Mateo

22 Jun sut chik, li Jesús kiraatinahebʼ rikʼin eetalil.* Kixye rehebʼ: 2 «Li Xʼawabʼejilal li choxa chanchan jun li awabʼej li kixbʼaanu jun li nimla waʼak naq kisumlaak li ralal. 3 Kixtaqlahebʼ li xmoos chi xbʼoqbʼalebʼ li ulaʼ re naq teʼchalq saʼ li sumlaak, abʼan inkʼaʼ xeʼraj. 4 Chirix chik aʼan, kixtaqla jalanebʼ chik li xmoos, ut kixye rehebʼ: “Yeehomaq rehebʼ li ulaʼ: «Ak kʼubʼkʼu li tzekemq. Ak kamsinbʼilebʼ chik linwakax ut li xchaabʼilal ru ebʼ linketomq. Ak xyaloʼk chixjunil. Kimqex saʼ li sumlaak»”. 5 Aʼut ebʼ aʼan inkʼaʼ xeʼraj rabʼinkil, jun xkoho saʼ li xchʼochʼ, jun chik xkoho chi yakok; 6 ut ebʼ li junchʼol xeʼxchap ebʼ li moos, xeʼxteni ut xeʼxkamsi.

7 »Tojaʼ naq kichalk xjosqʼil li awabʼej ut kixtaqla ebʼ laj puubʼ chi xkamsinkilebʼ li xeʼkamsink rehebʼ li xmoos ut kixkʼat li xtenamitebʼ. 8 Chirix chik aʼan kixye rehebʼ li xmoos: “Ak kʼubʼkʼu li ninqʼe, abʼan moko xkʼulubʼebʼ naq teʼchalq li bʼoqbʼilebʼ saʼ li sumlaak. 9 Joʼkan naq, ayuqex saʼebʼ li bʼe li nekeʼkʼamok saʼ tenamit ut bʼoqomaq saʼ li ninqʼe chixjunilebʼ li teetawebʼ aran”. 10 Joʼkan naq ebʼ li moos xkohebʼ saʼebʼ li bʼe ut xeʼxbʼoq chixjunilebʼ li xeʼxtaw, usta chaabʼilebʼ malaj maaʼusebʼ xnaʼlebʼ. Ut li naʼaj re sumlaak kinujak chi ulaʼ.

11 »Naq kiʼok li awabʼej chi rilbʼalebʼ li rulaʼ, kixkʼe reetal jun li winq moko tiqto ta rikʼin li tʼikr re li sumlaak. 12 Joʼkan naq kixye re: “At wamiiw, kʼaʼut xatchalk ut inkʼaʼ xaakʼe chaq laatʼikr re li sumlaak?”. Li winq inkʼaʼ kichaqʼok. 13 Tojaʼ naq li awabʼej kixye rehebʼ li xmoos: “Bʼakʼomaq li roq ut li ruqʼ ut kutumaq chirix kabʼl saʼ qʼoqyink. Aran tyaabʼaq ut tixkʼuxuxi li ruch re”.*

14 »Xbʼaan naq naabʼalebʼ li bʼoqbʼilebʼ, abʼan moko kʼihebʼ ta li sikʼbʼilebʼ ru».

15 Tojaʼ naq, ebʼ laj pariseey xkohebʼ ut xeʼok xkʼubʼankil chanru teʼxqʼabʼa li Jesús naq tpaltoʼq saʼ li raatin. 16 Joʼkan bʼiʼ, ebʼ laj pariseey xeʼxtaqla wiibʼ oxibʼ li xtzolom rochbʼeenebʼ li nekeʼokenk chirix laj Herodes chi xyeebʼal re li Jesús: «At Kʼutunel, naqanaw naq junelik nakaaye li yaal, naq nakaakʼut xbʼe li Yos rikʼin li yaal ut inkʼaʼ nakaasikʼ naq ebʼ li junchʼol teʼkʼulubʼanq aawe xbʼaan naq inkʼaʼ nakaakʼe aachʼool chirixebʼ li rilobʼaal ebʼ li qas qiitzʼin. 17 Joʼkan naq, ye qe, kʼaru nakaakʼoxla? Ma us naq tqakʼe li toj* li nachʼutubʼamank choʼq re li awabʼej re Roma,* malaj inkʼaʼ?». 18 Saʼ xkʼabʼaʼ naq li Jesús naxnaw li xmaaʼusilalebʼ, kixye rehebʼ: «Ex aj kaʼpakʼal u, kʼaʼut nekeeyal wix? 19 Kʼutumaq chiwu jun li denario».* Ut xeʼxkʼam chaq re jun li denario.* 20 Aʼan kixye rehebʼ: «Ani aj jalam u aʼin ut ani aj kʼabʼaʼ tzʼiibʼanbʼil chiru?». 21 «Re li awabʼej re Roma»,* chankebʼ re. Ut saʼ junpaat li Jesús kixye rehebʼ: «Joʼkan naq, tojomaq re li awabʼej li re li awabʼej, aʼut re li Yos li re li Yos». 22 Naq xeʼrabʼi aʼin, sachso xchʼool xeʼkanaak. Xeʼxkanabʼ xchʼiʼchʼiʼinkil ut xkohebʼ.

23 Saʼ li kutan ajwiʼ aʼan xeʼchalk ebʼ laj saduseey, li nekeʼxye naq maakʼaʼ li wakliik chi yoʼyo, ut xeʼxpatzʼ re: 24 «At Kʼutunel, laj Moisés kixye: “Wi nakamk junaq li winq chi maakʼaʼ ralal xkʼajol, li riitzʼin* tento tsumlaaq rikʼin li malkaʼan re naq twanq ralal xkʼajol li ras”.* 25 Saʼ qayanq kiwank wuqubʼ li winq riitzʼinebʼ ribʼ.* Li xbʼeen kisumlaak ut moqon chik kikamk ut saʼ xkʼabʼaʼ naq inkʼaʼ kiwank ralal xkʼajol, li malkaʼan kikanaak rikʼin li riitzʼin. 26 Joʼkan ajwiʼ kikʼulmank rikʼin li xkabʼ, li rox..., toj saʼ li xwuq. 27 Ut naq kamenaqebʼ chik li winq, kikamk li ixq. 28 Ye qe, naq twanq li wakliik chi yoʼyo, ani rehebʼ li wuqubʼ chi winq tkanaaq choʼq xbʼeelom? Xbʼaan naq chixjunilebʼ xeʼsumlaak rikʼin».

29 Kichaqʼok li Jesús ut kixye rehebʼ: «Laaʼex sachso leekʼaʼuxl xbʼaan naq inkʼaʼ nekeenaw li naxye li Raatin li Yos chi moko nekeetaw ru li xwankil li Yos. 30 Xbʼaan naq saʼ li wakliik chi yoʼyo, ebʼ li winq inkʼaʼ nekeʼsumlaak chi moko ebʼ li ixq kʼebʼilebʼ chi sumlaak, chanchanebʼ bʼan li ánjel saʼ choxa. 31 Ut laaʼex ak eerabʼihom chirix li wakliik chi yoʼyo, ma inkʼaʼ xeeril saʼ li Raatin li Yos naq kixye eere 32 “Laaʼin li Xyos laj Abrahán, li Xyos laj Isaac ut li Xyos laj Jacob”? Aʼan maawaʼ Xyos ebʼ li kamenaq, Xyos bʼan li yoʼyokebʼ». 33 Ut naq xeʼrabʼi li kixye, li kʼiila tenamit sachso xchʼool kikanaak rikʼin li xkʼutum.

34 Naq ebʼ laj pariseey xeʼxnaw naq li Jesús mem kixkanabʼebʼ laj saduseey, xeʼxchʼutubʼ ribʼ ut xeʼxkʼe ribʼ saʼ jun chi chʼuut. 35 Ut jun rehebʼ li naxnaw chiʼus chirix li Chaqʼrabʼ kixbʼaanu re li patzʼom aʼin re xyalbʼal rix: 36 «At Kʼutunel, bʼar wank li taql li wank tzʼaqal xwankil saʼ li Chaqʼrabʼ?». 37 Kixye li Jesús: «“Taara li Jehobʼa* Laayos chi anchal laachʼool, chi anchal laayuʼam ut chi anchal laakʼaʼuxl”. 38 Aʼin li xbʼeen ut li wank tzʼaqal xwankil saʼ xyanqebʼ li taql. 39 Li xkabʼ chanchan ajwiʼ aʼin: “Taara laawas aawiitzʼin joʼ naq nakaara aawibʼ”. 40 Rikʼin li wiibʼ chi taql aʼin natzʼaqlok ru chixjunil li naxye li Chaqʼrabʼ ut li xeʼxtzʼiibʼa chaq ebʼ li Propeet».

41 Chirix chik aʼan naq chʼutchʼukebʼ aran laj pariseey, li Jesús kixpatzʼ rehebʼ: 42 «Kʼaru nekeekʼoxla chirix li Kriist? Ani aj alal?». Aʼanebʼ xeʼxye: «Ralal laj David». 43 Li Jesús kixpatzʼ rehebʼ: «Joʼkan naq, chanru naq laj David li bʼeresinbʼil xbʼaan li santil musiqʼej naxkʼabʼaʼi Qaawaʼ? Xbʼaan naq aʼan kixye: 44 “Li Jehobʼa* kixye re Linqaawaʼ: «Kʼojlan saʼ linnim uqʼ toj reetal naq tinkʼe rubʼel laawoq ebʼ li xikʼ nekeʼilok aawe»”. 45 Wi laj David naxkʼabʼaʼi Qaawaʼ, chanru naq ralalaq?». 46 Maaʼani kiruhank xsumenkil. Ut chalen chaq li kutan aʼin, maaʼani chik kixbʼaanu junaq chik li patzʼom re.