Ken ki é Rei di Reinu di Deus?

• Deus ki skodje-l. ‘É mi ki poi nha rei na tronu. N ta da-u nasons pa ser sima bu eransa. I kes párti más lonji di Téra pa ser sima bu propriadadi.’ — Salmo 2:6, 8.

• Erderu di Rei Davidi. ‘Nase-nu un mininu, nu dadu un fidju. Omentu di se govérnu, i di pas na tronu di Davidi, ka ta ten fin, i nen na se reinu, pa el ben fika finkadu’. — Isaías 9:6, 7.

• El nase na Belen. ‘Ó Belen, é di bo ki ta ben sai pa mi kel ki ta ben ser governanti. Se grandéza ta ben txiga ti kes párti más lonji di Téra.’ — Miqueias 5:2, 4.

• El disprezadu i el matadu. ‘El disprezadu i nen nu ka liga-l. El dadu ku lansa pamodi nos pekadu, el piladu pamodi nos fadjas.’ — Isaías 53:3, 5.

• El resusitadu i el podu na un puzison inportanti. ‘Bu ka ta dexa-m na Sipultura. Bu ka ta dexa bu sérvu lial konxe kóba. Filisidadi sta na bu direita, pa tudu ténpu.’ — Salmo 16:10, 11.

Jizus Kristu é kel midjór Governanti ki ten

Désdi ki ómi kriadu, é sô na un algen ki kunpri tudu kes kuza ki Bíblia ta fla. Kel algen li é Jizus Kristu. Tanbê, un anju flaba Maria mai di Jizus: “Nhordes ta da-l tronu di rei Davidi, si Pai. Si gubérnu ka ta kaba.” — Lúkas 1:31-33, BPK.

Jizus nunka ka bira un governanti na Téra. Má, el ta ben governa tudu algen la di Séu, sima Rei di Reinu di Deus. Pamodi ki el é midjór Governanti ki ten? Odja kuzê ki el faze kantu el staba na Téra.

• Jizus ta kuidaba di algen. Jizus ta djudaba tudu algen, ka ta nportaba si es éra ómi ô mudjer, jóven ô algen grandi, riku ô póbri. (Mateus 9:36; Marcos 10:16 ) Un bês, un ómi ki tinha lépra pidi Jizus: ‘Si nhu krê nhu pode bira-m linpu.’ Jizus xinti péna di el i el kura-l. — Marcos 1:40-42.

• Jizus inxina-nu modi ki nu ta agrada Deus. El fla: ‘Nhos ka pode ser skravu di Deus i di Rikézas.’ Tanbê, el fla ma nu debe trata otus algen sima nu ta gostaba pa es trata-nu. El mostra ma Deus ka ta preokupa sô ku kuzê ki nu ta faze, má tanbê ku kuzê ki nu ta pensa i modi ki nu ta xinti. Pur isu, pa nu agrada Deus, nu meste kontrola kuzê ki nu ta xinti na nos korason. (Mateus 5:28; 6:24; 7:12 ) Jizus inxina ma pa nu ser filís di verdadi, nu meste prende kuzê ki Deus krê pa nu faze i faze sima nu prende. — Lucas 11:28.

• Jizus inxina kuzê ki siginifika ama otus algen. Kes kuza ki Jizus fla i ki el faze, toka korason di kes algen ki staba ta obi-l. ‘Kes monti algen fika dimiradu ku se manera di inxina, pamodi el ta inxinaba sima algen ki tinha autoridadi’. (Mateus 7:28, 29 ) El fla-s: ‘Nhos ama nhos inimigus’. I ti el ora pa alguns di kes algen ki mata-l: ‘Nha Pai, purdua-s, pamodi es ka sabe kuzê ki es sta ta faze.’ — Mateus 5:44; Lucas 23:34.

Jizus é kel algen ki sta más ben priparadu pa governa Téra, pamodi el ta trata algen ku bondadi i el ta preokupa ku es. Má na ki ténpu ki el ta kumesa ta governa Téra?