Hechos

16 Tojaʼ naq kiwulak Derbe ut chirix chik aʼan Listra. Aran wank chaq jun li saaj winq li naxtaqe li Jesús, aj Timoteo xkʼabʼaʼ. Li xnaʼ aj judiiy ut aj paabʼanel, abʼan li xyuwaʼ aj griego. 2 Ut ebʼ laj paabʼanel li wankebʼ Listra ut Iconio chaabʼil nekeʼaatinak chirix. 3 Laj Pablo kixye naq naraj naq t-ochbʼeeniiq xbʼaan laj Timoteo joʼkan naq kixkʼam ut kixset xtzʼuumal xtzʼejwal. Kixbʼaanu aʼin xbʼaan naq ebʼ laj judiiy li wankebʼ aran nekeʼxnaw naq aj griego li xyuwaʼ laj Timoteo. 4 Naq yookebʼ chi numeʼk saʼ jalan jalanq chi tenamit, nekeʼxye chaq rehebʼ laj paabʼanel li naʼlebʼ li xeʼxkʼubʼ ebʼ li apóstol ut ebʼ li cheekel winq li wankebʼ Jerusalén re naq teʼxpaabʼ. 5 Ut saʼ xkʼabʼaʼ aʼin ebʼ li chʼuut inkʼaʼ xeʼxkanabʼ kʼiik saʼebʼ li xpaabʼal ut wulaj wulaj yookebʼ chi tamk.

6 Xeʼnumeʼk ajwiʼ Frigia ut saʼ li teep Galacia xbʼaan naq li santil musiqʼej kixram chiruhebʼ xkʼebʼal resil li raatin li Yos saʼ xweent Asia. 7 Joʼkan ajwiʼ, naq xeʼwulak Misia, xeʼxyal ok Bitinia, abʼan saʼ xkʼabʼaʼ li santil musiqʼej li Jesús inkʼaʼ kixkanabʼebʼ chi xbʼaanunkil. 8 Joʼkan naq xeʼnumeʼk Misia ut xeʼkubʼeek Troas. 9 Chiru li qʼoqyink, laj Pablo kiril saʼ jun li moy u: jun li winq aj macedonio li xaqxo chiru ut yook xtzʼaamankil re: «Kim arin Macedonia ut tenqʼaho». 10 Naq ak xril li moy u, xqayal xik Macedonia xbʼaan naq xqakʼe reetal naq li Yos xbʼoqok qe re naq tqakʼe chi naweʼk aran li chaabʼil esil.

11 Joʼkan naq xootaqeʼk saʼ jun li jukubʼ aran Troas toj reetal xoowulak Samotracia. Ut wulajaq chik xookoho Neápolis 12 ut aran xooʼelk naq xookoho saʼ jun li tenamit re Roma* li naxkʼabʼaʼi Filipos, li xnimal ru tenamit li wank saʼ xteepal Macedonia. Wiibʼ oxibʼ kutan xookanaak saʼ li tenamit aʼan. 13 Saʼ li sábado* xooʼelk saʼ rokebʼaal li tenamit ut xookoho chire jun li nimaʼ xbʼaan naq xqakʼoxla naq aran wank jun li naʼaj re tijok. Tojaʼ naq xoochunlaak ut xooʼok chi aatinak rikʼinebʼ li ixq li chʼutchʼukebʼ aran. 14 Jun li ixq xLidia xkʼabʼaʼ re li tenamit Tiatira, li nakʼayink tʼikr kaq moyink xbʼonol ut naxloqʼoni li Yos, yook rabʼinkil li yook xyeebʼal laj Pablo. Ut li Jehobʼa* kixte li xchʼool re naq tixkʼulubʼa li yook rabʼinkil. 15 Naq ak xkubʼeek xhaʼ li xLidia ut ebʼ li wankebʼ saʼ rochoch, aʼan kixtzʼaama chiqu: «Wi nekeekʼoxla naq ninpaabʼ li Jehobʼa,* chalqex chi kanaak saʼ wochoch». Ut kirelaji qu chi xkʼulubʼankil.

16 Saʼ jun kutan, naq yooko chi xik saʼ li naʼaj re tijok, xqakʼul jun li saaj ixq li wank chi moosil ut echaninbʼil xbʼaan jun li maaʼus aj musiqʼej li naqʼehink. Li saaj ixq naxqʼehi li kutan chalk re joʼkan naq naabʼal li tumin nekeʼxkʼul ebʼ laj echal re. 17 Li saaj ixq aʼin kiʼok xtaqenkil laj Pablo joʼ ajwiʼ laaʼo, ut japjo re chi xyeebʼal: «Ebʼ li winq aʼin xmoosebʼ li Nimajwal Yos ut yookebʼ xyeebʼal resil li xbʼehil li kolbʼa ibʼ rehebʼ li qas qiitzʼin». 18 Li saaj ixq kixbʼaanu aʼin chiru naabʼal kutan. Abʼan laj Pablo inkʼaʼ chik kiraj rabʼinkil joʼkan naq kixbʼalqʼusi ribʼ ut kixye re li maaʼus aj musiqʼej: «Saʼ xkʼabʼaʼ li Jesukriist ninye aawe naq elen rikʼin li saaj ixq». Saʼ li hoonal ajwiʼ aʼan kiʼelk rikʼin.

19 Abʼan naq ebʼ laj echal re xeʼril naq inkʼaʼ chik teʼruuq xtawbʼal xtumin rikʼin li saaj ixq, xeʼxchap laj Pablo ut laj Silas ut xeʼxjukuki toj saʼ li kʼayil chiruhebʼ laj jolominel. 20 Naq xeʼxaqabʼaak chiruhebʼ li ruuchil awabʼej re li tenamit, xeʼxye: «Ebʼ li winq aʼin yookebʼ xpoqoqinkil* li tenamit. Aʼanebʼ aj judiiy 21 ut li yookebʼ xkʼutbʼal inkʼaʼ naxchap ribʼ rikʼin li chaqʼrabʼ joʼkan naq inkʼaʼ naru naq tqakʼulubʼa ut tqayuʼami xbʼaan naq laaʼo aj Roma». 22 Ut ebʼ li qas qiitzʼin xeʼok raatinankilebʼ chi kʼajoʼebʼ xjosqʼil. Tojaʼ naq ebʼ li ruuchil awabʼej re li tenamit xeʼxqʼich li xtʼikr laj Pablo ut laj Silas ut chirix chik aʼan xeʼxtaqla ebʼ laj kʼaakʼalenel chi xkʼebʼalebʼ chi cheʼ. 23 Naq ak xeʼteniik, xeʼkʼeheʼk saʼ tzʼalam ut xeʼxye re laj ilol tzʼalam naq tixkʼaakʼalehebʼ chiʼus. 24 Saʼ xkʼabʼaʼ aʼin, kixkʼehebʼ saʼ jun li naʼaj li wank toj chisaʼ ut kixnatʼ li roqebʼ chiru cheʼ.

25 Tuqtu tana qʼoqyink naq laj Pablo ut laj Silas yookebʼ chi tijok ut chi bʼichank re xnimankil ru li Yos, ut ebʼ laj preex yookebʼ chi abʼink. 26 Maakʼaʼ saʼ xchʼoolebʼ naq kichalk jun li nimla hiik li kʼajoʼ xkawil ut kixchiqʼchiqʼi li rubʼelankil li tzʼalam, ut saʼ junpaat kiteehonk ebʼ li okebʼaal ut li kareen li bʼakʼbʼokebʼ wiʼ ebʼ laj preex xeʼtʼaneʼk. 27 Naq kiʼajk ru laj ilol tzʼalam ut kiril naq teeto li rokebʼaal li tzʼalam, kirisi chaq li xchʼiichʼ ut ok raj re xkamsinkil ribʼ xbʼaan naq kixkʼoxla naq xeʼelelik ebʼ laj preex. 28 Abʼan laj Pablo kixye chi kaw xyaabʼ xkux: «Maarahobʼtesi aawibʼ! Arin wanko chiqajunilo!». 29 Tojaʼ naq laj ilol tzʼalam kixpatzʼ xxaml, xʼok saʼ aanil chisaʼ ut nasiksotk naq kixkut ribʼ chi roq laj Pablo ut laj Silas. 30 Chirix chik aʼan kirisihebʼ ut kixye rehebʼ: «Kʼaru tento tinbʼaanu re naq tinkoleʼq?». 31 Ebʼ aʼan xeʼxye re: «Paabʼ li Qaawaʼ Jesús ut tatkoleʼq laaʼat ut li wankebʼ saʼ laawochoch». 32 Tojaʼ naq xeʼxye resil li raatin li Jehobʼa* re li winq aʼin joʼ ajwiʼ re chixjunil li wankebʼ saʼ rochoch. 33 Saʼ xyitoqil ajwiʼ li qʼoqyink aʼan, laj ilol tzʼalam kixkʼamebʼ chirix ut kixchʼaj li xrahilalebʼ. Ut saʼ junpaat kikubʼeek xhaʼ, li winq aʼin ut li wankebʼ saʼ rochoch. 34 Kiroksihebʼ saʼ rochoch ut kixkʼe li tzekemq chiru meex. Ut kʼajoʼ kisahoʼk saʼ xchʼool xbʼaan naq li wankebʼ saʼ rochoch nekeʼxpaabʼ chik li Yos.

35 Naq kisaqewk, ebʼ li ruuchil awabʼej re li tenamit xeʼxtaqla ebʼ laj kʼaakʼalenel chi xyeebʼal re laj ilol tzʼalam: «Kanabʼebʼ chi xik ebʼ li winq aʼin». 36 Laj ilol tzʼalam kixye re laj Pablo li kiyeeheʼk re: «Ebʼ li ruuchil awabʼej re li tenamit xeʼxtaqla wiibʼ oxibʼ li winq re naq texʼelq saʼ tzʼalam. Joʼkan naq ayuqex ut cheeril eeribʼ». 37 Abʼan laj Pablo kixye rehebʼ: «Usta laaʼo aj Roma xooʼeʼxsakʼ chiruhebʼ li qas qiitzʼin chi inkʼaʼ xeʼraqok aatin saʼ qabʼeen ut xooʼeʼxkʼe saʼ tzʼalam. Ut anaqwan nekeʼraj qisinkil saʼ muqmu, maajoqʼe bʼiʼanan! Chalqebʼ aʼan chi qisinkil». 38 Ebʼ laj kʼaakʼalenel xeʼxye chaq rehebʼ li ruuchil awabʼej re li tenamit li kixye laj Pablo. Naq xeʼrabʼi naq laj Pablo ut laj Silas ebʼ aj Roma, xeʼchalk xxiw. 39 Joʼkan naq xkohebʼ xpatzʼbʼal xkuybʼal xmaak chiruhebʼ, ut naq ak xeʼisiik saʼ tzʼalam xeʼyeeheʼk re, naq teʼxkanabʼ li tenamit. 40 Abʼan, naq laj Pablo ut laj Silas xeʼelk saʼ tzʼalam, xkohebʼ saʼ rochoch li xLidia bʼarwiʼ xeʼril ebʼ laj paabʼanel ut xeʼxwaklesi xchʼoolebʼ. Chirix chik aʼan xkohebʼ.