2 Corintios
11 Twulaq raj chiwu naq tineekuy bʼayaq xbʼaan xmaakʼaʼil linnaʼlebʼ. Abʼan ak yookex ajwiʼ inkuybʼal! 2 Xbʼaan naq ninkʼe inchʼool cheerix joʼ naxbʼaanu li Yos, ut laaʼin ak xinye naq texsumlaaq rikʼin jun ajwiʼ li bʼeelomej aʼ li Kriist ut nawaj eexaqabʼankil chiru joʼ jun li ixqaʼal li maajiʼ nawank rikʼin winq. 3 Abʼan yook inkʼaʼuxl cheerix xbʼaan naq naru nekeekʼul joʼ kixkʼul li xʼEva naq kibʼalaqʼiik xbʼaan li kʼantiʼ; naru nekeʼxpoʼ leekʼaʼuxl ut teʼxbʼaanu naq teetzʼajni leeyuʼam ut teekanabʼ xtaqenkil li Kriist chi anchal leechʼool. 4 Ninye eere aʼin xbʼaan naq, wi junaq li qas qiitzʼin nachalk ut naxkʼe cheenaw jalan chik li Jesús chiru li naqakʼe resil laaʼo malaj wi nekeekanabʼ naq jun chik li metzʼew* ttaqlanq saʼ xbʼeen leekʼaʼuxl li jalan chiru li metzʼew* li ak xeekʼul malaj wi nekeekʼul jun li chaabʼil esil li jalan chiru li ak xeekʼulubʼa, chʼolchʼo naq teekʼul chi anchal eechʼool. 5 Ninye naq ak xinkʼutbʼesi naq moko kubʼenaq ta inwankil chiruhebʼ li «xninqal ru apóstol» li wankebʼ saʼ eeyanq. 6 Usta moko qʼaxal seebʼin ta chi aatinak, wank innawom ut aʼin ak xqakʼut cheeru chi chʼolchʼo ru saʼ chixjunil.
7 Malaj xinmaakobʼk naq xinkubʼsi wibʼ re naq tnimaaq eeru naq xinkʼe cheenaw li chaabʼil esil chirix li Yos chi sibʼil ut chi anchal linchʼool? 8 Re naq tinkʼanjelaq cheeru, xinkʼul li tenqʼ li xeʼxkʼe ebʼ li jalan chik chʼuut, ut naq xinbʼaanu aʼin chanchan tawiʼ yookin xmaqʼbʼal li kʼaru rehebʼ. 9 Abʼanan, naq xinwank chaq saʼ eeyanq ut wankin chaq saʼ rajbʼal ru, maaʼani xinchʼiʼchʼiʼi xbʼaan naq ebʼ li wechpaabʼanel li xeʼchalk Macedonia xineʼxtenqʼa chi anchalebʼ xchʼool rikʼin chixjunil li naʼajmank chiwu. Joʼkan tzʼaqal, xinsikʼ chanru tinbʼaanu re naq maaʼani eere tinchʼiʼchʼiʼi ut inkʼaʼ tinkanabʼ xbʼaanunkil. 10 Laaʼin ninye li yaal joʼ tixbʼaanu raj li Kriist, inkʼaʼ tinkanabʼ xnimankil wibʼ chirix aʼin saʼebʼ li teep re Acaya. 11 Ut kʼaʼut? Ma xbʼaan naq inkʼaʼ nekexinra? Li Yos naxnaw naq nekexinra.
12 Joʼkan bʼiʼ, inkʼaʼ tinkanabʼ xbʼaanunkil li ninbʼaanu re naq li nekeʼxnima ribʼ inkʼaʼ teʼxtaw junaq li naʼlebʼ re xjuntaqʼeetankil ribʼ qikʼin. 13 Xbʼaan naq bʼalaqʼil apóstol ebʼ li winq aʼin, nekeʼkʼanjelak re xbʼalaqʼinkilebʼ li junchʼol ut nekeʼxbʼaanu ribʼ naq aʼanebʼ xʼapóstol li Kriist. 14 Ut inkʼaʼ nasach inchʼool chirix aʼin xbʼaan naq laj Tza naxbʼaanu ribʼ naq aʼan xʼánjel li saqenk. 15 Joʼkan naq moko nasach ta qachʼool naq ebʼ li xmoos nekeʼxbʼaanu ajwiʼ ribʼ naq aʼanebʼ aj kʼanjel chirix li tiikilal. Tojaʼ naq tqʼaxtesimanq re li junjunq aʼ yaal chanru li xbʼaanuhom.
16 Ninye wiʼ chik eere: maaʼani tixkʼoxla naq maakʼaʼ innaʼlebʼ. Abʼan, wi joʼkan nekeekʼoxla, kʼulumaqin joʼ li winq li maakʼaʼ xnaʼlebʼ re naq laaʼin ajwiʼ tinruuq xnimankil bʼayaq wibʼ. 17 Anaqwan moko yookin ta eeraatinankil joʼ tixbʼaanu raj li Qaawaʼ, yookin bʼan eeraatinankil joʼ tixbʼaanu raj li winq li maakʼaʼ xnaʼlebʼ li naxkʼojobʼ xchʼool rikʼin xkʼaʼuxl ut naxnima ribʼ. 18 Saʼ xkʼabʼaʼ naq naabʼalebʼ nekeʼxnima ribʼ rikʼin li wank saʼ ruuchichʼochʼ, laaʼin ajwiʼ tinbʼaanu. 19 Saʼ xkʼabʼaʼ naq laaʼex qʼaxal «wank eenaʼlebʼ», nekeekʼulubʼa chi anchal eechʼool li maakʼaʼebʼ xnaʼlebʼ. 20 Joʼkan ajwiʼ, nekeekʼulubʼa li nakʼehok eere choʼq moos, li naxmaqʼ chixjunil leejunkabʼlal ut chixjunil li kʼaru eere, li naxnima ribʼ saʼ eebʼeen ut li naxsakʼ xnaqʼ eeru.
21 Xutaanal choʼq qe naq tqaye aʼin xbʼaan naq maare junaq eere tixkʼoxla naq moko kaw ta qachʼool re roksinkil chiʼus li qawankil.
Abʼan, wi wankebʼ li qas qiitzʼin inkʼaʼ nekeʼxutaanak chi xnimankil ribʼebʼ, laaʼin ajwiʼ ninbʼaanu, usta wankebʼ teʼxkʼoxla naq maakʼaʼ innaʼlebʼ. 22 Ma ebʼ aj Hebreo? Laaʼin ajwiʼ. Ma ebʼ aj Israel? Laaʼin ajwiʼ. Ma ralal xkʼajolebʼ laj Abrahán? Laaʼin ajwiʼ. 23 Ma ebʼ aj kʼanjel chiru li Kriist? Ninsumenk joʼ jun li winq li kaan ru: qʼaxal naabʼal xinbʼaanu laaʼin chiruhebʼ aʼan. Numtajenaq li kʼanjel xinbʼaanu, naabʼal sut xinwank saʼ tzʼalam, naabʼal sut xineʼxsakʼ ut naabʼal sut xwil ru li kamk. 24 Oobʼ sut xineʼxsakʼ ebʼ laj judiiy ut 39 li tzʼuum nekeʼxkʼe we rajlal naq nikineʼxsakʼ. 25 Oxibʼ sut xineʼxkʼe chi cheʼ, jun sut xineʼxkʼe chi pek, oxibʼ sut xjukʼeʼk li jukubʼ* li yookin wiʼ chi xik ut xinnumsi jun qʼoqyink ut jun kutan saʼ xyi li palaw. 26 Naabʼal sut xinbʼihajik, xintaw li chʼaʼajkilal saʼebʼ li nimaʼ, xbʼaanebʼ laj elqʼ, saʼ xkʼabʼaʼebʼ li wechtenamitul, xbʼaanebʼ li junchʼol chi tenamit, xintaw li chʼaʼajkilal saʼ tenamit, saʼ li chaqichʼochʼ, saʼ li palaw ut saʼ xyanqebʼ li nekeʼxbʼaanu ribʼ naq qechpaabʼanelil. 27 Kaw xinkʼanjelak ut inkʼaʼ xinhilank, naabʼal sut inkʼaʼ xinwark chiru qʼoqyink, xinkuy insaʼ ut tchaqiq we, naabʼal sut xinkanaak chi maakʼaʼ intzekemq, xinkuy li ke ut xinkanaak chi maakʼaʼ intʼikr.*
28 Ut moko kaʼaj tawiʼ aʼin, wank jun chik li naʼlebʼ li naxkʼe inkʼaʼuxl wulaj wulaj: yook inkʼaʼuxl chirixebʼ li chʼuut. 29 Wi junaq li qas qiitzʼin moko kaw ta xchʼool, moko kaw ta ajwiʼ inchʼool laaʼin. Ut wi nakʼeheʼk chi tichkʼok junaq li qas qiitzʼin, ma inkʼaʼ tabʼiʼ tchalq injosqʼil?
30 Wi naʼajmank xnimankil wibʼ, tinnima wibʼ chirix li nakʼutbʼesink re, naq moko kaw ta inchʼool. 31 Li Xyos ut li Xyuwaʼ li Qaawaʼ Jesús li tento xnimankil ru chi junelik naxnaw naq inkʼaʼ yookin chi tikʼtiʼik. 32 Aran Damasco, li ruuchil awabʼej li wank rubʼel xwankil li awabʼej Aretas yook xkʼaakʼalenkil xtenamitebʼ laj Damasco re inchapbʼal, 33 abʼan xineʼxkubʼsi saʼ jun li chakach saʼ xbʼentaanil li xsuttzʼakil li tenamit ut chi joʼkan xinʼelelik saʼ ruqʼebʼ.