1 Corintios
1 Laaʼin laj Pablo, xaqabʼanbʼilin choʼq xʼapóstol li Kristo Jesús saʼ xkʼabʼaʼ li rajom li Yos ut laj Sóstenes, li qechpaabʼanel. 2 Naqatzʼiibʼa eere li esilhu aʼin laaʼex li wankex saʼ li chʼuut Corinto, laaʼex li xexsantobʼresiik joʼ xtzolom li Kristo Jesús. Li Yos xexbʼoq re naq santaqex rochbʼeenebʼ li nekeʼxpaabʼ li xkʼabʼaʼ li Qaawaʼ Jesukriist, li Xqaawaʼebʼ aʼan ut li qe laaʼo:
3 Chiwanq taxaq eerikʼin li xnimal rusilal ut li xtuqtuukilal li Yos li Qayuwaʼ ut li Qaawaʼ Jesukriist:
4 Junelik ninbʼanyoxink cheerix chiru Linyos xbʼaan li xnimal rusilal li xkʼut cheeru saʼ xkʼabʼaʼ li Kristo Jesús. 5 Saʼ xkʼabʼaʼ naq wankex saʼ junajil rikʼin, li Yos kibʼihomobʼresink eere saʼ chixjunil joʼkan naq nekexruuk xkʼebʼal chi naweʼk chiʼus li Raatin li Yos ut nekeenaw chiʼus li Raatin. 6 Joʼ chanru naq laaʼex xeerabʼi li esil li xinkʼe chi naweʼk chirix li Kriist ut xxeʼink saʼ eeyanq, 7 wank eerikʼin chixjunil li naʼajmank cheeru re roybʼeninkil naq li Qaawaʼ Jesukriist tixkʼut li xwankilal. 8 Aʼan ajwiʼ tkawresinq eere toj reetal twulaq li xraqik re naq maakʼaʼ texqʼabʼaaq wiʼ saʼ xkutankil li Qaawaʼ Jesukriist. 9 Li Yos naxbʼaanu li naxye. Aʼan xexbʼoq re naq texwanq saʼ junajil rikʼin* li Ralal aʼ li Jesukriist, li Qaawaʼ.
10 Anaqwan ex wechpaabʼanel, nintzʼaama cheeru saʼ xkʼabʼaʼ li Qaawaʼ Jesukriist naq junajaq ru leekʼaʼuxl rikʼin li nekeeye ut miwank li jachok ibʼ saʼ eeyanq. Wanqex bʼan saʼ aatin ut chi joʼkan junajaq ru leekʼaʼuxl. 11 Xbʼaan naq, ex wechpaabʼanel, wiibʼ oxibʼ li wankebʼ saʼ rochoch li xCloe xeʼxkʼe chinnaw naq wank li choqink saʼ eeyanq. 12 Ninye aʼin xbʼaan naq jalan jalanq li yookex xyeebʼal: «Laaʼin rehin laj Pablo», «Laaʼin rehin laj Apolos», «Laaʼin rehin laj Cefas»,* «Ut laaʼin rehin li Kriist». 13 Ma jachjo ru li Kriist? Peʼyaal naq laj Pablo inkʼaʼ kitʼuyubʼaak chiru cheʼ saʼ eekʼabʼaʼ? Malaj xkubʼsiik eehaʼ saʼ xkʼabʼaʼ laj Pablo? 14 Ninbʼanyoxi re li Yos naq maaʼani eere xinkubʼsi xhaʼ, kaʼajwiʼ laj Crispo ut laj Gayo. 15 Joʼkan naq maaʼani naru tixye naq xkubʼsiik xhaʼ saʼ inkʼabʼaʼ. 16 Yaal naq xinkubʼsihebʼ ajwiʼ xhaʼ li wankebʼ saʼ rochoch laj Estéfanas. Abʼan inkʼaʼ jultik we ma xinkubʼsi xhaʼ junaq chik. 17 Li Kriist inkʼaʼ xinxtaqla chi kubʼsink haʼ, xinxtaqla bʼan chi xkʼebʼal resil li chaabʼil esil ut inkʼaʼ xinʼaatinak joʼebʼ li tzolbʼilebʼ chiʼus. Xbʼaan naq aʼin naru narisi xwankil li cheʼ re rahobʼtesiik* li kitʼuyubʼaak wiʼ li Kriist.
18 Joʼkan ajwiʼ, li esil chirix li cheʼ re rahobʼtesiik* li kitʼuyubʼaak wiʼ li Kriist maakʼaʼ xwankil chiruhebʼ li yookebʼ chi kamk, abʼan choʼq qe li yooko chi koleʼk aʼan li xwankil li Yos. 19 Xbʼaan naq tzʼiibʼanbʼil: «Tinsach xnawomebʼ li wankebʼ xnaʼlebʼ ut tintzʼeqtaana chanru nekeʼkʼoxlak li wankebʼ xnaʼlebʼ». 20 Bʼar wank li wank xnaʼlebʼ? Bʼar wank laj tzʼiibʼ?* Bʼar wank li seebʼ xchʼool chi xkʼoxlankil li xnaʼlebʼ li ruuchichʼochʼ* aʼin? Ma inkʼaʼ tabʼiʼ kixbʼaanu li Yos naq maakʼaʼ t-oq wiʼ li xnawom li ruuchichʼochʼ? 21 Ebʼ li qas qiitzʼin inkʼaʼ nekeʼxnaw ru li Yos xbʼaan naq nekeʼroksi li xkʼaʼuxl re xnawbʼal ru. Li esil li naqakʼe chi naweʼk maakʼaʼ xwankil chiruhebʼ li junchʼol abʼan saʼ xkʼabʼaʼ li esil aʼin li Yos kixkolebʼ li nekeʼxpaabʼ li esil. Chi joʼkan kikʼutbʼesimank li xnawom li Yos.
22 Joʼkan bʼiʼ, ebʼ laj judiiy nekeʼraj rilbʼal ebʼ li sachbʼachʼoolej ut ebʼ laj griego yookebʼ xsikʼbʼal xnawom. 23 Abʼan, laaʼo naqakʼe resil naq li Kriist kitʼuyubʼaak chiru cheʼ, li naʼlebʼ aʼin naxkʼehebʼ chi tichkʼok ebʼ laj judiiy ut maakʼaʼ rajbʼal aʼin choʼq rehebʼ li tenamit. 24 Abʼanan, choʼq rehebʼ li bʼoqbʼilebʼ maakʼaʼ naxye ma ebʼ aj judiiy malaj ebʼ aj griego, li Kriist aʼan xwankil li Yos ut li xnaʼlebʼ li Yos. 25 Xbʼaan naq li xnaʼlebʼ li Yos li nekeʼxkʼoxla ebʼ li qas qiitzʼin naq maakʼaʼ rajbʼal, qʼaxal wank wiʼ chik xwankil chiruhebʼ li kawebʼ ribʼ. Ut li xnaʼlebʼ li Yos li nekeʼxkʼoxla ebʼ li qas qiitzʼin naq kubʼenaq xwankil qʼaxal kaw wiʼ chik chiruhebʼ li winq.
26 Ex wechpaabʼanel, ilomaq eeribʼ laaʼex li bʼoqbʼilex: moko kʼihebʼ ta li wankebʼ xnaʼlebʼ chi moko kʼihebʼ ta li nekeʼkʼamok bʼe chi moko kʼihebʼ ta li chalenaqebʼ saʼ jun li junkabʼal li wank xwankil. 27 Abʼan li Yos naxsikʼebʼ ru li naxkʼoxla li ruuchichʼochʼ naq maakʼaʼebʼ xwankil re xkʼebʼalebʼ saʼ xutaan li wankebʼ xnawom. Li Yos naxsikʼebʼ ru li naxkʼoxla li ruuchichʼochʼ naq kubʼenaqebʼ xwankil re xkʼebʼalebʼ saʼ xutaan li kawebʼ ribʼ. 28 Li Yos kixsikʼ ru li naʼlebʼ li maakʼaʼ xwankil saʼ li ruuchichʼochʼ ut li naʼlebʼ li tzʼeqtaananbʼil, li naʼlebʼ li maakʼaʼ naʼok wiʼ re xsachbʼal li naʼlebʼ li wank xwankil, 29 joʼkan naq maaʼani naru naxnima ribʼ chiru li Yos. 30 Saʼ xkʼabʼaʼ aʼan wankex saʼ junajil rikʼin li Kristo Jesús, li naxkʼut chiqu li xnaʼlebʼ li Yos. Saʼ xkʼabʼaʼ li Jesús, li Yos naxbʼaanu naq tiikaqo ut santaqo ut li Jesús xooxkol naq kixtoj rix li qamaak 31 re naq tkʼulmanq joʼ chanru tzʼiibʼanbʼil: «Li naxnima ribʼ, chixnimaq ribʼ saʼ xkʼabʼaʼ li Jehobʼa».*