Provérbios 16:3 — ‘Intrega Jeová tudu kuza ki bu ta faze’

‘Intrega Jeová tudu kuza ki bu ta faze, i bus planu ta da sértu.’ — Provérbios 16:3, Bíblia Traduson di Mundu Novu.

Kuzê ki Provérbios 16:3 ta siginifika

Kel provérbiu li ta da kes algen ki ta adora Deus verdaderu serteza ma ses planu ta da bons rezultadu si es poi ses kunfiansa na el, es djobe se orientason i sigi-l.

‘Intrega Jeová tudu kuza ki bu ta faze’. Antis di toma un disizon, ku umildadi sérvus di Jeováa ta djobe se orientason. (Tiagu 1:5) Pamodi? Un motivu é pamodi pesoas txeu bês ten poku ô ninhun kontrolu sobri kes kuza ki ta kontise i ki ta afeta ses vida. (Eclesiastes 9:11; Tiagu 4:13-15) Tanbê es pode ten falta di sabedoria pa faze kuzê ki es krê. Pamodi kes motivu li, txeu ta mostra sabedoria i es ta intrega, ô kunfia, ses planu na Deus. Es ta faze kel-li óras ki es ta faze orason ta pidi-l orientason i es ta aji di akordu ku se vontadi ki sta na se Palavra, ki é Bíblia. — Provérbios 3:5, 6; 2 Timótiu 3:16, 17.

Kel frazi ‘intrega Jeová tudu kuza ki bu ta faze’ krê fla “rola bus trabadju pa Jeová.” Di akordu ku un livru, kel frazi ta da ideia di “un ómi [ki] ta tra karga di se kósta, i el ta pô-l na un otu algen ki é más fórti i ki ta konsigi karega-l.” Kes algen ki ku umildadi ta kunfia na Deus pode ten serteza ma el ta ba djuda-s i kuida di es. — Salmo 37:5; 55:22.

Kes palavra ‘tudu kuza ki bu ta faze’ ka krê fla ma Deus ta aprova ô abênsua tudu kuza ki algen krê faze. Pa nu ten benson di Jeová, nos planu debe sta di akordu ku ses lei i se vontadi. (Salmo 127:1; 1 Juan 5:14) Deus ka ta abênsua kes algen dizobidienti. Na verdadi, ‘el ta straga planus di kes algen mau.’ (Salmo 146:9) Omésmu ténpu, el ta djuda kes algen ki ta mostra ma es ta obi ku el i ki ta ruspeta se leis ki nu ta atxa na Bíblia. — Salmo 37:23.

‘I bus planu ta da sértu.’ Alguns traduson di Bíblia ta fla ‘bus planu ta fika firmi.’ Na kes testu di Bíblia ki skrebedu na ebraiku, ki normalmenti pesoas ta txoma di Velhu Testamentu, kes palavra ki traduzidu na kabuverdianu pa ‘fika firmi’, ta pasa ideia di faze un alisérsi, i txeu bês el ta pâpia di kel manera firmi ki Deus faze se kriason. (Provérbios 3:19; Jeremias 10:12) Deus ta poi planus di kes algen ki ta faze kel ki Deus ta atxa ma é dretu, ta fika firmi, i el ta djuda-s ten un vida suguru, ikilibradu i filís. — Salmo 20:4; Provérbios 12:3.

Kuzê ki kes versiklu antis i dipôs di Provérbios 16:3 ta fla

É rei Salumon ki skrebe kel provérbiu li i maior párti di livru di Provérbios. El konsigi fla milharis di provérbiu pamodi sabedoria ki Deus da-l. — 1 Reis 4:29, 32; 10:23, 24.

Na kapitlu 16, Salumon kumesa ta lova sabedoria di Deus, i el mostra modi ki El ta ôdia kes algen orgulhozu. (Provérbios 16:1-5) Dipôs, kel kapitlu ta poi ken ki sta ta lé ta txiga na un konkluzon inportanti, ki é ma pesoas sô ta konsigi ten sabedoria di verdadi i bons rezultadu si es é umildi i es dexa Deus gia ses kaminhu. Kel-li é un téma ki livru di Provérbios ta pâpia di el txeu bês. (Provérbios 16:3, 6-8, 18-23) Kel verdadi li ta parse txeu bês na Bíblia. — Salmo 1:1-3; Isaías 26:3; Jeremias 17:7, 8; 1 Juan 3:22.

Odja kel vídiu pikinoti li pa bu ten un ideia di kuzê ki Provérbios ta fla.