NOS PLANÉTA TA SER DISTRUÍDU?
AGU
VIDA na téra ka ta izistiba si ka tinha agu dósi. Na verdadi, kuzê ki tudu kes kuza bibu ten más txeu na el é agu. Lagu, riu, kes lagu ki ta sta na floréstas i rótxas baxu txon ki ta guarda agu, ta da agu pa animal i pa algen bebe i tanbê agu pa rega plantas.
Pamodi ki nu meste proteje agu
Agu ta kubri maior párti di nos planéta. Di akordu ku Organizason Mundial di Meterolojia, é “sô 0,5 pursentu di agu dósi na téra interu ki sta disponível i ki algen pode uza.” Enbóra kel kuantidadi poku di agu li ta txiga pa sustenta vida na téra, un bon párti di el sta ta bira suju ô sta ta fika poku pamodi sta ta mestedu más txeu i pamodi mudansas di klima. Spesialistas ta fla ma di li uns 30 anu, pode ser ki sinku bilhon di algen ka ta ten agu dósi ki ta txiga-s pa es uza na ses dia-dia.
Nos planéta fazedu pa kontinua ta izisti
Téra fazedu di un manera ki sénpri ta ten agu na el. Tanbê, txon, kes vida ki ten na mar i ti mésmu lus di sól ta trabadja tudu djuntu pa mante nos agu linpu. Odja alguns próva ki ta mostra ma nos planéta fazedu di un manera ki el ta kontinua ta izisti.
Próvas ta mostra ma txon ten kapasidadi di kaba ku txeu di kes kuza ki ta poi nos agu ta bira suju. Na lagus ki ta sta na floréstas, alguns planta ta konsigi tra nitrojéniu, fósforu i otus produtu prigozu di agu.
Sientistas prende modi ki naturéza ta konsigi mante agu linpu. Kel agu ki sta kóre, ta disfaze kes kuza prigozu i dipôs kes bakitéria ta kaba ku es.
Ten marisku ki na poku dia, ta pode tra di agu kes produtu kímiku ki pode ser prigozu i talvês es ta faze kel-li midjór di ki kes lugar di faze tratamentu di agu.
Nos planéta ta guarda agu através di un sistéma ki é konxedu pa siklu di agu. Kel sistéma li, djuntu ku otus kuza ki ta kontise na naturéza ka ta dexa agu sai di nos atimosféra ô dizaparse.
Kuzê ki ómis sta ta faze
Óras ki nu ta konpo algun kuza ki sta perde óliu i ivita uza kes kuza ki ten produtu kímiku prigozu, nu sta ta djuda pa kes fonti di agu fika linpu
Spesialistas ta fla pa popa agu sénpri ki ta da. Pa ivita pa agu fika kontaminadu, es ta insentiva-nu pa nu konpo nos karu i otus transpórti, asi pa ka perde óliu i pa nu ka bota ramedi nen otus produtu prigozu na algun lugar ki ta bai pa esgotu.
Enjinherus kria novus manera di tra sal di agu di mar. Obijetivu é pa ten más agu dósi.
Má, nu meste faze más. Tra sal di agu di mar é ka un bon soluson pamodi ta kusta txeu dinheru i ta gasta txeu inerjia. Un rilatóriu ki fazedu pa Nasons Unidu na 2021 sobri modi ki nu ta proteje agu ki ta sirbi pa bebe, fla: “Na mundu interu, meste fazedu dôs bês más sforsu pa proteje agu ki nu ta uza.”
Ki speransa Bíblia ta da-nu
‘Deus ta puxa pa riba kes góta di agu; kel vapor ta bira agu pa forma txuba. Nton, kes núven ta baza-l, es ta dispija-l riba di tudu algen.’ — Jó 36:26-28.
Deus kria siklus natural pa proteje kes agu di téra. — Eclesiastes 1:7.
Pensa na kel-li: Dja ki nos Kriador faze téra di un manera ki el ta purifika agu, é normal bu kridita ma el tene gana i el ten puder di kaba ku kes prubléma di poluison i di falta di agu ki ómi kria. Odja artigu “Deus promete ma nos planéta ka ta ser distruídu”, na pájina 15.