Perguntas ki leitoris ta faze

Ki ténpu ki trabadju di pregason ta tirmina?

Jizus fla: “Kes notísia sábi di Reinu ta ben pregadu na mundu interu pa sirbi di tistimunhu pa tudu nason, i dipôs fin ta ben.” (Mat. 24:14) Kel palavra gregu ki ta traduzidu pa “fin” na es versiklu i tanbê na versiklu 6 i 13 é télos. El sta ta pâpia di fin di mundu di Satanás na Armajedon. (Apo. 16:14, 16) Kel-li krê fla ma nu ta ben kontinua ta prega kes notísia sábi ti poku ténpu antis di Armajedon kumesa.

Kel-li ta muda manera ki nu ta intendeba kel versiklu li antis. Antis nu ta intendeba ma nu ta ben paraba di prega kes notísia sábi óras ki grandi tribulason kumesa, ki é óras ki Babilónia Grandi distruídu. (Apo. 17:3, 5, 15, 16) Nu ta kriditaba ma kel-li ta markaba fin di kel ‘anu di bon vontadi di Jeová’. (Isa. 61:2) Tanbê nu ta kriditaba ma kes algen ki pode ben sobrivive na grandi tribulason é kes ki dja prova ma es ta sirbi Jeová di manera fiel antis di grandi tribulason kumesa. Nu ta konparaba kel-li ku kes judeu ki sobrivive kantu Jiruzalen distruídu na anu 607 A.K. Kes algen li dja staba markadu pa sobrivive pamodi es ta adoraba Jeová i es ta odiaba maldadi. (Eze. 5:11; 9:4) Má kel konparason li ka sta di akordu ku kuzê ki Jizus fla na Mateus 24:14, ki ta mostra ma pesoas pode ten oportunidadi di seta notísia sábi ti poku ténpu antis di fin, ki é na Armajedon.

Pamodi gósi nu ta intende midjór kuzê ki Mateus 24:14 ta fla, tanbê nu meste muda manera ki nu ta intende Apokalipse 16:21, ki ta pâpia sobri pédras grandi di granizu. Fazedu más piskiza ki ta prova ma kes dôs testu li sta ligadu ku kunpanheru. Modi? Kuzê ki djuda-nu sabe kel-li é modi ki Bíblia ta fla ma pesoas ta reaji óras ki es ta obi kel mensajen ki nu ta prega. Apóstlu Paulu skrebe ma pa “kes ki sta na kaminhu di salvason”, kel mensajen ki nu ta prega é un notísia sábi sima “txeru di vida.” Má, pa kes inimigu di Deus é un mau notísia, sima “txeru di mórti.” (2 Kor. 2:15, 16) Es ta ôdia kel mensajen ki nu ta prega pamodi el ta mostra ma es mundu ki es ta ama é mau, ma é Satanás ki sta governa-l i já-já el ta ben ser distruídu. — Juan 7:7; 1 Juan 2:17; 5:19.

Repara tanbê ma kel tenpistadi di granizu ki Apokalipse 16:21 ta pâpia di el ta ben ser “grandi dimás.” Kel-li krê fla ma talvês duránti grandi tribulason trabadju di pregason ta ganha más forsa inda pamodi nómi di Jeová ta fika más konxedu di ki nunka. (Eze. 39:7) Nton, na kel ténpu dipôs ki Babilónia Grandi distruídu, alguns ta ben gosta di notísia sábi sima es gosta di un txeru sábi? Kel-li pode kontise. Talvês es pode lenbra ô prende ma duránti txeu anu Tistimunhas di Jeová dja flaba ma relijion falsu ta ben sérba distruídu.

Kel-li ta faze-nu lenbra di kuzê ki kontise na Ijitu, na ténpu antigu, kantu Deus manda kes 10 praga. Dipôs ki Jeová “kastiga tudu kes Deus di Ijitu,” un “monti di algen ki ka éra israelita” djunta ku povu di Jeová. (Ézu. 12:12, 37, 38) Kes stranjeru talvês skodje bai djuntu ku povu di Jeová kantu es odja ma tudu kes kuza ki Muizés fla-s sobri kes 10 praga kontise.

Kalker algen ki volta pa Jeová dipôs ki Babilónia Grandi distruídu, ta ben ten priviléjiu di apoia kes irmon di Kristu ki inda ta sta na téra. (Mat. 25:34-36, 40) É klaru ki kel oportunidadi di ser julgadu sima un ovelha ta tirmina poku ténpu antis di Armajedon, óras ki kes skodjedu ku spritu santu ki inda ta sta na téra ta resebe ses rekonpénsa di bai pa séu.

Kel novu intendimentu li ta djuda-nu intende midjór kel grandi amor i mizerikórdia di Jeová. Ta fika klaru ma el “ka krê pa ningen ser distruídu, má el krê pa tudu algen rapende.” — 2 Ped. 3:9.