Primeru livru di Krónikas

13 Davidi djobe orientason na kes xéfi di mil, na kes xéfi di 100 i na tudu kes otu líder. 2 Dipôs, Davidi fla tudu kes israelita ki staba djuntadu la: “Si nhos ta konkorda i si é di vontadi di Jeová, nos Deus, nu manda mensajerus pa konvida nos irmons na tudu párti di Israel i tanbê kes saserdóti i kes levita na ses sidadi* pa ben djunta ku nos. 3 I nu traze Arka di nos Deus otu bês.” El fla kel-li pamodi na ténpu di Saul povu ka kuida di Arka. 4 Tudu kes algen ki staba la konkorda ku Davidi pamodi tudu es atxa ma éra un bon ideia. 5 Nton, Davidi djunta tudu Israel, désdi riu* di Ijitu ti Lebo-Amate,* pa ba buska Arka di Deus verdaderu, na Kiriate-Jearin.

6 Davidi i tudu Israel bai pa Baalá, kel-li krê fla Kiriate-Jearin, ki ta fika na Judá, pa es ba buska Arka di Jeová, kel Deus verdaderu, ki sta xintadu na se tronu riba* di kes kerubin. É dianti di kel Arka li ki es ta invokaba nómi di Deus. 7 Má, es tra Arka di Deus verdaderu di kaza di Abinadabe i es pô-l na un karósa novu. Uzá i Aiô staba ta konduzi kel karósa. 8 Davidi i tudu algen di Israel staba ta komemora dianti di Deus verdaderu, ku tudu ses forsa. Es staba ta kanta, ta toka arpa, i otus tipu di instrumentu di kórda, tanbor, sínbalu* i tronbéta. 9 Má kantu es txiga na lugar di digudja* di Kidon, Uzá stika mô i el pega Arka, pamodi kes boi staba kuazi ta bota-l na txon. 10 Nton, Jeová fika txeu xatiadu ku Uzá, i el mata-l pamodi el stika mô i el pega Arka. I el móre la, dianti di Deus. 11 Má, Davidi fika xatiadu* pamodi Jeová kastiga Uzá. I kel lugar fika ta txomadu di Peres-Uzá* ti dia di oji.

12 Davidi fika ku medu di Deus verdaderu na kel dia, i el fla: “Modi ki N pode traze Arka di Deus verdaderu pa nha sidadi?” 13 Davidi ka leba Arka pa undi ki el staba, na Sidadi di Davidi, má el manda pa es leba Arka pa kaza di Obede-Edon, kel jeteu. 14 Arka di Deus verdaderu fika ku família di Obede-Edon. Arka fika na se kaza duránti três mês, i Jeová kontinua ta abênsua família di Obede-Edon i tudu kuza ki el tinha.