu. Lenbra di el na tudu bus kaminhu, i el ta bira-u bus kaminhu rétu.’ — Provérbios 3:5, 6, Tradução do Novo Mundo.

Kuzê ki Provérbios 3:5, 6 ta siginifika

Nu debe buska orientason di Jeováa envês di toma kes disizon inportanti di nos pa nos.

‘Kunfia na Jeová di tudu bu korason’. Nu ta mostra ma nu ta kunfia na Deus óras ki nu ta faze kuzas di se manera. Nu ten ki kunfia na Deus di tudu nos korason. Na Bíblia, txeu bês korason krê fla kel algen ki nos é di pa déntu. Kel-li ta inklui nos sentimentu, motivason, pensamentu i atitudi. Má, kunfia na Deus di tudu nos korason ta nvolve más di ki sô nos sentimentus. Nu ta skodje faze kel-li pamodi nu ten tudu sertéza ma nos Kriador sabe kuzê ki é midjór pa nos. — Romanos 12:1.

‘Ka bu kunfia na bu própi ntendimentu.’ Nu meste kunfia na Deus pamodi nu ka pode kunfia na nos pensamentu, ki é inperfetu. Si nu kunfia sô na nos kabésa ô nu toma disizons sô ku bazi na nos sentimentu, nu pode toma disizons ki na komésu ta parse ma é dretu, má na fin, ta traze-nu maus rezultadu. (Provérbios 14:12; Jeremias 17:9) Nos sabedoria, ka ta konpara ku sabedoria di Deus. (Isaías 55:8, 9) Óras ki nu ta dexa se pensamentus gia-nu, tudu kuza ta kóre dretu ku nos. — Salmos 1:1-3; Provérbios 2:6-9; 16:20.

‘Lenbra di el na tudu bus kaminhu’. Nu debe sabe kuzê ki Deus ta pensa na tudu asuntu di nos vida i na kada disizon inportanti ki nu ta toma. Nu ta faze kel-li, óras ki nu ta faze orason ta pidi se orientason i óras ki nu ta sigi kuzê ki el ta fla na se Palavra ki é Bíblia. — Salmo 25:4; 2 Timóteo 3:16, 17.

‘El ta bira-u bus kaminhu rétu.’ Deus ta bira nos kaminhu rétu óras ki el ta djuda-nu vive di akordu ku se leis ki é justu. (Provérbios 11:5) Asi, nu ta ivita pasa pa prublémas sen nisisidadi i nu ta ten un vida mutu más filís. — Salmo 19:7, 8; Isaías 48:17, 18.

Kuzê ki kes versíklu antis i dipôs di Provérbios 3:5, 6 ta fla

Livru di Provérbios ten prinsípius ki ta djuda-nu ten un vida filís i ki ta agrada Deus. Kes primeru 9 kapítlu, sta skrebedu sima konsedjus di un pai pa se fidju ki el ta ama. Kapítlu 3 ta mostra kes bon rezultadu ki nu ta ten, óras ki nu ta da valor i nu ta aplika sabedoria di Deus. — Provérbios 3:13-26.