“Nhos bai i nhos inxina algen... pa es bira nhas disiplu”

1-6. Da un izénplu ki ta mostra ma Tistimunhas di Jeová ta prega na situasons diferenti.

UN TISTIMUNHA di Jeová di Gana, ki txoma Rebeka, faze skóla se tiritóriu pa prega. Sénpri el ta tinha na se muxila publikasons ku bazi na Bíblia. Duránti intervalu el ta djobeba oportunidadi pa daba se kolégas tistimunhu. Rebeka kumesa ta faze studus di Bíblia ku txeu di se kolégas di skóla.

² Na ilha di Madagáskar, pértu di kósta lésti di Áfrika, un kazal di pioneru ta kustuma andaba uns 25 kilómetru dibaxu di sól kenti. Es ta fazeba kel-li pa es txigaba na un zóna ki ta fikaba lonji i pa es fazeba studus di Bíblia pa kes algen ki mostra interesi.

³ Pa konsigi txiga na kes algen ki ta mora djuntu di kes riu Paraguai i Paraná, Tistimunhas di Jeová di Paraguai i otus irmon di 15 país, trabadja djuntu pa faze un barku. Kel barku ten spasu ki ta txiga pa uns 12 algen mora na el. Ku kel barku li, nos irmons ku irmans prega notísias sábi ku zelu na kes lugar ki é difísil txiga la.

⁴ Na nórti di Alaska, Tistimunhas di Jeová ta pruveta un oportunidadi spesial pa da tistimunhu na ténpu di kalor. Na ténpu más kenti kes naviu di kruzeru xeiu di turista di txeu país ta bai pa la. Tistimunhas di Jeová di la, ta organiza tistimunhu pa públiku na kes kais i es ta mostra publikasons ku bazi na Bíblia na txeu língua. Na kel mésmu zóna, ta uzadu avion pa pode txiga na kes lugar más izoladu, asi es ta pode pâpia di notísias sábi pa kes povu aleutis, atapaska, tsinxian i tlingit.

⁵ Irmon Larry, ki ta mora na Texas, na Mérka, ten un tiritóriu spesial. El ta mora na un kaza ki ta podu kes algen grandi, i el faze di la se tiritóriu. Enbóra el ta sta na un kadera di róda pamodi un asidenti, Larry sénpri ta djobe oportunidadi pa prega. El ta pâpia ku otus algen sobri Reinu di Deus i el ta mostra-s ma el ten serteza ma na mundu novu el ta konsigi anda otu bês. — Isa. 35:5, 6.

⁶ Pa konsigi sisti un asenbleia na nórti di Mianmar, un grupu di Tistimunhas di Jeová sai di Mandalay i es viaja três dia di barku. Es tinha vontadi di prega notísias sábi, pur isu, es leba publikasons ku bazi na Bíblia pa es pode ofereseba pa otus algen ki staba ta viaja. Tudu bês ki kel barku ta paraba na un sidadi ô na un zóna, kes Tistimunha di Jeová ta dixiba faxi i es ta dexaba kes algen di la ku publikasons. Timenti es ta staba ta prega fóra di barku, otus algen ta entraba na barku pa viajaba. I óras ki nos irmons ku irmans ta voltaba pa barku, es ta atxaba otus algen pa es papiaba ku es.

7. Di ki maneras Tistimunhas di Jeová ta da tistimunhu sobri Reinu di Deus, i kal ki é ses obijetivu?

⁷ Sima kes izénplu li ta mostra, Tistimunhas di Jeová na mundu interu sta ta da un “tistimunhu konplétu sobri Reinu di Deus” ku zelu. (Atus 28:23) Es ta bai di kaza en kaza, es ta pâpia ku pesoas na rua, es ta skrebe-s karta i es ta pâpia ku es pa tilifóni. Sénpri es ta djobe tudu oportunidadi pa da tistimunhu sobri Reinu di Deus óras ki es ta anda na otokaru, ta pâsia na prasas ô duránti intervalu di trabadju. Nu pode uza maneras diferenti, má obijetivu é kel mê: prega notísias sábi na kalker lugar ki ten algen. — Mat. 10:11.

8, 9. (a) Pamodi ki nu pode fla ma manera ki trabadju di pregason sta ta omenta oji é un milagri? (b) Ki pergunta interesanti nu pode faze, i kuzê ki nu meste faze pa atxa respósta?

⁸ Abo ki sta lé es livru, bu sta ta faze párti di kel monti di algen ki gósi sta ta prega sobri Reinu na más di 235 país? Si bu sta ta faze párti, bu pode fika kontenti pamodi bu sta ta djuda leba notísias sábi di Reinu, pa más algen na mundu interu. Kuzê ki povu di Jeová sta ta faze na mundu interu é un milagri. Sikrê ku txeu dizafiu, sima proibison di nos trabadju di pregason i pirsigison, Tistimunhas di Jeová sta ta da un tistimunhu konplétu sobri Reinu di Deus pa pesoas di tudu nason.

⁹ Kel-li ta pô-nu faze un pergunta interesanti: Pamodi ki ninhun difikuldadi, nen mésmu opozison di Satanás, ka ta konsigi inpidi pa trabadju di pregason omenta? Pa responde kel pergunta li, nu meste sabe kuzê ki kontise na ténpu di apóstlus. Afinal, oji Tistimunhas di Jeová, sta kontinua ta faze kel trabadju ki kumesa na kel ténpu.

Un trabadju txeu inportanti

10. Ki trabadju éra más inportanti pa Jizus, i kuzê ki el sabia sobri kel trabadju?

¹⁰ Prega notísias sábi di Reinu di Deus foi kel trabadju más inportanti ki Jizus faze li na téra. El forma kongregason di kristons, ki sta kontinua ta faze kel trabadju li ti dia di oji. Un bês el fla: “N ten ki pâpia tanbê di kes notísia sábi di Reinu di Deus na otus sidadi, pamodi é pa kel-li ki N mandadu.” (Luk. 4:43) Jizus sabia ma el staba ta kumesa un trabadju ki el ka ta konsigi tirminaba el sô. Poku ténpu antis di el móre, el fla ma mensajen di Reinu ta sérba pregadu “na tudu nason”. (Mar. 13:10) Má modi, i kenha ki ta ben fazeba kel-li?

11. Ki trabadju inportanti Jizus da se disiplus, i ki ajuda es ta tinha pa es pode fazeba el?

¹¹ Dipôs ki Jizus móre i el resusitadu, el parse pa se disiplus i el da-s un trabadju inportanti pa es faze. El fla-s: “Pur isu, nhos bai i nhos inxina algen di tudu nason pa es bira nhas disiplu. Nhos batiza-s na nómi di Pai, di Fidju i di spritu santu, i nhos inxina-s obidese tudu kuza ki N manda nhos. Nhos fika ta sabe ma N sta ku nhos tudu dia, ti fin di es mundu.” (Mat. 28:19, 20) Kes palavra “N sta ku nhos”, ta mostra ma Jizus ta ben djudaba se sigidoris na trabadju di prega i di faze disiplus. Es ta ben mesteba di ajuda di Jizus, pamodi dja el flaba es: “Tudu nason ta ben ôdia nhos”. (Mat. 24:9) Kes disiplu inda pode kontaba ku otu ajuda. Poku ténpu antis di el subi pa séu, Jizus fla-s ma spritu santu ta daba es puder pa es ser se tistimunhas “ti na párti más lonji di téra.” — Atus 1:8.

12. Ki perguntas inportanti nu pode faze, i pamodi ki é inportanti nu sabe kes respósta?

¹² Gósi ta parse otus pergunta inportanti: Kes apóstlu di Jizus i kes otu disiplu ta fazeba tudu kel ki es pode pa es obiba ku kel mandamentu di Jizus di prega? Kel grupu pikinoti di ómis ku mudjeris kriston, da un tistimunhu konplétu sobri Reinu di Deus, sikrê ku txeu pirsigison? Es tinha ajuda di Jeová i apoiu di se spritu santu na kel trabadju di faze disiplus? Livru di Atus ta responde kes pergunta li i otus pergunta sima kes-li. É inportanti nu sabe kes respósta li. Pamodi? Jizus promete ma kel trabadju ki el da-nu ta kontinuaba “ti fin di es mundu.” Nton, tudu kriston verdaderu, i kel-li ta inklui nos ki sta vive na ténpu di fin, meste obi ku kel mandamentu di Jizus di prega. Pur isu, nu sta txeu interesadu na studa kes stória ki sta na livru di Atus.

Informasons sobri livru di Atus

13, 14. (a) Ken ki skrebe livru di Atus, i modi ki kel skritor atxa kes informason? (b) Livru di Atus ta pâpia di kuzê?

¹³ Ken ki skrebe livru di Atus? Kel livru ka ta fla kenha ki skrebe-l, má kes palavra ki nu ta atxa na komésu di livru di Atus ta dexa klaru ma é kel mésmu algen ki skrebe Ivanjélhu di Lukas. (Luk. 1:1-4; Atus 1:1, 2) Nton, désdi ténpu antigu, pesoas ta atxa ma é Lukas ki skrebe livru di Atus. El éra “médiku” i el éra un bon storiador. (Kol. 4:14) Kel livru li ta pâpia di kuzas ki kontise duránti uns 28 anu, désdi kantu Jizus bai pa séu na anu 33 D.K. ti pa vólta di anu 61 D.K., poku ténpu antis di apóstlu Paulu tradu di kadia na Roma. Lukas staba la na kel momentu kantu kontise txeu di kes kuza ki el skrebe. Nu sabe di kel-li, pamodi el uza palavra “nu” kantu el skrebe alguns di kes kuza ki kontise na livru di Atus. (Atus 16:8-10; 20:5; 27:1) Lukas krê skrebeba kuzas sima es kontise, nton ta parse ma el pâpia ku Paulu, Barnabé, Filipi i otus algen antis di el skrebe livru di Atus.

¹⁴ Kuzê ki nu ta atxa na livru di Atus? Alguns anu antis, na se Ivanjélhu, Lukas skrebe sobri kuzas ki Jizus fla i faze. Má na livru di Atus, Lukas skrebe kuzas ki sigidoris di Jizus fla i faze. Livru di Atus ta pâpia sobri pesoas ki faze un grandi trabadju, enbóra otus ta atxaba ma es éra algen “sinplis i ku poku skóla”. (Atus 4:13) Es livru ki Lukas skrebe ku ajuda di spritu santu, ta fla-nu modi ki kongregason formadu i modi ki el ba ta kria. Livru di Atus ta mostra modi ki kristons na ténpu di apóstlus ta pregaba i kal ki éra ses atitudi. (Atus 4:31; 5:42) El ta mostra modi ki spritu santu djuda notísias sábi spadja. (Atus 8:29, 39, 40; 13:1-3; 16:6; 18:24, 25) Sima kes otu livru di Bíblia, livru di Atus ta distaka téma di Bíblia, ki é modi ki Kristu ki é Rei di Reinu di Deus, ta ben santifika nómi di Deus. Tanbê el ta mostra modi ki disiplus konsigi prega notísias sábi di Reinu, sikrê ku txeu opozison. — Atus 8:12; 19:8; 28:30, 31.

15. Modi ki studa livru di Atus ta djuda-nu?

¹⁵ Studa livru di Atus, ta anima-nu i ta poi nos fé ta bira más fórti! Óras ki nu ta midita na zelu i koraji ki kes kriston di ténpu di apóstlus mostra, kel-li ta toka nos korason. Nu ta xinti motivadu na imita ses fé. Asi, nu ta sta más ben priparadu pa kunpri kel diziginason ki Jizus da-nu di ‘bai i inxina algen pa es bira se disiplu’. Obijetivu di es livru ki bu sta lé gósi, é djuda-u faze un studu ku kuidadu di livru di Atus.

Un ajuda pa studa Bíblia

16. Kal ki é kes três obijetivu di kel publikason li?

¹⁶ Kal ki é obijetivu di es publikason? El ten três obijetivu: (1) fortalese nos kunfiansa ma Jeová, através di se spritu santu, sta ta apoia trabadju di pregason di Reinu i di faze disiplus, (2) omenta nos zelu na trabadju di pregason óras ki nu ta studa izénplu di kes kriston na ténpu di apóstlus, i (3) omenta nos ruspetu pa organizason di Jeová i pa kes ki sta ta orienta trabadju di pregason i ki sta ta toma kónta di tudu kes kongregason na mundu interu.

17, 18. Modi ki kel livru li sta organizadu, i kal ki é alguns kuza ki pode djuda-u na bu studu pesoal di Bíblia?

¹⁷ Modi ki kel livru li sta organizadu? Bu ta ben repara ma el sta divididu na 8 párti, i kada un di es ta pâpia di un párti di livru di Atus. Se obijetivu é ka studa versíklu pa versíklu, má djuda-nu tra lisons di kes kuza ki sta skrebedu i aplika kuzê ki nu prende. Na komésu di kada kapítlu ten un frazi ki ta splika kel pontu prinsipal di kapítlu, i tanbê ta ten un párti di un testu di livru di Atus ki ta ba papiadu di el na kel kapítlu.

¹⁸ Ten otus kuza na kel livru li ki ta ben djuda-u na bu studu pesoal di Bíblia. Pur izénplu, el ten imajens bunitu ki ta djuda-u imajina kes stória ki sta na livru di Atus. Txeu kapítlu ten kuadrus ku otus informason inportanti. Alguns kuadru ten informasons sobri vida di alguns algen ki Bíblia ta pâpia di el i ki nu debe imita ses fé. Otus ten más informason sobri lugaris, kuzas ki kontise, kustumus i otus algen ki Bíblia ta pâpia di el na livru di Atus.

19. Kuzê ki nu debe faze di vês en kuandu?

¹⁹ Kel livru li pode djuda-u pensa dretu sobri modi ki bu sta faze bu sirvisu pa Jeová. Ka ta inporta kantu ténpu ki dja ten ki bo é publikador di Reinu, di vês en kuandu é bon para i pensa sobri kuzê ki sta na primeru lugar na bu vida i kal ki é bu atitudi sobri trabadju di pregason. (2 Kor. 13:5) Pergunta bu kabésa: ‘Trabadju di pregason é txeu inportanti pa mi gósi sima el éra kantu N batiza? (1 Kor. 7:29-31) N sta ta prega notísias sábi ku kunfiansa i zelu? (1 Tes. 1:5, 6) N sta ta partisipa sénpri ki N pode na trabadju di prega i di faze disiplus?’ — Kol. 3:23.

20, 21. Pamodi ki nos trabadju di pregason é txeu urjenti, i kuzê ki nu debe sta disididu na faze?

²⁰ Nunka nu ka debe skese ma trabadju más inportanti ki nu pode faze é prega i faze disiplus. Kada dia ki ta pasa ta fika más urjenti prega pa otus algen. Fin di kel mundu li sta kuazi ta txiga. Oji más di ki nunka pesoas meste obi kuzê ki es debe faze pa es skapa na Armajedon. Nu ka sabe kantu algen inda ki ten un bon atitudi, i ki pode ben seta nos mensajen. (Atus 13:48) Má é nos responsabilidadi djuda kes algen li antis di ser tardi dimás. — 1 Tim. 4:16.

²¹ Pur isu, é txeu inportanti nu imita izénplu di kes primeru kriston ki prega notísias sábi di Reinu ku txeu zelu. Nu ta spera ma timenti bu ta studa es livru, el ta djuda-u prega ku más zelu i koraji, i tanbê fika más disididu na da un “tistimunhu konplétu sobri Reinu di Deus”. — Atus 28:23.