Nos Kriador ta ama-nu i el ta kuida di nos

1. NOS KRIADOR TA POI SÓL TA SAI

Bu ta pode imajina vida na Téra sen lus di sól? Sól ta da arvis forsa pa ten fódjas ku floris i pa da frutas ku simentis. Tanbê, el ta poi kes arvi ta txupa kes agu na txon, através di raís, i ta leba kel agu pa fódjas. Dipôs, kel agu ta volta pa ar na fórma di vapor.

2. NOS KRIADOR TA POI TXUBA TA KAI

Txuba é un prezenti di Deus ki ten txeu valor, i el ta poi Téra ta da kumida pa nu kume. Deus ta da-nu txuba di séu i bon kodjéta na ténpu sértu. Asi, el ta da-nu txeu kumida i el ta intxi nos korason di alegria.

3. NOS KRIADOR TA DA-NU KUMIDA KU ROPA

Txeu pai ta preokupa dimás pa ses família ten kumida ku ropa. Má odja kuzê ki Skrituras ta fla: ‘Nhos presta atenson na kes pasu na séu; es ka ta símia, es ka ta faze kodjéta i nen es ka ta djunta na armazén, má nhos Pai, ki sta na Séu, ta da-s kumida. Nhos ka ta bale más di ki es?’ — Mateus 6:25, 26.

‘Nhos prende un lison sobri modi ki floris na kanpu ta kria. Má, N ta fla nhos ma nen [Rei] Salumon, na tudu se glória, el ka bisti sima un di es. Nton, si Deus ta bisti si un planta di kanpu, el ka ta bisti nhos mutu más inda?’ — Mateus 6:28-30.

Si Deus ten puder pa da-nu kumida ku ropa, nton nu pode ten sertéza ma el ta djuda-nu ten kes otu kuza ki nu meste pa vive. Si nu faze se vontadi, el ta abênsua sforsu ki nu ta faze pa símia pa nu pode ten kumida. Ô el pode djuda-nu atxa un trabadju pa nu kunpra kel ki nu meste. — Mateus 6:32, 33.

Di sertéza, nu ten bons motivu pa nu ama Deus óras ki nu ta pensa na kes kuza ki el ta da-nu, sima sól, txuba, pasus i floris. Na kel otu artigu, nu sta ben odja modi ki nos Kriador ta pâpia ku nos.