Modi ki nu pode vense kes dizeju mariadu?

1. Kuzê ki tudu algen sta ta luta ku el?

ALGUN bês bu xinti gana di faze un kuza ki Jeová ka gosta? Si kel-li dja kontise ku bo, ka bu fika dizanimadu. Bíblia ta fla: “Nhos sta ta pasa pa kel mésmu tentason ki tudu algen ta pasa.” (1 Kor. 10:13) Kel-li krê fla ma kalker dizeju mariadu ki bu sta ta luta ku el, otus algen sta ta luta ku el tanbê. Bu ka sta bo sô. Ku ajuda di Jeová, bu ta pode ganha.

2. Ki tipu di tentason alguns sérvu di Jeová i studantis di Bíblia ta luta ku el? (Odja kes imajen.)

² Bíblia tanbê ta fla: “Kada un ta provadu óras ki se própi dizeju ta atrai-l i ta ingoda-l.” (Tia. 1:14) Kel testu li ta djuda-nu intende ma kuzê ki pode tenta un algen pode ka tenta kel otu. Pur izénplu, alguns sérvu di Jeová ta xinti tentadu na faze konportamentu seksual mariadu ku algen di séksu diferenti i otus ku algen di mésmu séksu. Kes algen ki éra visiadu na odja pornografia pode xinti tentadu na odja-l otu bês. Txeu di kes ki éra visiadu na dróga ô na bebida alkólika ta xinti tentadu na faze mésmu kuza otu bês. Kes-li é alguns dizeju ki alguns sérvu di Jeová i studantis di Bíblia sta ta luta ku el. Talvês, na algun momentu di nos vida, nos tudu dja xinti sima apóstlu Paulu ki skrebe: “Óras ki N krê faze kel ki é dretu, kel ki é mariadu sta déntu di mi.” — Rom. 7:21.

3. Kuzê ki un algen pode kumesa ta xinti si sénpri el sta ta luta kóntra dizejus mariadu?

³ Si sénpri bu sta ta lida ku un dizeju mariadu, bu pode xinti sen forsa, sima si nunka bu ka ta konsigi vense kel tentason. Tanbê bu pode atxa ma Jeová ka ta dexa-u vive pa tudu ténpu, pamodi bu ten dizeju mariadu. Má bu pode ten serteza ma ninhun di kes kuza li é ka verdadi. Pa intende pamodi, kel studu li sta ta ben responde dôs pergunta: (1) Ken ki krê pa bu xinti sen forsa i ma bu ka ten speransa? (2) Modi ki bu pode vense es luta kóntra dizeju mariadu?

KUZÊ KI “KEL MALVADU” KRÊ PA NU PENSA?

4. (a) Kuzê ki Satanás krê pa nu pensa óras ki nu tentadu? (b) Pamodi ki nu pode ten serteza ma nu ta konsigi vense dizeju mariadu?

⁴ Satanás krê pa nu pensa ma nos é fraku óras ki nu sta ta pasa pa tentason. Jizus rekonhese kel-li kantu el inxina ses sigidor ora. El fla: “Ka bu dexa-nu kai na tentason, má libra-nu di kel Malvadu.” (Mat. 6:13) Satanás fla ma nu ka ta konsigi obi ku Jeová óras ki nu tentadu pa faze kuzas mariadu. (Jó 2:4, 5) Pamodi ki Satanás ta pensa kel-li? Satanás é kel primeru algen ki dexa se dizeju ingoda-l i el ka krê kontinuaba fiel pa Jeová. Na verdadi, Satanás ta kridita ma nos é sima el i ma nu ta bandona Jeová lógu ki nu tentadu. Ti el pensa ma el ta konsigi poba Fidju di Deus ta kai na tentason! (Mat. 4:8, 9) Má pensa na kel pergunta li: nu ka ten forsa mê pa nu konsigi ivita kai na un tentason? Nu ten sin! Nu ta konkorda ku kel ki apóstlu Paulu skrebe: “Pa tudu kuza N ten forsa grasas-a kel ki ta da-m puder.” — Flp. 4:13.

5. Modi ki nu sabe ma Jeová ten serteza ma nu ta konsigi luta kóntra nos dizeju mariadu?

⁵ Diferenti di Satanás, Jeová ten tudu serteza ma nu ta konsigi vense dizeju mariadu. Modi ki nu sabe di kel-li? Pamodi Jeová fla ma un monti di algen ta ben kontinuaba fiel pa el i es ta ben salvaba na grandi tribulason. Pensa na kuzê ki kel-li krê fla. Jeová, ki ka pode konta mintira, fla ma txeu algen, ka sô un grupu pikinoti di algen, ta ben ‘lababa ses ropa kunpridu i es ta biraba el branku na sangi di Korderu.’ (Apo. 7:9, 13, 14) Kel-li krê fla ma pa Jeová, es é algen ki mante puru i es ta ben vive na Paraízu. Ta fika klaru ma Jeová sabe ma nu ta konsigi luta kóntra nos dizeju mariadu.

6-7. Kuzê más ki Satanás krê pa nu kridita na el?

⁶ Satanás ka krê sô pa nu pensa ma nos é fraku, má tanbê el krê pa nu pensa ma Jeová ka ta dexa-nu vive pa tudu ténpu, sô pamodi nu ten dizeju mariadu. Pamodi ki Satanás krê pa nu pensa di kel manera li? Satanás é kel algen ki Jeová nunka ka ta aprova i el ta ben distruídu pa tudu ténpu. (Jén. 3:15; Apo. 20:10) Satanás ten inveja pamodi nos speransa di vive pa tudu ténpu. El ta tenta pô-nu ta pensa sima el pamodi el perde speransa di vive pa tudu ténpu. Má nu ten speransa. Na verdadi, Bíblia ta da-nu serteza ma Jeová krê djuda-nu, asi pa nu pode vive pa tudu ténpu. El “ka krê pa ningen ser distruídu, má el krê pa tudu algen rapende.” — 2 Ped. 3:9.

⁷ Pur isu, óras ki nu sta luta kóntra dizeju mariadu, si nu ta atxa ma nu ka ten forsa i ma nu ka ten soluson, nu sta ta pensa sima Satanás krê pa nu pensa. Intende kel-li ta djuda-nu sta disididu na luta kóntra Satanás. — 1 Ped. 5:8, 9.

MODI KI NOS INPERFEISON PODE PÔ-NU TA XINTI?

8. Alén di faze kuzas mariadu, kuzê más ki palavra “pekadu” krê fla? (Salmo 51:5) (Odja “Más splikason”.)

⁸ Alén di Satanás, ten otu kuza ki pode pô-nu ta xinti sen forsa ô ma nos situason ka ten soluson. É kuzê? É inperfeison, ki nos tudu nu erda di Adon ku Eva.a — Jó 14:4; lé Salmo 51:5.

9-10. (a) Modi ki Adon ku Eva xinti kantu es bira inperfeitu? (Odja imajen.) (b) Modi ki inperfeison ta pô-nu ta xinti?

⁹ Pensa na modi ki Adon ku Eva xinti kantu es bira inperfeitu. Kantu es dizobidese Jeová, es tenta sukundi i kubri ses korpu. Sobri kel asuntu li, livru Estudo Perspicaz das Escrituras, ta fla: “Pekadu pô-s ta xinti kulpadu, preokupadu dimás, sen suguransa i ku vergónha.” Pamodi kel-li, éra sima si Adon i Eva staba trankadu na un kaza ki tinha sô kuatu divizon. Adon ku Eva ta konsigi andaba déntu di kel kaza, má es ka ta konsigi saíba di la. Es ka tinha manera di skapa di inperfeison.

¹⁰ É klaru ki nu ka sta na mésmu situason di Adon ku Eva. Pamodi resgati, nu pode ten nos pekadu purduadu i un amizadi fórti ku Jeová. Má Jeová ka da resgati pa Adon ku Eva. (1 Kor. 6:11) Má simé, nu erda inperfeison di Adon ku Eva. Nton, ta da pa intende pamodi ki nos tanbê nu ta xinti kulpadu, preokupadu dimás, sen suguransa i ku vergónha. É pur isu ki Bíblia ta fla ma pekadu sta kontinua ta manda na nos korpu. I kel-li sta ta kontise ‘ti mésmu riba di kes ki ka faze pekadu sima di Adon’. (Rom. 5:14) É verdadi ki kes kuza li ta pô-nu ta xinti tristi. Má nu ka debe xinti fraku i sen speransa pa futuru. Nu pode vense kes sentimentu negativu li. Modi?

11. Óras ki nu sta xinti fraku, kuzê ki nu ka debe faze, i pamodi? (Romanus 6:12)

¹¹ Óras ki nu ta pensa: ‘Ami é fraku’ ô ‘N ka ta konsigi vense nhas dizeju mariadu’, é sima si é nos inperfeison ki sta ta pâpia. Má nu ka debe obi ku kuzê ki nos inperfeison sta fla. Pamodi? Pamodi Bíblia ta inxina ma nu ka debe dexa “pekadu kontinua ta reina” na nos. (Lé Romanus 6:12.) Kel-li krê fla ma nu pode skodje ka faze kel ki nos dizeju mariadu krê. (Gál. 5:16) Jeová ten serteza ma nu ta pode vense tentason. É pur isu ki el fla-nu pa nu faze kel-li. (Deut. 30:11-14; Rom. 6:6; 1 Tes. 4:3) Ta fika klaru ma nu ta konsigi luta kóntra dizeju mariadu.

12. Modi ki nu debe aji óras ki nu ta xinti ma nos situason ka ten soluson, i pamodi?

¹² Di mésmu manera, óras ki nu ten dizeju mariadu i nu ta pensa: ‘Nha situason ka ten soluson’ ô ‘Jeová ka ta seta nha adorason’, é sima si é nos inperfeison ki sta ta pâpia. Má nu ka debe obi ku kuzê ki nos inperfeison sta fla. Pamodi? Pamodi Bíblia ta inxina ma Jeová ta intende ma nos é inperfeitu. (Sal. 103:13, 14) El “sabe tudu kuza” sobri nos i kel-li ta inklui modi ki pekadu ta influensia kada un di nos di manera diferenti. (1 Juan 3:19, 20) Si nu luta kóntra nos dizeju mariadu i nu ka faze kel ki nos dizeju krê, nu ta ser un algen puru pa Jeová. Pamodi ki nu pode ten serteza di kel-li?

13-14. Jeová ka ta seta nos adorason sô pamodi nu ten dizeju mariadu? Splika.

¹³ Bíblia ta mostra ma ten un diferénsa grandi entri faze kel ki é mariadu (ki é un kuza ki nu ta konsigi kontrola) i dizeju di faze kel ki é mariadu (ki é un kuza ki ta kontise sen nu krê). Pur izénplu, alguns di kes algen ki bira kriston, na Korintu, na primeru séklu ta fazeba konportamentu seksual mariadu ku pesoas di mésmu séksu. Apóstlu Paulu skrebe: “Alguns di nhos éra si.” Kel-li krê fla ma nunka más es ka xinti dizeju di faze konportamentu seksual mariadu ku algen di mésmu séksu? Talvês es xinti sin, pamodi txeu bês é difísil para di ten kes dizeju li. Má Jeová ta setaba adorason di kes kriston ki ta kontrolaba ses kabésa i ki ka ta ajiba di akordu ku ses dizeju. Pa Jeová, é sima si es “labadu”. (1 Kor. 6:9-11) Pode kontise mésmu kuza ku bo.

¹⁴ Ka ta inporta ki dizeju mariadu bu sta ta luta ku el, bu ta pode vense-l. Sikrê bu ka ta pode kaba ku kes dizeju, bu pode kontrola bu kabésa i ka ‘faze vontadi di [bu] korpu i di [bu] menti.’ (Efé. 2:3) Modi ki bu pode ganha es luta kóntra dizeju mariadu?

MODI KI BU PODE VENSE?

15. Si nu krê vense es luta kóntra dizeju mariadu, pamodi ki nu meste rekonhese kal ki é nos frakéza?

¹⁵ Pa bu vense es luta kóntra dizeju mariadu, bu debe rekonhese kal ki é bus frakéza. Toma kuidadu pa bu ka ingana bu kabésa ku “pensamentus falsu.” (Tia. 1:22) Alguns algen pode atxa ma ses prubléma é ka gravi. Pur izénplu, un algen ki ta bebe txeu pode fla: “Otus algen ta bebe más di ki mi”. Ô un algen ki ten prubléma ku pornografia pode kulpa otus algen. El pode fla: “N ka ta xintiba tentadu na odja pornografia si nha mudjer ta mostraba mi más karinhu.” Si bu kumesa ta pensa di kel manera li, ta ser más fásil bu kai na tentason. Ka bu tenta da diskulpa pa kuzas mariadu ki bu ta faze, nen na pensamentu. Bo é responsável pa kuzê ki bu ta faze. — Gál. 6:7.

16. Modi ki bu pode fika más disididu na faze kel ki é dretu?

¹⁶ Alén di rekonhese bus frakéza, bu meste sta más disididu na ka kai na tentason. (1 Kor. 9:26, 27; 1 Tes. 4:4; 1 Ped. 1:15, 16) Pensa na kuzê ki más ta pô-u ta kai na tentason i na ki situason kel-li más ta kontise. Pode ser algun tipu di tentason ô algun óra di dia ki más bu ta xinti tentadu na faze kel kuza mariadu. Pur izénplu, kel-li ta kontise óras ki bu sta kansadu ô astanta di noti? Imajina un situason ki pode pô-u ta kai na tentason i pensa na modi ki bu ta ba aji. Midjór óra pa bu faze kel-li é antis di kel tentason parse. — Pro. 22:3.

17. Kuzê ki nu pode prende ku izénplu di Juzé? (Jénezis 39:7-9) (Odja kes imajen.)

¹⁷ Repara modi ki Juzé reaji kantu mudjer di Putifar tenta seduzi-l. El fla nau klaru i rápidu. (Lé Jénezis 39:7-9.) Kuzê ki nu ta prende? Antis di mudjer di Putifar tenta seduzi Juzé, dja el staba disididu na nunka ka faze konportamentu seksual mariadu ku mudjer di un otu ómi. Di mésmu manera, bu pode sta disididu na faze kel ki é dretu antis di parse un tentason. Di kel manera li, óras ki parse un tentason, ta ser más fásil bu aji di akordu ku kel disizon ki dja bu tomaba antis.

“KONTINUA TA DJOBE” MODI KI BU STA

18. Modi ki bu pode vense es luta kóntra dizeju mariadu? (2 Koríntius 13:5)

¹⁸ Pa bu vense es luta kóntra dizeju mariadu, bu meste “kontinua ta djobe” modi ki bu sta. (Lé 2 Koríntius 13:5.) Sénpri djobe kes kuza ki bu ta pensa i kes kuza ki bu ta faze, i faze mudansa na undi ki meste. Pur izénplu, mésmu óras ki bu konsigi nega un tentason, faze kel pergunta li: ‘Kantu ténpu N dimora pa fla nau?’ Si bu da kónta ma bu dimora, ka bu fika xatiadu. Envês di kel-li, pensa na kuzê ki bu pode faze pa bu pode midjora na prósimu bês. Faze kes pergunta li: ‘Óras ki un pensamentu mariadu ta ben na nha kabésa, N ta para di pensa na el kel óra? Kuzas ki N ta skodje pa N divirti ku el ta pô-m ta kai na tentason más faxi? Lógu ki parse un imajen mariadu, N ta tra nha odju di el kel óra? N ta intende ma leis di Jeová é sénpri midjór, mésmu óras ki N ten ki sforsa pa kontrola nha kabésa?’ — Sal. 101:3.

19. Modi ki toma maus disizon na asuntus pikinoti pode prujudika nos luta kóntra dizeju mariadu?

¹⁹ Ka bu tenta da diskulpa pa kes kuza mariadu ki bu faze. Bíblia ta fla: ‘Korason ta trai algen más di ki kalker otu kuza i el sta dizusperadu.’ (Jer. 17:9) Jizus fla ma “di korason ta sai pensamentus mariadu”. (Mat. 15:19) Pur izénplu, un algen ki para di odja pornografia dipôs di algen ténpu pode pensa ma é ka prigozu odja kes imajen ki ta poi algen ku gana di faze séksu désdi ki kes imajen ka ta mostra un algen tudu nu. Ô talvês el pode pensa: ‘Ka ten nada di mariadu N imajina ta faze kuzas mariadu, désdi ki N ka faze-s.’ Si un algen pensa di kel manera li, é sima si el sta ta “faze planu pa faze kuzas di akordu ku dizejus di karni.” (Rom. 13:14) Modi ki bu pode ivita faze kel-li? Toma kuidadu ku bus disizon. Si bu toma maus disizon na asuntus pikinoti, es ta pô-u ta toma maus disizon na asuntus más grandi, sima pur izénplu, kai na un tentason.b Ivita kalker ideia ô “pensamentus mariadu” ki ta pô-u ta da diskulpa pa un kuza mariadu ki bu ta faze.

20. Kal ki é nos speransa pa futuru i kuzê ki pode djuda-nu gósi?

²⁰ Sima dja nu prende, Jeová ta da-nu puder pa nu ka kai na tentason. Tanbê, pamodi resgati, nu pode ten nos pekadu purduadu i speransa di vive pa tudu ténpu na mundu novu. Nu ta ben fika kontenti di sirbi Jeová ku un menti i un korason puru! Timenti nu ta spera pa kel-li kontise, nu pode ten serteza ma nu ten forsa i speransa ma nu ta konsigi luta kóntra dizeju mariadu. Ku nos sforsu i ku benson di Jeová, nu ta pode vense!