Jizus móre na Gólguta

Xéfi di saserdótis leba Jizus pa palásiu di governador. Pilátus pergunta-s: ‘Kuzê ki nhos ten kóntra kel ómi li?’ Es fla: ‘El fla ma el é rei!’ Pilátus pergunta Jizus: ‘Abo é Rei di judeus?’ Jizus responde: ‘Nha Reinu ka ta faze párti di kel mundu li.’

Nton Pilátus manda Jizus pa Eródis, ki éra governanti di Galilea, pa odja si el ta atxaba algun kuza kóntra el. Má, Eródis ka atxa nada mariadu na Jizus i el torna manda-l pa Pilátus. Nton Pilátus fla gentis: ‘Nen mi, nen Eródis nu ka atxa nada kóntra kel ómi li. N ta ben liberta-l.’ Gentis grita: ‘El é pa mata! El é pa mata!’ Trópas da Jizus ku xikóti, es kuspi-l i es sota-l. Es pô-l un koroa di spinhu na kabésa i na trósa es fla-l: ‘Bon dia, Rei di judeus.’ Más un bês Pilátus fla gentis: ‘N ka atxa nada mariadu na kel ómi li.’ Má es grita: ‘El é pa poi na staka!’ Nton Pilátus ntrega Jizus pa es mata.

Trópas leba Jizus pa un lugar ki txomaba Gólguta. La es prega-l na staka i dipôs es labanta kel staka. Jizus ora: ‘Nha pai, purdua-s, pamodi es ka sabe kuzê ki es sta faze.’ Povu fika ta faze Jizus trósa i ta fla: ‘Si bo é Fidju di Deus, dixi di staka! Salva bu kabésa.’

Un di kes kriminozu ki staba na se ladu fla-l: ‘Lenbra di mi óras ki bu entra na bu Reinu.’ Jizus promete-l: ‘Bu ta sta ku mi na Paraízu.’ Di tardi, duránti três óra, lugar fika tudu sukuru. Alguns disiplu fika pértu di staka, djuntu ku Maria, mai di Jizus. Jizus fla Juan pa kuida di Maria, sima ki éra se própi mai.

Na fin Jizus fla: ‘Dja sta!’ El nbaxa kabésa i el da se últimu fólgu. Kel óra, kontise uma tremor di téra. Na ténplu, kel kurtina pizadu ki ta siparaba Lugar Santu di Lugar Rei di Santu ratxa déntu meiu. Un xéfi di trópas fla: ‘El éra própi Fidju di Deus.’