Deus sta na tudu lugar, omésmu ténpu?
Respósta di Bíblia
Deus pode odja tudu kuza. Tanbê el pode faze kuzê ki el krê na kalker lugar. (Provérbios 15:3; Hebreus 4:13) Má, Bíblia ka ta inxina ma Deus ta sta na tudu kuza ô na tudu lugar omésmu ténpu. Bíblia ta inxina ma Deus é un algen i el ta mora na un lugar.
Modi ki Deus é: Deus é un spritu. (João 4:24) Ninhun umanu ka pode odja-l. (João 1:18) Kes vizon sobri Deus ki sta na Bíblia sénpri ta mostra ma el ta mora na un lugar. Bíblia nunka ka ta fla ma el ta sta na tudu lugar. — Isaías 6:1, 2; Apocalipse 4:2, 3, 8.
Lugar ki Deus ta mora: Deus ta mora na mundu spritual, ki é un lugar diferenti di kel séu ku Téra ki nu ta odja. É na kel mundu spritual li ki Deus ten un lugar ‘undi ki el ta mora na Séu’. (1 Reis 8:30) Bíblia ta pâpia di un bês ki anjus ‘entra pa fika dianti di Jeová’,a kel-li ta mostra, ma Deus ta mora na un lugar. — Jó 1:6.
Si Deus ka ta sta na tudu lugar omésmu ténpu, el ta konsigi kuida di mi?
Sin, Deus ta preokupa txeu ku kada algen. Sikrê el ta mora na mundu spritual, Deus ta presta atenson na tudu algen ki krê agrada-l. Deus ta djuda kes algen li. (1 Reis 8:39; 2 Crónicas 16:9) Odja modi ki Jeová ta mostra ma el ta preokupa ku se sérvus fiel.
Óras ki bu ta faze orason: Jeová pode obi bu orason omésmu ténpu ki bu sta faze orason. — 2 Crónicas 18:31.
Óras ki bu sta tristi dimás: ‘Jeová sta pértu di kes ki tene korason maguadu; el ta salva kes ki tene spritu dizanimadu.’ — Salmo 34:18.
Óras ki bu meste orientason: Jeová ‘ta da-u sabedoria i el ta inxina-u’ através di se palavra, ki é Bíblia. — Salmo 32:8.
Stórias ki inventadu ki ta fla ma Deus ta sta na tudu lugar omésmu ténpu
Stória inventadu: Deus sta na tudu kuza ki el kria.
Verdadi: Deus ka ta mora na Téra ô na kalker otu lugar di séu ku Téra ki nu ta odja. (1 Reis 8:27) É verdadi ki strélas i otus kuza ki Deus kria ‘ta pâpia di glória di Deus’. (Salmo 19:1) Má, sima un pintor ka ta mora na un kuadru ki el pinta, Jeová ka ta mora na kuzas ki el kria. Má, kel kuadru pode inxina-nu txeu kuza sobri kel algen ki faze-l. Di mésmu manera, kes kuza ki Deus faze na nos vólta tanbê pode mostra-nu alguns kualidadi ‘ki nu ka ta odja’ di nos Kriador, sima puder, sabedoria i amor. — Romanos 1:20.
Stória inventadu: Deus sô pode ser Tudu-Poderozu i sabe tudu kuza si el ta sta na tudu lugar omésmu ténpu.
Verdadi: Spritu santu é forsa ô puder ki Deus ta uza pa faze kuzas. É através di spritu santu, ki Deus ta konsigi odja tudu kuza, faze tudu kuza na kalker óra i na kalker lugar, sen el meste sta la. — Salmo 139:7.
Stória inventadu: Salmo 139:8 ta fla ma Deus ta sta na tudu lugar pamodi el ta fla: ‘Si N subiba pa séu, bu ta staba la; i, si N fazeba nha kama na Sipultura, bu ta staba la tanbê!’
Verdadi: Kel versíklu li ka ta mostra ma Deus ta sta na tudu lugar. Kel versíklu li, ki sta na forma di un poezia, ta mostra ma Jeová ta djuda-nu ka nporta na undi ki nu sta.
a Bíblia ta mostra ma Jeová é nómi di Deus.