1 Corintios
11 Kʼamomaq eere wikʼin joʼ naq laaʼin ninkʼam we rikʼin li Kriist.
2 Ex wechpaabʼanel, ninbʼanyoxi eere naq nikineejultika saʼ chixjunil ut naq yookex xbʼaanunkil chixjunil joʼ chanru xinkʼut cheeru. 3 Abʼan nawaj naq teenaw naq li xjolomil li winq aʼan li Kriist, li xjolomil li ixq aʼan li winq ut li xjolomil li Kriist aʼan li Yos. 4 Li winq li naxtzʼap xjolom naq natijok malaj naq naʼaatinak joʼ propeet naxkanabʼ saʼ xutaan li xjolom, 5 abʼan li ixq li inkʼaʼ naxtzʼap xjolom naq natijok malaj naq naʼaatinak joʼ propeet naxkʼe saʼ xutaan li xjolom xbʼaan naq chanchan tawiʼ joobʼil li xjolom. 6 Wi li ixq inkʼaʼ naxtzʼap xjolom, tento tixbʼes li rismal joʼ winq. Abʼan wi xutaanal choʼq re li ixq xbʼesbʼal li rismal joʼ winq malaj xjoobʼal li xjolom, tento tixtzʼap xjolom.
7 Li winq moko tento ta tixtzʼap xjolom xbʼaan naq aʼan xjalam u li Yos ut xloqʼal, abʼanan li ixq aʼan xloqʼal li winq. 8 Li Yos inkʼaʼ kixyobʼtesi li winq rikʼin li xtibʼel li ixq, kixyobʼtesi bʼan li ixq rikʼin li xtibʼel li winq. 9 Joʼkan ajwiʼ, li winq moko kiyobʼtesiik ta saʼ xkʼabʼaʼ li ixq, li ixq bʼan kiyobʼtesiik saʼ xkʼabʼaʼ li winq. 10 Joʼkan naq li ixq tento tixtzʼap xjolom joʼ eetalil re xkʼutbʼesinkil naq wank rubʼel xwankil li xbʼeelom saʼ xkʼabʼaʼ ebʼ li ánjel.
11 Abʼanan, saʼ xyanqebʼ li nekeʼtaqenk re li Qaawaʼ, moko wank ta li ixq wi maakʼaʼ li winq chi moko wank ta li winq wi maakʼaʼ li ixq. 12 Xbʼaan naq, joʼ chanru naq li ixq kichalk saʼ xkʼabʼaʼ li winq, li winq kiyoʼlaak rikʼin li ixq. Abʼan chixjunil chalenaq rikʼin li Yos. 13 Kʼaru nekeeye: ma us naq li ixq inkʼaʼ tixtzʼap xjolom naq ttijoq chiru li Yos? 14 Ma inkʼaʼ nekeenaw naq xutaanal choʼq re li winq naq chamaq rismal xjolom xbʼaan naq moko joʼkan ta yobʼtesinbʼilebʼ li winq 15 abʼan li xchamal rismal li ixq aʼan li nakʼehok re xloqʼal? Xbʼaan naq kʼebʼil rismal li ixq re naq tixtzʼap ribʼ. 16 Maare junaq li winq inkʼaʼ twulaq chiru aʼin, abʼan moko joʼkan ta nokoonaʼlebʼak laaʼo chi moko li wankebʼ saʼ li xchʼuut li Yos.
17 Abʼan rikʼin li naʼlebʼ aʼin inkʼaʼ ninye eere naq us yookex. Naq nekeechʼutubʼ eeribʼ inkʼaʼ nekeekʼam chaq usilal saʼ eebʼeen, chʼaʼajkilal bʼan nekeekʼam chaq saʼ eebʼeen. 18 Joʼkan ajwiʼ, xwabʼi resil naq wank li jachok ibʼ saʼ eeyanq naq nekeechʼutubʼ eeribʼ ut chanchan naq yookin xpaabʼankil. 19 Xbʼaan naq saʼ eeyanq t-elq wiibʼ oxibʼ li chʼuut li tixjach ribʼ eerikʼin ut aʼin tkʼutbʼesinq re ani aj ikʼin wank li rusilal li Yos.
20 Naq nekeechʼutubʼ eeribʼ re xwaʼbʼal li Xtzekemq li Qaawaʼ,* inkʼaʼ yookex xbʼaanunkil chiʼus joʼ chanru tento xbʼaanunkil. 21 Naq nekeewaʼ li tzekemq aʼin, wankebʼ ak xeʼwaʼak rubʼelaj joʼkan naq jun yook xtzʼokajik ut li jun chik yook xkalajik. 22 Ma maakʼaʼ tabʼiʼ eerochoch bʼarwiʼ texwaʼaq ut texʼukʼaq? Malaj nekeetzʼeqtaana li wankebʼ saʼ xchʼuut li Yos ut nekeekʼehebʼ saʼ xutaan li maakʼaʼ wank rehebʼ? Kʼaru tinruuq xyeebʼal eere? Ma tinye naq us yookex xbʼaanunkil? Chirix aʼin inkʼaʼ naru tinye naq us yookex xbʼaanunkil.
23 Xbʼaan naq laaʼin xinye eere li xinkʼul rikʼin li Qaawaʼ: saʼ li qʼoqyink naq tqʼaxtesiiq li Qaawaʼ Jesús, kixchap jun li kaxlanwa 24 ut naq ak xbʼanyoxi re li Yos, kixjach ut kixye: «Aʼin reetalil lintibʼel li nakʼemank saʼ eekʼabʼaʼ. Meekanabʼ xbʼaanunkil aʼin re injultikankil». 25 Naq ak xwaʼak, joʼkan ajwiʼ kixbʼaanu rikʼin li ukʼlebʼ sekʼ ut kixye: «Li ukʼlebʼ sekʼ aʼin reetalil li akʼ sumwank li ttiklaaq naq tinhoy linkikʼel. Meekanabʼ xbʼaanunkil aʼin re injultikankil rajlal naq teerukʼ xsaʼ li ukʼlebʼ sekʼ aʼin». 26 Xbʼaan naq rajlal naq teewaʼ li kaxlanwa ut teerukʼ saʼ li sekʼ aʼin, inkʼaʼ teekanabʼ xkʼebʼal chi naweʼk li xkamik li Qaawaʼ toj reetal naq tkʼulunq.
27 Joʼkan naq li naxwaʼ li kaxlanwa ut narukʼ li bʼiin li wank saʼ xʼukʼlebʼ sekʼ li Qaawaʼ chi maakʼaʼ xkʼulubʼ, wank xmaak xbʼaan naq inkʼaʼ naroxloqʼi li xtibʼel ut li xkikʼel li Qaawaʼ. 28 Li junjunq xbʼeenwa tixtzʼil rix li xchʼool re naq chʼolchʼooq chiru ma yook chi naʼlebʼak chiʼus, ut kaʼajwiʼ chi joʼkan, truuq xwaʼbʼal li kaxlanwa ut rukʼbʼal li bʼiin li wank saʼ li ukʼlebʼ sekʼ. 29 Wi junaq li qas qiitzʼin inkʼaʼ naxkʼe reetal naq aʼin reetalil li xtibʼel li Qaawaʼ, naxkʼam chaq li maak saʼ xbʼeen naq nawaʼak ut naq naʼukʼaʼk. 30 Joʼkan naq naabʼal eere maakʼaʼ eemetzʼew ut yajex, ut naabʼal eere yookex chi kamk.* 31 Abʼan, wi tqatzʼil qix chanruho, moko traqmanq ta raj aatin saʼ qabʼeen. 32 Abʼanan, naq naraqmank aatin, li Jehobʼa* nokooxqʼus re naq inkʼaʼ tkʼemanq chi xtojbʼal qamaak rochbʼeen li ruuchichʼochʼ. 33 Joʼkan naq ex wechpaabʼanel, naq teechʼutubʼ eeribʼ re xwaʼbʼal li tzekemq aʼin, oybʼenihomaq eeribʼ cheeribʼil eeribʼ. 34 Wi junaq eere yook xtzʼokajik, chiwaʼaq saʼ rochoch re naq inkʼaʼ tchalq li maak saʼ eebʼeen naq teechʼutubʼ eeribʼ. Ut chirix li junchʼol chik chi naʼlebʼ, tintuqubʼ ru naq tinwulaq aran.