Govérnus na mundu interu dja gasta más di 2 trilhon di dóla ku armas — Kuzê ki Bíblia ta fla?

Duránti 2022, govérnus na mundu interu gasta 2,24 trilhon di dóla na armas. Ti gósi kel-li é valor más altu ki dja gastadu na kes kuza li. Es txiga na kel valor li pamodi Rúsia invadi Ukránia. Sobri kuzê ki gastadu na 2022, un organizasona lansa un rilatóriu na abril di 2023, ki ta fla:

• Dinheru ki Europa gasta na géra ku armas “omenta 13 pursentu na 2022. Kel-li é kel dinheru más txeu na un anu ki Europa gasta désdi fin di géra fria.”

• “Dinheru ki Rúsia... gasta omenta 9,2 pursentu. Rúsia pasa ta ser kel tirseru país na mundu ki gasta más dinheru na géra.”

• Mérka kontinua ta ser kel país ki ta gasta más dinheru na armas pamodi “di tudu kel dinheru ki govérnus di mundu interu ta gasta na armas, 39 pursentu é di Mérka.”

Dotor Nan Tian, ki tanbê partisipa na faze kel rilatóriu di SIPRI, fla: “Dinheru ki dja gastadu na armas na kes últimu anu, ta mostra ma nu sta ta vive na un mundu ki sta kada bês más sen suguransa.”

Bíblia dja flaba ma na nos ténpu ta ben tinha géra entri govérnus di mundu interu i tanbê el fla kal ki é úniku speransa di pas ki nu ten.

Kuzê ki Bíblia dja flaba sobri géras

• Bíblia ta txoma kel ténpu ki nu sta ta vive di ténpu ‘di fin’. — Daniel 8:19.

• Livru di Daniel dja flaba ma duránti kel ténpu li, govérnus na mundu interu ta konpitiba ku kunpanheru. Kes govérnu na mundu interu ta ben ‘pintxaba kunpanheru,’ ô briga ku kunpanheru pa djobe kal di es ki ta kontrola mundu. Kel géra li ta poba es ta gastaba txeu ‘tizoru’ ô dinheru. — Daniel 11:40, 42, 43.

Pa sabe más sobri kel profesia li, odja vídiu Modi ki profesia di Daniel kapítlu 11 kunpri.

Modi ki ta ben ten pas di verdadi

• Bíblia ta fla ma Deus ta ben kaba ku govérnus di ómi. El ta ‘ben traze un Reinu ki ka ta kaba nunka más. I kel Reinu li ka ta pasa pa mô di ninhun otu povu. El ta ben disfaze i el ta ben kaba ku tudu kes otu reinu i el sô ta ben fika pa tudu ténpu’. — Daniel 2:44.

• Ka ta dura, Jeováb Deus ta ben faze un kuza ki ómis ka ta konsigi faze, ki é traze pas di verdadi pa tudu ténpu. Di ki manera? Se govérnu na séu ta ben kaba ku tudu arma i ku tudu violénsia. — Salmo 46:8, 9.

Pa sabe más sobri kuzê ki Reinu di Deus ta ben faze, lé artigu ku téma “Reinu di Deus ta ben ‘traze txeu pas’”.