Mateo
28 Naq ak xnumeʼk li sábado* ut yook chi hikʼeʼk ru li xbʼeen kutan re li xamaan, li xMaría ut li xMaría Magdalena xkohebʼ rilbʼal li muqlebʼaal.
2 Ut kiwank jun li nimla hiik li kʼajoʼ xkawil xbʼaan naq li xʼánjel li Jehobʼa* kikubʼeek chaq saʼ choxa, kijilok chixkʼatq li muqlebʼaal, kixtolkʼosi li pek ut kikanaak chi chunchu saʼ xbʼeen. 3 Nalemtzʼunk li ánjel joʼ li xrepom kaaq, ut saq ru li xtʼikr joʼ li ratzʼamke. 4 Joʼkan naq ebʼ laj kʼaakʼalenel nekeʼsiksotk xbʼaanebʼ xxiw ut inkʼaʼ chik nekeʼekʼank saʼ xnaʼaj.
5 Li ánjel kixye rehebʼ li ixq: «Mexxuwak. Ninnaw naq yookex xsikʼbʼal li Jesús, li kitʼuyubʼaak chiru cheʼ. 6 Moko wank ta arin xbʼaan naq ak xwaklesiik chi yoʼyo joʼ kixye chaq aʼan. Kimqex ut ilomaq li naʼajej bʼarwiʼ xjilibʼaak. 7 Ut anaqwan ayuqex saʼ junpaat ut yeehomaq chaq rehebʼ li xtzolom: “Ak xwaklesiik chi yoʼyo saʼ xyanqebʼ li kamenaq ut yook cheeru saʼ xbʼehil Galilea ut aran teeril ru”. Aʼin li xinchalk xyeebʼal eere».
8 Usta teʼxuwaq ebʼ li ixq, qʼaxal sahebʼ saʼ xchʼool. Saʼ junpaat xeʼelk bʼarwiʼ wank li muqlebʼaal ut xkohebʼ saʼ aanil chi xseeraqʼinkil rehebʼ li xtzolom li Jesús. 9 Li Jesús kixtawebʼ saʼ bʼe ut kixye rehebʼ: «Ma sa leechʼool?». Ebʼ li ixq xeʼjilok chixkʼatq, xeʼxwiqʼibʼ ribʼ chiru ut xeʼxqʼalu li roq. 10 Tojaʼ naq li Jesús kixye rehebʼ: «Mexxuwak. Ayuqex ut yeehomaq rehebʼ li wiitzʼin naq xikaqebʼ Galilea ut aran teʼril wu».
11 Naq ebʼ li ixq yookebʼ chiru bʼe, wiibʼ oxibʼ laj kʼaakʼalenel xkohebʼ saʼ li tenamit ut xeʼxye rehebʼ li xbʼeenil aj tij chixjunil li kikʼulmank. 12 Ut ebʼ li xbʼeenil aj tij xeʼxchʼutubʼ ribʼ rikʼinebʼ li cheekel winq re xnawbʼal kʼaru teʼxbʼaanu, ut xeʼxkʼe rehebʼ laj puubʼ naabʼal li tumin re plaat 13 ut xeʼxye rehebʼ: «Laaʼex teeye: “Ebʼ li xtzolom xeʼkʼulunk chi qʼeq ut xeʼrelqʼa li kamenaq naq yooko chi wark”. 14 Ut wi tixnaw aʼin laj Pilaat, laaʼo tqachʼolobʼ chiru. Laaʼex mexxuwak». 15 Chi joʼkaʼin, ebʼ laj puubʼ xeʼkanaak rikʼin li tumin re plaat ut xeʼxbʼaanu li kiyeemank rehebʼ. Ut li naʼlebʼ aʼin toj yook chi sutunk anaqwan saʼ xyanqebʼ laj judiiy.
16 Abʼanan, li junlaju chi tzolom xkohebʼ Galilea saʼ li tzuul bʼarwiʼ teʼxtaw ribʼ rikʼin li Jesús joʼ kixye chaq rehebʼ. 17 Naq xeʼril, xeʼxwiqʼibʼ ribʼ chiru. Abʼan wiibʼ oxibʼ rehebʼ toj yookebʼ xkʼaʼuxl chirix. 18 Li Jesús kijilok rikʼinebʼ ut kixye rehebʼ: «Kʼebʼil we chixjunil li wankilal saʼ choxa ut saʼ ruuchichʼochʼ. 19 Joʼkan naq, ayuqex ut kʼehomaq choʼq intzolom ebʼ li qas qiitzʼin re chixjunilebʼ li tenamit. Teekubʼsihebʼ xhaʼ saʼ xkʼabʼaʼ li Yuwaʼbʼej, li Alalbʼej ut li santil musiqʼej. 20 Kʼutumaq chiruhebʼ xpaabʼankil chixjunil li xexintaqla wiʼ. Ut jultikaq eere naq wanqin eerikʼin wulaj wulaj toj reetal twulaq ebʼ li kutan li tixkʼutbʼesi naq nachʼ wank li xraqik li ruuchichʼochʼ».*