Studa Bíblia é bon pa bo, má alvês pode ka ser fásil. Talvês bu pode pergunta si bu ta konsigi kontinua ta studa Bíblia. Pamodi ki bale péna kontinua ta studa? Kuzê ki pode djuda-u kontinua ta studa sikrê ku prublémas?

1. Pamodi ki studa Bíblia é inportanti?

‘Palavra di Deus é bibu i el ten puder’. (Hebreus 4:12) Bíblia é un livru inportanti, pamodi el ta mostra kuzê ki Deus ta pensa i kuzê ki el ta xinti pa bo. El ta djuda-u ka ten sô konhisimentu, má tanbê sabedoria di verdadi i speransa. Más inportanti inda, Bíblia ta djuda-u bira amigu di Jeová. Óras ki bu ta studa Bíblia bu sta dexa-l midjora bu vida.

2. Pamodi ki é inportanti da valor pa kuzê ki Bíblia ta inxina?

Verdadis di Bíblia é sima tizorus ki ten txeu valor. É pur isu ki Bíblia ta insentiva-nu pa nu ‘kunpra verdadi i nunka ka nu bende-l’. (Provérbios 23:23) Óras ki nu ta da valor pa kuzê ki Bíblia ta inxina, nu ta kontinua ta studa, sikrê nu sta pasa pa prublémas. — Lé Provérbios 2:4, 5.

3. Modi ki Jeová pode djuda-u kontinua ta studa?

Jeová, ki é bu Kriador i bu Amigu, krê djuda-u prende sobri el. El pode da-u ‘dizeju i forsa pa bu aji.’ (Lé Filipenses 2:13.) Nton, si alvês bu meste xinti más vontadi pa studa ô pa faze kel ki bu prende, el pode djuda-u. El pode da-u más forsa pa bu vense prublémas ô pirsigison. Pidi Jeová sénpri na orason pa djuda-u kontinua ta studa Bíblia. — 1 Tessalonicenses 5:17.

SABE MÁS

4. Studu di Bíblia debe ser un kuza inportanti pa bo

Alvês nu ta sta okupadu dimás ki ta parse ma nu ka ten ténpu pa studa Bíblia. Kuzê ki pode djuda-nu? Lé Filipenses 1:10, i dipôs pâpia sobri kes pergunta li:

• Kal ki é alguns kuza ki bu ta atxa ma é ‘más inportanti’ na vida?

• Modi ki studu di Bíblia pode bira un kuza inportanti pa bo?

1. Si bu intxi un baldi ku areia i dipôs bu tenta poi pédra, kes pédra ka ta kebe

2. Si bu poi kes pédra primeru bu ta konsigi poi kuazi tudu kel areia na el. Di mésmu manera, si bu poi kes kuza ki é más inportanti na primeru lugar na bu vida bu ta konsigi faze-s i inda bu ta ten ténpu pa faze otus kuza.

Studa Bíblia ta satisfaze nos nisisidadi spritual, ô kel nisisidadi ki nu ten di konxe i adora Deus. Lé Mateus 5:3, i dipôs pâpia sobri kel pergunta li:

• Modi ki studu di Bíblia ta djuda-nu óras ki el bira un kuza inportanti pa nos?

5. Ka bu dizisti sikrê ku opozison

VÍDIU: El abensuadu pamodi el ka dizisti (5:22)

• Na vídiu, modi ki amigus di Francesco i se mai reaji kantu el fla-s kuzê ki el staba ta prende?

• Ki bensons el resebe pamodi el ka dizisti?

Lé 2 Timóteo 2:24, 25, i dipôs pâpia sobri kes pergunta li:

• Kuzê ki bu família i amigus ta atxa di kuzê ki bu sta prende?

• Di akordu ku kes versíklu li, kuzê ki bu debe faze si un algen ka krê pa bu studa Bíblia? Pamodi?

6. Kunfia ma Jeová ta djuda-u

VÍDIU: Jeová ta djuda-nu faze mudansas na vida (3:56)

• Na vídiu, ki mudansas Jim faze pa agrada Jeová?

• Kuzê ki más bu gosta di se izénplu?

Lé Hebreus 11:6, i dipôs pâpia sobri kes pergunta li:

• Kuzê ki Jeová ta ben faze pa kes algen ki ta ‘djobe-l asériu’, ô kes ki ta sforsa pa konxe-l i agrada-l?

• Modi ki Jeová ta xinti óras ki el ta odja sforsu ki bu ta faze pa studa Bíblia?

REZUMU

Nbóra pode ka ser fásil, studa Bíblia pode djuda-u ser filís pa tudu ténpu. Kontinua ta kunfia na Jeová i el ta abensua-u.

Perguntas di rezumu

• Pamodi ki verdadis di Bíblia ten txeu valor pa bo?

• Modi ki bu pode ‘konfirma kuzê ki é más inportanti’?

• Pamodi ki bu debe pidi Jeová pa djuda-u kontinua ta studa Bíblia?

DJOBE MÁS

Odja kuatu kuza ki dja djuda txeu algen uza ses ténpu dretu.

“Modi ki bu pode uza bu ténpu dretu” (Nhos korda!, febreru di 2014)

Repara modi ki Jeová djuda un mudjer ki se maridu ka ta ntendeba sforsu ki el ta fazeba pa agrada Deus.

Jeová ta da-nu forsa pa nu karega nos karga (5:05)

Odja modi ki un mudjer ki ka dizisti di studa Bíblia konsigi djuda se maridu.

N krê provaba si éra verdadi (6:30)

Es ta kustuma fla ma Tistimunhas di Jeová ta dividi família. Má kel-li é verdadi?

“Tistimunhas di Jeová ta sipara ô ta uni famílias?” (Artigu na jw.org)

Nos tudu nu ten ki toma disizons. Txeu di kes disizon pode mexe ku nos i ku nos amizadi ku Jeová. Pur izénplu, talvês nu ten ki disidi na undi nu ta mora, modi ki nu ta sustenta ô si nu ta kaza ô nau. Óras ki nu ta toma bons disizon, nu ta ten un vida filís i nu ta agrada Jeová.

1. Modi ki bu pode uza Bíblia pa toma bons disizon?

Antis di toma un disizon, ora pa Jeová ta pidi-l ajuda i djobe na Bíblia pa sabe kuzê ki el ta atxa di kel asuntu. (Lé Provérbios 2:3-6.) Ten alguns situason ki Jeová ta da un órdi klaru. Pur isu, midjór disizon ki bu pode toma é obi ku kel órdi.

Má i si Bíblia ka ta fla-nu klaru kuzê ki nu debe faze? Jeová ta kontinua ‘ta gia-u na kaminhu ki bu debe anda.’ (Isaías 48:17) Modi ki el ta faze kel-la? Ten prinsípius na Bíblia ki pode gia-u. Prinsípius di Bíblia é kes verdadi prinsipal ki ta djuda-nu ntende kuzê ki Deus ta pensa i kuzê ki el ta xinti sobri un asuntu. Txeu bês nu ta prende kuzê ki Deus ta pensa sobri un asuntu óras ki nu ta lé un stória na Bíblia. Óras ki nu ta ntende modi ki Jeová ta xinti, nu ta pode toma disizons ki ta pô-l kontenti.

2. Na kuzê ki bu debe pensa antis di toma un disizon?

Bíblia ta fla: ‘Ken ki é prudenti ta pensa antis di el da kada pasu.’ (Provérbios 14:15) Kel-li krê fla ma antis di nu toma un disizon, nu debe para i pensa dretu na kuzê ki sta nvolvidu. Pur isu, pergunta bu kabésa: ‘Ki prinsípius di Bíblia N pode uza na kel asuntu li? Ki disizon ta pô-m ta xinti pas déntu mi? Modi ki nha disizon ta afeta otus algen? I más inportanti inda, el ta poi Jeová kontenti ku mi?’ — Deuteronómio 32:29.

Jeová ten direitu di fla-nu kuzê ki é dretu i kuzê ki é mariadu. Sima nu ta ba ta konxe se leis i prinsípius midjór i nu sta disididu na sigi-s, nu ta trena nos konsénsia. Konsénsia é kapasidadi ki nu ten déntu nos ki ta fla-nu kuzê ki é dretu i kuzê ki é mariadu. (Romanos 2:14, 15) Un konsénsia trenadu ta djuda-nu toma bons disizon.

SABE MÁS

3. Dexa Bíblia gia-u

VÍDIU: Dexa prinsípius di Bíblia gia bu vida (5:54)

• Ki prezenti Jeová da-nu?

• Pamodi ki Jeová da-nu kapasidadi pa nu toma nos própi disizon?

• Kuzê ki el da-nu pa djuda-nu toma bons disizon?

Pa bu odja un izénplu di un prinsípiu di Bíblia, lé Efésios 5:15, 16. Dipôs pâpia sobri modi ki bu pode uza bu ‘ténpu di midjór manera’ pa bu. . .

• lé Bíblia tudu dia.

• bira un maridu, un mudjer, un pai, un mai ô un fidju midjór.

• sisti runion na kongregason.

4. Trena bu konsénsia pa toma bons disizon

VÍDIU: ‘Mante un bon konsénsia’ (5:13)

• Na vídiu, kuzê ki kel irman faze pa trena se konsénsia i toma un disizon ki ta poba Jeová kontenti?

Pamodi ki nu ka debe pidi otus algen pa toma disizons pa nos? Lé Hebreus 5:14, i dipôs pâpia sobri kes pergunta li:

• Pode parse ma é más fásil pidi otus algen pa toma disizons pa nos. Má kuzê ki kada un di nos debe sabe?

• Kuzê ki pode djuda-u trena bu konsénsia i toma bons disizon?

5. Ruspeta konsénsia di otus algen

Anos é ka igual ku kunpanheru, pur isu nu ka ta toma mésmu disizon. Modi ki nu pode mostra ma nu ta ruspeta konsénsia di otus algen? Odja dôs situason:

Primeru situason: Un irman ki gosta di uza makiaji ta muda pa un kongregason ki txeu irman ta xinti inkomodadu óras ki un algen ta uza makiaji.

Lé Romanos 15:1 i 1 Coríntios 10:23, 24, i dipôs pâpia sobri kes pergunta li:

• Ku bazi na kes versíklu li, kuzê ki kel irman pode disidi faze? Kuzê ki bu ta fazeba si bu staba djuntu ku un algen ki se konsénsia ka ta dexa-l faze un kuza ki bu konsénsia ta dexa-u faze?

Sugundu situason: Un irmon sabe ma Bíblia ka ta fla ma é mariadu bebe bebida alkólika na limiti, má simé el ta disidi ka bebe. El ta konvidadu pa un konvíviu i el ta odja irmons ta bebe.

Lé Eclesiastes 7:16 i Romanos 14:1, 10, i dipôs pâpia sobri kes pergunta li:

• Ku bazi na kes versíklu li, kuzê ki kel irmon pode disidi faze? Kuzê ki bu ta fazeba si bu odja un algen ta faze un kuza ki bu konsénsia ka ta dexa-u faze?

Kuzê ki ta djuda-u toma bons disizon?

1. Pidi Jeová pa djuda-u disidi kuzê ki bu ta faze. — Tiago 1:5.

2. Faze piskiza na Bíblia i na publikasons pa bu atxa prinsípius ki bu pode uza. Tanbê bu pode pâpia ku irmons ki ten más spiriénsa.

3. Pensa na modi ki bu disizon ta afeta bu konsénsia i konsénsia di otus algen.

REZUMU

Nu ta toma bons disizon óras ki nu ta sabe kuzê ki Jeová ta pensa sobri un asuntu, i modi ki kes kuza ki nu ta faze pode djuda ô prujudika otus algen.

Perguntas di rezumu

• Modi ki bu pode toma disizons ki ta poi Jeová kontenti?

• Modi ki bu pode trena bu konsénsia?

• Modi ki bu pode mostra ma bu ta ruspeta konsénsia di otus algen?

DJOBE MÁS

Modi ki bu pode toma disizons ki ta djuda-u bira más amigu di Deus?

“Toma disizons ki ta onra Deus” (Sentinéla, 15 di abril di 2011)

Ntende midjór modi ki Jeová ta da-nu konsedju.

Jeová ta gia se povu (9:50)

Odja kuzê ki djuda un ómi toma un disizon difísil.

Jeová ta da-nu tudu kel ki é bon (5:46)

Prende más sobri modi ki bu pode poi Jeová kontenti óras ki el ka ta da un órdi klaru sobri un asuntu.

“Nu meste sénpri di un régra di Bíblia?” (Sentinéla, 1 di dizenbru di 2003)