Modi ki aparelhus iletróniku ta afeta bu kazamentu?

Má alguns ki é kazadu ta dexa aparelhus iletróniku. . .

• furta kel ténpu ki es podia pasaba ku kunpanheru.

• pô-s ta leba trabadju pa kaza sen nisisidadi.

• pô-s ta diskunfia i ta trai kunpanheru.

KUZÊ KI BU DEBE SABE

PASA TÉNPU DJUNTU KU KUNPANHERU

Un maridu ki txoma Michael fla: “Alvês N ta xinti ma óras ki N sta djuntu ku nha mudjer é sima si el ‘ka sta la’. El sta sénpri okupadu ta djobe pa se telemóvel i ta fla: ‘Ti inda N ka odja nhas mensaji.’” Un maridu ki txoma Jonatan fla ma na situasons sima kel-li “maridu ku mudjer pode sta djuntu na mésmu lugar, má simé es pode sta lonji di kunpanheru.”

PENSA NA KEL-LI: Kantu bês ki xamadas ô mensaji ta kaba pa furta ténpu ki bu podia staba ku bu maridu ô ku bu mudjer? — EFÉSIOS 5:33.

TRABADJU

Alguns algen ten ki sta disponível 24 óra pa dia pamodi kel tipu di trabadju ki es ta faze. Má mésmu kes ki ka ten kel tipu di trabadju li, txeu bês ta leba trabadju pa kaza. Un maridu ki txoma Lee fla: “É difísil ka djobe tudu kes xamada ô kes mensaji ki N ta resebe di trabadju óras ki N sta djuntu ku nha mudjer.” Un mudjer ki txoma Joy fla: “N ta trabadja di kaza, nton é difísil sabe ki óra ki N debe para. N ten ki sforsa pa N ser ikilibradu.”

PENSA NA KEL-LI: Óras ki bu maridu ô bu mudjer sta ta pâpia ku bo, bu ta presta txeu atenson? — LUCAS 8:18.

FALTA DI KUNFIANSA

Un piskiza ta mostra ma fika diskunfiadu ku kuzê ki maridu ô mudjer ta poi na redi sosial é un di kes motivu prinsipal ki ta pô-s ta diskuti ku kunpanheru. Alguns algen ki entrivistadu ti fla ma es ta poi kuzas na internet sukundidu di ses maridu ô mudjer.

Txeu algen ta kridita ma redi sosial, pode ser txeu prigozu pa kes ki é kazadu i ti mésmu pode bira más fásil pa es faze adultériu. Ti mésmu adivogadus di divórsiu ta fla ma na nos ténpu, redi sosial ta poi txeu algen kazadu ta sipara.

PENSA NA KEL-LI: Bu ta sukundi di bu maridu ô di bu mudjer kes mensaji ki bu ta resebe ô ki bu ta manda pa otus algen? — PROVÉRBIOS 4:23.

KUZÊ KI BU DEBE FAZE

DJOBE KES KUZA KI É MÁS INPORTANTI

Un algen ki ka ta kume dretu ta ten prublémas di saúdi. Di mésmu manera, un algen ki ka ta pasa ténpu ku se maridu ô se mudjer ta ten prublémas na se kazamentu. — Efésios 5:28, 29.

Kuzê ki bu pode faze pa ka dexa aparelhus iletróniku prujudika bu kazamentu? Pâpia ku bu maridu ô mudjer sobri kes kuza ki bu ta gostaba di faze ô skrebe bus própi ideia.

• Xinta pa nu kume djuntu peloménus un bês pa dia

• Faze un prugrama pa di vês en kuandu nu ka uza telemóvel

• Marka un jantar romántiku ô otu kuza pa nu pode pasa ténpu djuntu

• Disliga nos telemóvel di noti i dexa-s fóra di kuartu

• Disliga nos telemóvel tudu dia duránti uns 15 minutu pa nu pode pâpia ku kunpanheru

• Ka uza internet na alguns momentu duránti dia