Juan

19 Tojaʼ naq laj Pilaat kixye naq teʼxkʼam li Jesús ut teʼxkʼe chi tzʼuum.* 2 Ut ebʼ laj puubʼ xeʼxtzʼul jun li koroon re kʼix ut xeʼxkʼe saʼ xjolom, ut xeʼxkʼe chirix jun li tʼikr kaq moyink. 3 Xeʼjilok chixkʼatq ut xeʼxye re: «At awabʼej rehebʼ laj judiiy naqakʼe xsahil aachʼool!». Nekeʼxtzʼaji ajwiʼ chi ruqʼ. 4 Laj Pilaat kiʼelk wiʼ chik ut kixye re li kʼiila tenamit: «Abʼihomaq! Xinkʼam chaq arin chirix kabʼl re naq teenaw naq inkʼaʼ nintaw xmaak». 5 Tojaʼ naq li Jesús kiʼelk, wank li koroon re kʼix saʼ xjolom ut tiqto rikʼin li tʼikr kaq moyink. Ut laj Pilaat kixye rehebʼ: «Ilomaq, aʼin li winq!». 6 Abʼan, naq ebʼ li xbʼeenil aj tij ut ebʼ laj kʼaakʼalenel xeʼril ru, xeʼxjap re chi xyeebʼal: «Tʼuyubʼamaq chiru cheʼ! Tʼuyubʼamaq chiru cheʼ!». Laj Pilaat kixye rehebʼ: «Kʼamomaq ut tʼuyubʼamaq chiru cheʼ laaʼex xbʼaan naq laaʼin inkʼaʼ nintaw xmaak». 7 Ebʼ laj judiiy xeʼxsume ut xeʼxye re: «Laaʼo wank jun qachaqʼrabʼ, ut joʼ naxye li chaqʼrabʼ tento tkamq xbʼaan naq kixye naq aʼan ralal li Yos».

8 Naq laj Pilaat kirabʼi li yookebʼ xyeebʼal, qʼaxal kixuwak 9 ut kiʼok wiʼ chik saʼ rochoch li ruuchil awabʼej ut kixpatzʼ re li Jesús: «Aj bʼarat?». Abʼan li Jesús inkʼaʼ kichaqʼok. 10 Joʼkan naq laj Pilaat kixye re: «Ma inkʼaʼ nakaawaj waatinankil? Ma inkʼaʼ nakaanaw naq wank inwankil re aawisinkil ut wank inwankil re aakamsinkil?».* 11 Li Jesús kixsume ut kixye re: «Maakʼaʼ raj aawankil saʼ inbʼeen wi li wank taqeʼq moko xkʼe ta raj aaleseens. Joʼkan naq li xmaak li winq li kinxqʼaxtesi saʼ laawuqʼ qʼaxal nim wiʼ chik».

12 Saʼ xkʼabʼaʼ aʼin, laj Pilaat kiʼok xsikʼbʼal xyaalal chanru tixkanabʼ chi xik. Abʼan ebʼ laj judiiy xeʼok xjapbʼal re chi kaw: «Wi nakaakanabʼ chi xik maawaʼat ramiiw li awabʼej re Roma. Li naxkʼe ribʼ choʼq awabʼej naxqʼet ribʼ chiru li awabʼej re Roma!». 13 Naq laj Pilaat kirabʼi ebʼ li aatin aʼin, kirisi chirix kabʼl li Jesús ut kichunlaak saʼ xnaʼaj laj raqol aatin. Li naʼaj aʼin naxkʼabʼaʼi Pekinbʼil ru, Gábbatha saʼ hebreo. 14 Aʼan chaq xkutankil li Paswa ut kachʼin chik ma tuqtu waʼlebʼ. Ut kixye rehebʼ laj judiiy: «Ilomaq aʼin leeʼawabʼej!». 15 Abʼan ebʼ aʼan xeʼxjap re chi xyeebʼal: «Kamsi li winq aʼin! Kamsi li winq aʼin! Tʼuyubʼ chiru cheʼ!». Laj Pilaat kixye rehebʼ: «Ma nekeeraj naq tinkamsi leeʼawabʼej?». Ebʼ li xbʼeenil aj tij xeʼxye re: «Maakʼaʼ jun chik qaʼawabʼej kaʼajwiʼ li awabʼej re Roma». 16 Chirix chik aʼan kixqʼaxtesi li Jesús re naq teʼxtʼuyubʼ chiru cheʼ.

Ut saʼ ruqʼebʼ chik kikanaak. 17 Kixpaqo li xcheʼ* ut xkoho saʼ li naʼaj li naxkʼabʼaʼi Gólgota saʼ hebreo, li naraj xyeebʼal Xnaʼaj Xjolom li Kamenaq. 18 Aran xeʼxklawxi chiru cheʼ rochbʼeen wiibʼ li winq, jun saʼ xnim ut jun saʼ xtzʼe. 19 Chirix chik aʼan laj Pilaat kixtzʼiibʼa aʼin: «Li Jesús, aj Nazaret, li awabʼej rehebʼ laj judiiy» ut kixletz chiru li cheʼ li kitʼuyubʼaak wiʼ li Jesús. 20 Naabʼal rehebʼ laj judiiy xeʼril li naxye li tzʼiibʼ aʼin xbʼaan naq li naʼaj bʼarwiʼ kiklawxiik li Jesús nachʼ wank rikʼin li tenamit. Li tzʼiibʼ wank ajwiʼ saʼ hebreo, saʼ latín ut saʼ griego. 21 Abʼan ebʼ li xbʼeenil aj tij rehebʼ laj judiiy xeʼxye re laj Pilaat: «Maatzʼiibʼa “Li awabʼej rehebʼ laj judiiy” xbʼaan naq aʼan kixye “Laaʼin li awabʼej rehebʼ laj judiiy”». 22 Laj Pilaat kixsume ut kixye: «Li xintzʼiibʼa, ak tzʼiibʼanbʼil chik».

23 Naq ak klawxinbʼil chik li Jesús, ebʼ laj puubʼ xeʼxchap li xtʼikr ut xeʼrisi saʼ kaahibʼ, junjunq rehebʼ laj puubʼ ut xeʼxchap li xjut-aqʼ. Abʼan li jut-aqʼ maakʼaʼ xbʼojolal xbʼaan naq kembʼil chalen taqeʼq toj taqʼa. 24 Joʼkan naq xeʼok xyeebʼal chiribʼilebʼ ribʼ: «Inkʼaʼ tqapej. Qabʼuuliq rix* re rilbʼal ani t-echaninq re». Aʼin kikʼulmank re naq ttzʼaqloq ru li xraqal li Raatin li Yos li naxye: «Xeʼxjekʼi lintʼikr chirixebʼ ut xeʼxbʼuuli rix* linjut-aqʼ». Ut aʼan tzʼaqal li xeʼxbʼaanu ebʼ laj puubʼ.

25 Chixkʼatq li cheʼ li tʼuytʼu wiʼ li Jesús wank chaq li xnaʼ, li riitzʼin li xnaʼ; wank ajwiʼ li xMaría, rixaqil laj Clopas, ut li xMaría Magdalena. 26 Naq li Jesús kiril chi nachʼ li xnaʼ ut kiril li xtzolom li qʼaxal naxra, kixye re li xnaʼ: «At ixq aran wank laayum!». 27 Moqon chik kixye re li xtzolom: «Aran wank laanaʼ!». Ut chalen saʼ li hoonal aʼan, li xnaʼ li Jesús kikanaak saʼ rochoch li xtzolom.

28 Chirix chik aʼan, li Jesús ak naxnaw naq xtzʼaqlok ru chixjunil. Li Jesús kixye: «Tchaqiq we». Chi joʼkaʼin kitzʼaqlok ru li Raatin li Yos. 29 Ut aran wank chaq jun xaar li bʼiin li ra re, xeʼxkʼe jun li espoonj* saʼ ruʼuj jun li cheʼ* ut xeʼxjilosi saʼ re. 30 Naq li Jesús kixyal li bʼiin li ra re, kixye: «Ak xtzʼaqlok ru!». Chirix chik aʼan kixxulubʼ xjolom ut kikamk.*

31 Saʼ xkʼabʼaʼ naq xkutankil li kawresink, ebʼ laj judiiy xeʼxye re laj Pilaat naq ttoqmanq li raʼ ebʼ li winq ut teʼkubʼsiiq re naq inkʼaʼ teʼkanaaq chi tʼuytʼu chiru cheʼ saʼ sábado* (xbʼaan naq li kutan aʼin jun nimla sábado).* 32 Joʼkan bʼiʼ, ebʼ laj puubʼ xkohebʼ chi xtoqbʼal li raʼ li xbʼeen winq ut joʼkan ajwiʼ xeʼxbʼaanu re li jun chik winq li tʼuytʼu chixkʼatq li Jesús. 33 Abʼan naq xeʼwulak bʼarwiʼ wank li Jesús, xeʼril naq kamenaq chik, joʼkan naq inkʼaʼ xeʼxtoq li raʼ. 34 Abʼan jun rehebʼ laj puubʼ kixchʼik jun li jutzʼcheʼ, li wank chʼiichʼ saʼ ruʼuj, chixkʼatq xsaʼ ut saʼ junpaat kiʼelk kikʼ ut haʼ. 35 Ut li kiʼilok re aʼin naxkʼe chi naweʼk ut li naxkʼe chi naweʼk yaal ut aʼan naxnaw naq li naxye yaal re naq laaʼex ajwiʼ teepaabʼ. 36 Aʼin kikʼulmank re naq ttzʼaqloq ru li xraqal li Raatin li Yos li naxye: «Maajun xbʼaqel ttoqmanq». 37 Joʼkan ajwiʼ wank jun chik li xraqal li Raatin li Yos li naxye: «Teʼril li xeʼxkʼobʼ rikʼin jutzʼchʼiichʼ».

38 Chirix chik aʼin, laj José re Arimatea kixpatzʼ re laj Pilaat ma truuq xkʼambʼal li xtibʼel li Jesús, ut laj Pilaat kixkʼe xleseens, joʼkan naq kikʼulunk ut kixkʼam li xtibʼel li Jesús. Laj José aʼan chaq jun rehebʼ li xtzolom li Jesús abʼan naxbʼaanu saʼ muqmu xbʼaan naq naxxuwahebʼ laj judiiy. 39 Kiwulak ajwiʼ laj Nicodemo ut rikʼin wank jun siʼeent liibʼr* tana li miir yukʼinbʼil rikʼin sununkil bʼan. Laj Nicodemo aʼan li winq li kiwulak xbʼeen sut chi rilbʼal li Jesús chiru qʼoqyink. 40 Xeʼxxok li xtibʼel li Jesús, xeʼxbʼat saʼ jun li tʼikr re liin li wank sununkil bʼan chiru ut xeʼxbʼaanu aʼin joʼ kʼaynaqebʼ chaq xbʼaanunkil ebʼ laj judiiy naq nekeʼxmuq li xkamenaq. 41 Ut wank chaq jun xnaʼaj ebʼ li uutzʼuʼuj bʼarwiʼ kitʼuyubʼaak li Jesús ut saʼ li naʼaj aʼin wank jun li akʼ muqlebʼaal li toj maajiʼ nakʼemank kamenaq chisaʼ. 42 Saʼ xkʼabʼaʼ naq aʼin xkutankil li kawresink choʼq rehebʼ laj judiiy ut nachʼ wank li muqlebʼaal, aran xeʼxkʼe li Jesús.