Sábado 9 re agosto
Li naraj wank choʼq intzolom, inkʼaʼ chik twanq joʼ naraj aʼan, tento tixkʼulubʼa li rahobʼtesiik ut mixkanabʼ intaqenkil (Luc. 9:23).
Maare xikʼ xat-ileʼk xbʼaan jun rehebʼ laakomon malaj tento xaakanabʼ laajunkabʼlal xbʼaan naq xaakʼe li Xʼawabʼejilal li Yos chiʼubʼej (Mat. 6:33). Wi joʼkan, chʼolchʼooq chaawu naq li Jehobʼa naxnaw chixjunil li xaabʼaanu saʼ xkʼabʼaʼ (Heb. 6:10). Maare ak xaakʼe reetal naq tzʼaqal yaal li aatin li kixye li Jesús: «Li kixkanabʼ rochoch, ras ut riitzʼin, ranabʼ, xnaʼ, xyuwaʼ, ralal xkʼajol malaj xchʼochʼ saʼ inkʼabʼaʼ ut saʼ xkʼabʼaʼ li chaabʼil esil tixkʼul anaqwan, saʼebʼ li kutan aʼin, jun siʼeent sut chik saʼ xbʼeen chiru li kixkanabʼ chaq: rochoch, ras ut riitzʼin, ranabʼ, xnaʼ, ralal xkʼajol ut xchʼochʼ usta yooq li rahobʼtesiik, ut saʼ li kutan li yook chi chalk tixkʼul li junelik yuʼam» (Mar. 10:29, 30). Chʼolchʼo naq chixjunil li ak xaakanabʼ bʼabʼay chiru chixjunil li osobʼtesihom li yookat xkʼulbʼal (Sal. 37:4). w24.03 9 raqal 5
Domingo 10 re agosto
Li tzʼaqal amiiw junelik narahok; saʼ xqʼehil junaq rahilal tatxtenqʼa joʼ junaq tzʼaqal asbʼej (Prov. 17:17).
Naq ebʼ laj paabʼanel re Judea xeʼxkʼul li nimla weʼej, ebʼ li hermaan re Antioquía, «keʼxkʼuubʼ, aʼ yaal joʼnimal wank re li junjunq, xtaqlankil xtenqʼankilebʼ laj paabʼanel li wankebʼ Judea» (Hech. 11:27-30). Usta ebʼ li hermaan li wankebʼ saʼ rajbʼal ru najt wankebʼ, ebʼ laj paabʼanel re Antioquía xeʼxkʼe xchʼool chi xtenqʼankilebʼ (1 Juan 3:17, 18). Tooruuq xkʼutbʼesinkil li toqʼobʼank u naq ebʼ li hermaan nekeʼxnumsi li rahilal. Saʼ junpaat tooruuq tenqʼank: xyeebʼal rehebʼ li cheekel winq naq naqaj tenqʼank, kʼehok rikʼin tenqʼ tumin ut tijok chirixebʼ li yookebʼ xkʼulbʼal li rahilal. Maare ebʼ li hermaan t-ajmanq chiruhebʼ naq teʼtenqʼaaq ajwiʼ rikʼin li naʼajmank chiruhebʼ. Naq li Jesukriist tchalq chi raqok aatin naqaj naq tixkʼe reetal naq yooko chi toqʼobʼank u ut tixye qe: «Eechanihomaq li nimajwal wankilal» (Mat. 25:34-40). w23.07 4 raqal 9, 10; 6 raqal 12
Lunes 11 re agosto
Xkʼehaqebʼ reetal ebʼ li qas qiitzʼin naq inkʼaʼ nekeemin ruhebʼ li junchʼol chi xkʼulubʼankil li nekeeye (Filip. 4:5).
Li Jesús nanaʼlebʼak chiʼus joʼ li Jehobʼa, aʼin kikʼutunk naq kiwank saʼ Ruuchichʼochʼ. Usta kitaqlaak chi puktesink «kaʼajwiʼ rikʼinebʼ li karneer sachenaq, aʼebʼ laj Israel», saʼ jun kutan kixtenqʼa jun li ixq li maawaʼ aj Israel. Kixtzʼaama chiru naq tixkʼirtasi li xkoʼ li «rahobʼtesinbʼil xbʼaan laj tza!». Kixtoqʼobʼa ru ut kixkʼirtasi li xkoʼ (Mat. 15:21-28). Qakʼoxlaq jun chik li eetalil. Naq tojeʼaq kixtikibʼ li xkʼanjel li Jesús saʼ Ruuchichʼochʼ kixye: «Li taatzʼeqtaananq we […], tintzʼeqtaana ajwiʼ laaʼin» (Mat. 10:33). Abʼan li Jesús moko kixtzʼeqtaana ta laj Pedro saʼ xkʼabʼaʼ naq oxibʼ sut kipaltoʼk chiru. Li Jesús naxnaw naq laj Pedro kixyotʼ xchʼool ut chaabʼil xnaʼlebʼ. Naq ak xwakliik chi yoʼyo, li Jesús kixkʼut ribʼ chiru laj Pedro ut kixchʼolobʼ chiru naq xkuyeʼk xmaak ut naq naraheʼk (Luc. 24:33, 34). Li Jehobʼa ut li Jesús nekeʼnaʼlebʼak chiʼus. Ut laaʼo? Li Jehobʼa naroybʼeni naq joʼkan toonaʼlebʼaq. w23.07 21 raqal 6, 7