Modi ki N pode lida ku preson di kolégas pa faze séksu?

“Kantu N staba na skóla, si algun algen flaba ma el faze séksu, tudu kes otu algen ta atxaba ma es tinha ki fazeba mésmu kuza. Afinal, ningen ka krê ser diferenti.” — Elaine, 21 anu.

Dja bu kustuma xinti preson pa faze séksu sô pamodi ta parse ma tudu algen sta faze?

Algun bês un algen ki bu ta ama dja kustuma faze-u preson pa bu faze séksu ku el?

Si kel-li dja kontise ku bo, kel artigu li pode djuda-u lida ku preson ki otus algen ta faze-u ô luta kóntra bus própi dizeju, asi pa bu toma bons disizon.

• Mintiras ku verdadis

• Modi ki bu pode lida ku preson pa faze séksu

• Kuzê ki otus jóven ta fla

Mintiras ku verdadis

MINTIRA: Tudu algen sta faze séksu (ménus mi).

VERDADI: Un piskiza ki fazedu, ta mostra ma na kada três jóven ki ten 18 anu, dôs ta fla ma dja es faze séksu. Má kel-li krê fla ma txeu jóven inda ka faze séksu. Nton, é ka “tudu algen” ki sta faze séksu.

MINTIRA: Séksu ta bira nos relason más fórti.

VERDADI: Alguns rapás ta uza kel ideia li pa es pode konvense alguns minina pa faze séksu ku es. Má kel ideia la é ka verdadi. Kuazi sénpri, un rapás ta tirmina namoru ku un minina dipôs ki es faze séksu. Kel-li ta dexa kel minina spantadu i ku raiba pamodi el ta pensaba ma kel rapás ta amaba el ô ma es tinha un konpromisu sériu.a

MINTIRA: Bíblia ta fla ma séksu é mariadu.

VERDADI: Bíblia ta pâpia kuzas dretu sobri séksu, má el ta fla ma é sô un ómi ku un mudjer kazadu ki debe faze-l. — Génesis 1:28; 1 Coríntios 7:3.

MINTIRA: Vive di akordu ku kes lei di Bíblia ta straga nha vida.

VERDADI: Si bu spéra ti ki bu kaza pa bu faze séksu, bu ta ser más filís pamodi bu ta ivita preokupasons, rapendimentu i otus prubléma ki pode kontise óras ki algen ta faze séksu antis di kazamentu.

Konkluzon: Spéra pa faze séksu dipôs di kazamentu nunka ka prujudika ningen. Má faze séksu antis di kazamentu ta prujudika algen.

Modi ki bu pode lida ku preson pa faze séksu

• Bira bu kunfiansa más fórti na kes kuza ki bu ta kridita na el. Bíblia ta fla ma kes algen maduru ‘ta trena ses kapasidadi di pensa óras ki es ta uza-l pa sabe kuzê ki é dretu i kuzê ki é mariadu.’ (Hebreus 5:14) Es ten tudu sertéza na kel ki Bíblia ta fla sobri kuzê ki é dretu ô mariadu. Pur isu, é ka fásil otus algen konvense-s pa faze un kuza mariadu.

  “N ta sforsa txeu pa N faze kel ki é dretu i pa N ten un bon nómi. I N ka ta faze nada ki pode pô-m ta perde-l.” — Alicia, 16 anu.

  Pensa na kel-li: Ki tipu di algen ki bu krê ser? Bale péna perde bu bon nómi sô pa otus algen pode fika kontenti ku bo?

• Pensa na kes mau rezultadu. Bíblia ta fla: ‘Kel ki algen símia, é kel ki tanbê el ta kodje’. (Gálatas 6:7) Imajina bu kabésa na futuru i pensa na modi ki bu vida i vida di kel otu algen pode muda si nhos kai na preson di faze séksu.b

  “Txeu bês kes algen ki ta faze séksu antis di kazamentu ta xinti kulpadu, rapendidu i ma ningen ka gosta di es. I sen fla di un gravidês ki ka staba na planu ô un duénsa ki ta panhadu na faze séksu.” — Sienna, 16 anu.

  Pensa na kel-li: Livru Sex Smart ta faze un pergunta: “Si bus amigu sta ta faze-u preson pa bu faze kuzas ki pode pô-u na prubléma, bu ta atxa ma es é kes midjór algen ki bu debe sta djuntu ku es i ta obi ku es na kuzas inportanti di vida?”

• Pensa di manera ikilibradu sobri séksu. Séksu é ka un inimigu. Na verdadi, Bíblia ta fla ma kes algen ki é kazadu debe tra pruvetu di el na ses kazamentu. — Provérbios 5:18, 19.

  “Séksu é un párti bunitu di kriason. Deus krê pa nu tra pruvetu di el, ma sô di kel manera ki el ta krê, ki é na kazamentu.” — Jeremy, 17 anu.

  Pensa na kel-li: Si algun dia bu kaza, bu ta pode faze séksu. I bu ta pode pruveta-l dretu, sen kes mau rezultadu ki dja nu papiaba di es.