2 Corintios
8 Ex wechpaabʼanel, anaqwan naqaj naq teenaw chirix li xnimal rusilal li Yos li xkʼutbʼesimank chirixebʼ li chʼuut re Macedonia. 2 Naq xwank jun li nimla chʼaʼajkilal ut ra xeʼxkʼul xbʼaan aʼin, chi sahebʼ saʼ xchʼool xeʼkʼehok usta qʼaxal nebʼaʼebʼ. Aʼin kixkʼutbʼesi naq nekeʼkʼehok chi yoʼon. 3 Laaʼin ninnaw naq xeʼxkʼe chixjunil li wank saʼ ruqʼebʼ ut toj xeʼxkʼe xtzʼaqobʼ. 4 Ut ebʼ li qechpaabʼanel aʼin saʼ reqaj ribʼ xeʼok xtzʼaamankil chiqu naq tqakanabʼebʼ chi xkʼebʼal li maatan chi anchalebʼ xchʼool rehebʼ li santil paabʼanel ut chi joʼkan teʼtzʼaqonq chi xtenqʼankilebʼ. Ut saʼ xchʼoolebʼ kiʼelk chaq xbʼaanunkil aʼin. 5 Ut naabʼal xeʼxbʼaanu chiru li naqoybʼeni, xbʼeenwa xeʼxqʼaxtesi ribʼ chi kʼanjelak chiru li Qaawaʼ ut saʼ xkʼabʼaʼ li rajom li Yos xeʼkʼanjelak chiqu. 6 Joʼkan naq xqaye re laj Tito naq tixchoy xxokbʼal li tenqʼ li xeekʼe chi anchal eechʼool xbʼaan naq aʼan xtikibʼank re li kʼanjel aʼin saʼ eeyanq. 7 Qʼaxal chaabʼil yookex xbʼaanunkil chixjunil. Kaw leepaabʼal, seebʼex chi aatinak, qʼaxal wank eenawom, nekeekʼe eechʼool saʼ chixjunil li nekeebʼaanu ut qʼaxal nekeerahebʼ li junchʼol joʼ nekexqara laaʼo ut meekanabʼ ajwiʼ kʼehok chi yoʼon naq twulaq xhoonalil li kʼehok.
8 Rikʼin aʼin moko yookin ta xyeebʼal eere li tento teebʼaanu, ninye bʼan eere aʼin re naq teekʼe reetal naq ebʼ li junchʼol nekeʼxkʼe xchʼool chirix li nekeʼxbʼaanu ut re rilbʼal ma tzʼaqal yaal naq nekeerahebʼ li junchʼol. 9 Xbʼaan naq laaʼex nekeenaw li xnimal rusilal li Qaawaʼ Jesukriist: usta wank chaq xbʼihomal, xnebʼaʼoʼk saʼ eekʼabʼaʼ re naq laaʼex texbʼihomoʼq saʼ xkʼabʼaʼ li xnebʼaʼil.
10 Tinye eere li ninkʼoxla chirix aʼin re eetenqʼankil xbʼaan naq jun chihabʼ anaqwan xeetikibʼ li kʼanjel aʼin abʼan moko kaʼaj tawiʼ xeetikibʼ, xeekʼutbʼesi bʼan naq nekeeraj xbʼaanunkil. 11 Joʼkan naq choyomaq li kʼanjel li xeetikibʼ ut chi joʼkan teechoy li kʼanjel joʼ chanru xeeraj saʼ xtiklajik rikʼin joʼchʼinal joʼnimal wank eerikʼin. 12 Li Yos naxkʼulubʼa li maatan li naʼalaak saʼ xchʼool xkʼebʼal junaq li qas qiitzʼin xbʼaan naq li Yos naroybʼeni naq li qas qiitzʼin aʼin tixkʼe li naru xkʼebʼal ut inkʼaʼ tixkʼe li moko wank ta rikʼin. 13 Moko ninye ta aʼin re naq sahaq xbʼaanunkil chiruhebʼ li junchʼol ut chʼaʼajkaq cheeru laaʼex. 14 Li nawaj xyeebʼal eere aʼan naq li naʼelaʼank* cheeru kʼehomaq rehebʼ li junchʼol joʼ chanru naʼajmank chiruhebʼ, ut aʼanebʼ teʼxkʼe ajwiʼ eere li naʼelaʼank* chiruhebʼ joʼ chanru naʼajmank cheeru, ut chi joʼkan twanq eere ut twanq rehebʼ. 15 Joʼ chanru tzʼiibʼanbʼil: «Li wank naabʼal re maakʼaʼ kiʼelaʼank* chiru, ut li moko naabʼal ta re maakʼaʼ kipaltoʼk chiru».
16 Naqabʼanyoxi re li Yos naq kirekʼasi xchʼool laj Tito re naq qʼaxal tixkʼe xchʼool cheerix joʼ naq laaʼo xqakʼe qachʼool cheerix. 17 Xbʼaan naq aʼan kixkʼulubʼa li xqaye re ut kiraj xbʼaanunkil. Joʼkan naq kiʼalaak saʼ xchʼool eerulaʼaninkil. 18 Chirix laj Tito xqataqla li qechpaabʼanel li nanimaak ru saʼebʼ li chʼuut saʼ xkʼabʼaʼ li naxbʼaanu chirix li chaabʼil esil. 19 Ut moko kaʼaj tawiʼ aʼin, kixaqabʼaak xbʼaanebʼ li chʼuut re naq txik chiqix ut chi joʼkan tooxtenqʼa chi xjekʼinkil li tenqʼ li kichʼutubʼamank. Li tenqʼ aʼin tjekʼimanq re xkʼebʼal xloqʼal li Qaawaʼ. Ut rikʼin xbʼaanunkil aʼin tqakʼutbʼesi naq yoʼon wanko re xtenqʼankilebʼ li junchʼol. 20 Chi joʼkan maaʼani tixwechʼ qix chirix chanru yooko xjekʼinkil li tenqʼ li xchʼutubʼamank. 21 Xbʼaan naq “rikʼin chixjunil li naqabʼaanu naqakʼe qachʼool re naq inkʼaʼ toobʼalaqʼiq moko kaʼaj tawiʼ chiru li Jehobʼa* naqabʼaanu ajwiʼ chiruhebʼ li qas qiitzʼin”.
22 Joʼkan ajwiʼ, xqataqla chirixebʼ jun chik li qechpaabʼanel li ak xkʼutbʼesi chiqu chi rajlal naq qʼaxal naxnaw xbʼaanunkil naabʼal rehebʼ li kʼanjel. Abʼan anaqwan qʼaxal tixbʼaanu chiʼus li xkʼanjel xbʼaan naq naxnaw naq teebʼaanu li xqaye eere. 23 Ut wi junaq toj yook xkʼaʼuxl chirix laj Tito, cheenawaq naq aʼan wechkʼanjel ut yook chi tenqʼank re naq us wanqex. Ut wi junaq toj yook xkʼaʼuxl chirixebʼ li qechpaabʼanel, cheenawaq naq aʼanebʼ apóstol saʼebʼ li chʼuut ut nekeʼxkʼe xloqʼal li Kriist. 24 Joʼkan bʼiʼ, kʼutbʼesihomaq naq nekeerahebʼ ut kʼutbʼesihomaq ajwiʼ chiruhebʼ li chʼuut kʼaʼut naqanima qibʼ cheerix.