Primeru livru di Krónikas
21 Un dia, Satanás* disidi aji kóntra Israel i el poi Davidi ta resensia Israel. 2 Nton, Davidi fla Joabe i kes xéfi di trópa: “Nhos bai i nhos konta kes israelita di Berseba ti Dan. Dipôs nhos traze-m informason, asi pa N sabe es é kantu.” 3 Má Joabe fla-l: “Pa Jeová poi se povu ta bira 100 bês más txeu! Sinhor rei, tudu es é ka sérvu di nho? Pamodi ki nho krê faze kel-li? Pamodi ki nho krê poi Israel ta peka?”
4 Má rei nega obi ku Joabe. Nton, Joabe sai i el viaja pa tudu Israel, dipôs el volta pa Jiruzalen. 5 Nton, Joabe da Davidi nunbru di kes algen ki kontadu. Na tudu Israel tinha 1 milhon i 100 mil ómi armadu ku spada, i na Judá tinha 470 mil ómi armadu ku spada. 6 Má, tribu di Levi ku Benjamin ka kontadu djuntu ku es, pamodi Joabe ôdia kuzê ki rei fla.
7 Kel-li foi un kuza ki dizagrada Deus verdaderu txeu, pur isu el kastiga Israel. 8 Dipôs Davidi fla Deus verdaderu: “N faze un pekadu gravi kantu N faze kel-li. I gósi, pur favor, púrdua éru di bu sérvu, pamodi N aji sima un algen ki ka ten juís.” 9 Nton, Jeová fla Gade ki éra videnti* di Davidi: 10 “Bai i bu fla Davidi: ‘É kel-li ki Jeová fla: “N sta da-u três kastigu. Skodje kal di es ki bu krê resebe.”’” 11 Nton, Gade bai na Davidi i el fla-l: “É kel-li ki Jeová fla: ‘Skodje kuzê ki bu ta prifiri: 12 três anu di fómi, três mês ta perde géra kóntra bus inimigu ki ta ben ataka-u ku ses spada, ô três dia ta sufri pamodi un anju di Jeová, ki ta ben uza spada di Jeová pa ataka tudu Israel ku un duénsa ki ta spadja i ki ta mata un monti algen na país.’ Pensa dretu i fla-m kuzê ki N debe fla kel Algen ki manda-m.” 13 Davidi fla Gade: “Kel-li é duru dimás pa mi. Favor, N ta prifiri kai na mô di Jeová pamodi se mizerikórdia é grandi dimás. Má N ka krê kai na mô di ninhun ómi.”
14 Nton, Jeová manda un pésti pa kastiga Israel, pur isu 70 mil algen di Israel móre. 15 Alén di kel-li, Deus verdaderu manda un anju pa distrui Jiruzalen. Má kantu kel anju staba kuazi ta faze kel-la, Jeová odja i el xinti tristi pamodi kel pésti. Nton el fla kel anju ki staba ta faze kel distruison: “Dja txiga! Baxa bu mô.” Kel anju di Jeová staba di pé pértu di kel lugar di digudja* di Ornan, kel jebuzeu.
16 Kantu Davidi labanta róstu, el odja anju di Jeová entri séu ku téra, ku spada na mô pontadu pa Jiruzalen. Nton Davidi i kes ansion, bisti panu di saku,* i kel óra es inbaxa ku róstu pa txon. 17 Davidi fla Deus verdaderu: “É ka mi ki manda konta povu? É mi ki peka i é mi ki fadja. Má kuzê ki kes ovelha la faze? Ó Jeová, nha Deus, favor, kastiga-m ami i família di nha pai. Má ka bu traze kel kastigu li riba di bu povu.”
18 Anju di Jeová manda Gade pa fla Davidi pa subi i pa faze un altar pa Jeová na lugar di digudja di Ornan, kel jebuzeu. 19 Nton, Davidi subi sima Gade fla-l, di akordu ku kel ki Jeová fla. 20 Na kel momentu, Ornan staba ta digudja trigu. Kantu el vira i el odja kel anju, ses kuatu fidju ki staba djuntu ku el sukundi. 21 Kantu Davidi txiga pértu di Ornan, Ornan odja Davidi, i kel óra el sai di kel lugar di digudja i el inbaxa ku róstu pa txon dianti di Davidi. 22 Davidi fla Ornan: “Bende-m* txon di bu lugar di digudja, pa N faze un altar pa Jeová na el. Bende-m el pa kel présu ki el ta bale, asi pa kel pésti para di kastiga povu.” 23 Má Ornan fla Davidi: “Sinhor rei, nho pode fika ku el, i nho pode faze kuzê ki nho krê ku el. Nho toma kes boi li pa nho faze oférta kemadu, kes tábua di digudja* pa nho faze lenha ku es, i tanbê trigu pa nho faze oférta di serial. N ta da nho tudu kes kuza li.”
24 Má, rei Davidi fla Ornan: “Nau, N ten ki kunpra-l pa kel présu ki el bale, pamodi N ka ta toma kel ki é di bo pa N da Jeová i nen N ka ta oferese sakrifisius kemadu ki ka ta kusta-m nada.” 25 Nton, Davidi da Ornan 600 siklu* di oru pa kel txon. 26 Davidi faze un altar pa Jeová la i el oferese sakrifisius kemadu i sakrifisius di pas. El faze orason pa Jeová, i Deus responde Davidi kantu el manda lumi di séu pa kema kes oférta riba di altar. 27 Dipôs, Jeová manda kel anju pa poi spada na baínha. 28 Kantu Davidi odja ma Jeová responde-l na kel lugar di digudja di Ornan, kel jebuzeu, el kontinua ta oferese sakrifisiu na kel lugar. 29 Má na kel ténpu, tabernáklu di Jeová ki Muizés fazeba na dizértu i kel altar di oférta kemadu, staba na kel lugar sagradu,* na Jibion. 30 Má Davidi ka konsigi bai pa la pa el ba djobe orientason di Deus, dja ki el staba ku txeu medu pamodi kel spada di anju di Jeová.