Santiago
3 Ex wechpaabʼanel, moko cheejunilex ta texʼoq joʼ aj kʼutunel xbʼaan naq nekeenaw naq qʼaxal kaw traqmanq aatin saʼ qabʼeen. 2 Xbʼaan naq chiqajunilo nokoopaltoʼk naabʼal sut. Li maajunwa napaltoʼk rikʼin raatin tzʼaqal re ru ut naru ajwiʼ xbʼeresinkil chixjunil li xtibʼel. 3 Naq naqakʼe kʼaam saʼ rehebʼ li kawaay re naq teʼabʼinq chiqu, yooko ajwiʼ xbʼeresinkil chixjunil li xtibʼel. 4 Kʼehomaq ajwiʼ reetal ebʼ li nimla jukubʼ:* usta qʼaxal ninqebʼ, ekʼasinbʼilebʼ xbʼaan li kawil iqʼ, jun chʼina cheʼ* nabʼeresink rehebʼ ut nekeʼxik bʼarwiʼ naraj xik laj chʼeʼol re.
5 Joʼkan ajwiʼ nakʼulmank rikʼin li ruʼuj aqʼ: usta li chaʼalej aʼin qʼaxal kachʼin, kʼajoʼ naxnima ribʼ. Ut kʼehomaq reetal naq rikʼin jun li chʼina xaml naru nakʼatk jun li nimla kʼicheʼ! 6 Li ruʼuj aqʼ chanchan ajwiʼ jun li xaml. Aʼan xchaʼal li tibʼelej li naxbʼaanu li maaʼusilal ut naxtzʼajni chixjunil li tibʼelej. Li ruʼuj aqʼ naru naxpoʼ li xyuʼam junaq li qas qiitzʼin ut chanchan li Gehena* xbʼaan naq nasachok. 7 Xbʼaan naq li jalan jalanq chi xul joʼ li josqʼ aj xul, ebʼ li xul li nekeʼrupupik, ebʼ li nekeʼxjukuki ribʼ chiru chʼochʼ ut li wankebʼ saʼ haʼ naru nekeʼtzoleʼk xbʼaan li winq ut ak bʼaanunbʼil aʼin. 8 Abʼan maakʼaʼ junaq li qas qiitzʼin li naru xqʼusbʼal li ruʼuj raqʼ. Li ruʼuj aqʼ inkʼaʼ naxkʼe ribʼ chi qʼuseʼk, narahobʼtesink ut li xmay nakamsink. 9 Rikʼin li ruʼuj qaqʼ naqakʼe xloqʼal li Jehobʼa* aʼ li Yuwaʼbʼej, abʼan rikʼin ajwiʼ aʼin naqaye li inkʼaʼ us chirixebʼ li xeʼyobʼtesiik «joʼ xjalam u li Yos». 10 Rikʼin xtzʼuumal qe naqanima li Yos ut rikʼin ajwiʼ aʼin naqaye li inkʼaʼ us chirixebʼ li qas qiitzʼin.
Ex wechpaabʼanel, moko us ta naq yooq chi kʼulmank aʼin. 11 Peʼyaal naq saʼ xjulel li yuʼamhaʼ inkʼaʼ naʼelk chaq kiʼil haʼ ut kʼahil haʼ? 12 Ex wechpaabʼanel, peʼyaal naq li xcheʼil li iig inkʼaʼ naru naxkʼe li aseeytuun chi moko li xcheʼil li uubʼ inkʼaʼ naru naxkʼe li iig? Chi moko li atzʼamhaʼ naru naxkʼe li kiʼil haʼ.
13 Ma wank junaq saʼ eeyanq li wank xnaʼlebʼ ut naxtaw ru chixjunil? Wi joʼkan, chixkʼutbʼesihaq rikʼin xbʼeresinkil chiʼus li xyuʼam ut xbʼaanunkil chixjunil saʼ tuulanil xbʼaan naq aʼin nachalk rikʼin li tzʼaqal naʼlebʼ. 14 Abʼan, wi laaʼex qʼaxal nekexkaqalink ut wank saʼ leechʼool xchoqinkilebʼ li junchʼol, inkʼaʼ raj teenima eeribʼ chirix li nekeenaw. Wi nekeebʼaanu aʼin yookex chi tikʼtiʼik. 15 Li naʼlebʼ aʼin moko nachalk ta taqeʼq, nachalk bʼan saʼ ruuchichʼochʼ, rikʼinebʼ li xul ut rikʼinebʼ li maaʼus aj musiqʼej. 16 Xbʼaan naq, bʼarwiʼ wank li kaqalink ut li choqink wank ajwiʼ li poʼok ibʼ ut li jalan jalanq chi maaʼusilal.
17 Abʼan li naʼlebʼ li nachalk taqeʼq xbʼeenwa naxbʼaanu naq junaq li qas qiitzʼin saqaq xchʼool, tixyuʼami li tuqtuukilal, inkʼaʼ kawaq xjolom, tixkʼe xchʼool chi abʼink, qʼaxal t-uxtaananq u,* tixbʼaanu li us, inkʼaʼ tsikʼoq u ut maawaʼaq aj kaʼpakʼal u. 18 Li nekeʼxkʼam ribʼ saʼ usilal rikʼinebʼ li junchʼol inkʼaʼ nekeʼxkanabʼ xsikʼbʼal li tuqtuukilal ut saʼ xkʼabʼaʼ aʼin us nekeʼnaʼlebʼak.