2 Timoteo
1 Laaʼin laj Pablo, xʼapóstol li Kristo Jesús saʼ xkʼabʼaʼ li rajom li Yos, ninkʼe chi naweʼk li yeechiʼom chirix li yuʼam li kʼebʼil rehebʼ li qas qiitzʼin li wankebʼ saʼ junajil rikʼin li Kristo Jesús. 2 At Timoteo, li nakatwil joʼ walal ut raarokat inbʼaan:
Chiwanq taxaq aawikʼin li xnimal rusilal li Yos, li uxtaanank u,* ut li tuqtuukilal li nachalk rikʼin li Yos, li Yuwaʼbʼej, ut li Kristo Jesús, li Qaawaʼ.
3 Ninbʼanyoxi re li Yos, li ninkʼanjelak chiru chi saq ru linchʼool joʼ xeʼxbʼaanu ebʼ linxeʼtoon, junelik nakatinjultika naq nintzʼaamank chiru chi qʼeq ut chi kutan. 4 Naq ninjultika li xyaʼal aawu, qʼaxal nawaj rilbʼal aawu re naq tsahoʼq linchʼool. 5 Jultik we naq inkʼaʼ xatpaabʼank saʼ kaʼpakʼal u, li paabʼal aʼin xbʼeenwa xkʼutunk rikʼin xLoida, laanaʼchin, ut li xʼEunice, laanaʼ, ut chʼolchʼo chiwu naq joʼkan ajwiʼ laapaabʼal.
6 Saʼ xkʼabʼaʼ aʼin, ninjultika aawe naq taatzʼabʼ xxamlel li maatan li xaakʼul rikʼin li Yos chalen naq xinkʼe li wuqʼ saʼ xbʼeen laajolom. 7 Xbʼaan naq li Yos inkʼaʼ kixkʼe qe li xsantil musiqʼej re naq tooxuwaq, kixkʼe bʼan qe li xsantil musiqʼej re naq wanq qawankil, toorahoq ut tookʼoxlaq chiʼus. 8 Joʼkan naq matxutaanak chi xkʼebʼal chi naweʼk chirix li Qaawaʼ chi moko tatxutaanaq chiwix, laaʼin li wankin chi preexil saʼ xkʼabʼaʼ aʼan. Kʼulubʼa bʼan ebʼ li chʼaʼajkilal li tento taakʼul saʼ xkʼabʼaʼ li chaabʼil esil ut kʼojkʼooq laachʼool chirix li xwankil li Yos. 9 Aʼan xooxkol ut xooxbʼoq re naq santaqo, abʼan maawaʼ saʼ xkʼabʼaʼ li qabʼaanuhom, saʼ xkʼabʼaʼ bʼan li rajom ut xnimal rusilal li Yos. Junxil chik kixkʼutbʼesi chiqu aʼin saʼ xkʼabʼaʼ li Kristo Jesús 10 abʼan anaqwan li xnimal rusilal li Yos kikʼutunk chi tzʼaqal re ru naq kikʼutbʼesimank li Kristo Jesús, aj Kolol qe. Aʼan kixbʼaanu naq maakʼaʼaq chik xwankil li kamk ut rikʼin li chaabʼil esil kixkʼe chiqanaw chanru xtawbʼal li yuʼam ut li tibʼelej li inkʼaʼ naqʼaak. 11 Li Yos kixaqabʼank we choʼq aj kʼehol esil, choʼq apóstol ut choʼq aj kʼutunel.
12 Joʼkan naq yookin ajwiʼ xkʼulbʼal chixjunil li rahilal aʼin, abʼan inkʼaʼ ninxutaanak. Xbʼaan naq ninnaw ru li ninpaabʼ ut chʼolchʼo chiwu naq aʼan naru naxkʼula li xinkanabʼ saʼ ruqʼ toj reetal twulaq xkutankil li raqok aatin. 13 Maakanabʼ xchapbʼal aawibʼ chi kaw rikʼin li kʼutum li qʼaxal chaabʼil* li xaawabʼi wikʼin naq yooqat xkʼutbʼesinkil laapaabʼal ut laarahom saʼ xkʼabʼaʼ naq wankat saʼ junajil rikʼin li Kristo Jesús. 14 Kʼula chiʼus li maatan aʼin li xkʼemank saʼ laawuqʼ rikʼin li xtenqʼ li santil musiqʼej li wank qikʼin.
15 Ak nakaanaw naq chixjunilebʼ li winq li wankebʼ saʼ xweent Asia xineʼxtzʼeqtaana, saʼ xyanqebʼ aʼin wank laj Figelo ut laj Hermógenes. 16 Aʼ taxaq li Qaawaʼ truxtaana ruhebʼ* li wankebʼ saʼ rochoch laj Onesíforo xbʼaan naq rajlal kixwaklesi linchʼool ut inkʼaʼ kixutaanak naq bʼakʼbʼokin chi kareen. 17 Naq kiwank bʼan Roma, maajunwa xkanabʼ insikʼbʼal toj reetal xinxtaw. 18 Aʼ taxaq li Qaawaʼ ttenqʼanq re chi xtawbʼal li uxtaanank u* li nachalk rikʼin li Jehobʼa* saʼ xkutankil li raqok aatin. Ak nakaanaw chiʼus chixjunil li kixbʼaanu chiwix aran Éfeso.