Hechos
15 Tojaʼ naq wiibʼ oxibʼ li winq xeʼelk chaq Judea ut xeʼok xtzolbʼal ebʼ laj paabʼanel chi joʼkaʼin: «Wi junaq eere inkʼaʼ naseteʼk xtzʼuumal xtzʼejwal joʼ naxye li Xchaqʼrabʼ laj Moisés, inkʼaʼ tkoleʼq xbʼaan li Yos». 2 Abʼan naq laj Pablo ut laj Bernabé xeʼrabʼi aʼin inkʼaʼ xeʼxkʼulubʼa li yookebʼ xkʼutbʼal ebʼ li winq. Ut naq ak xeʼxchoqi ribʼ, xeʼxkʼubʼ naq laj Pablo ut laj Bernabé ut wiibʼ oxibʼ chik teʼtaqeʼq rikʼinebʼ li apóstol ut ebʼ li cheekel winq re Jerusalén re naq teʼaatinaq chirix li naʼlebʼ aʼin.
3 Ut li chʼuut kirochbʼeenihebʼ junpaataq saʼebʼ li xbʼe. Chirix chik aʼan, laj Pablo ut laj Bernabé ut li wiibʼ oxibʼ chik, xkohebʼ Fenicia ut Samaria, yookebʼ xseeraqʼinkil rehebʼ laj paabʼanel chanru xeʼok chi paabʼank li maawaʼebʼ aj judiiy. Ut chixjunilebʼ sahebʼ saʼ xchʼool chi rabʼinkilebʼ. 4 Naq xeʼwulak Jerusalén, sa xeʼkʼuleʼk xbʼaan li chʼuut, ebʼ li apóstol ut ebʼ li cheekel winq. Ut ebʼ aʼan xeʼxseeraqʼi chixjunil li kixbʼaanu li Yos saʼ xkʼabʼaʼebʼ. 5 Abʼanan wiibʼ oxibʼ li nekeʼtaqenk re xkʼutumebʼ laj pariseey li xeʼok chi paabʼank xeʼwakliik chiru xtemebʼ ut xeʼxye: «Aajel ru naq ebʼ laj paabʼanel li maawaʼebʼ aj judiiy teʼseteʼq xtzʼuumal xtzʼejwal ut tento xyeebʼal rehebʼ naq teʼxpaabʼ li Xchaqʼrabʼ laj Moisés».
6 Tojaʼ naq ebʼ li apóstol ut ebʼ li cheekel winq xeʼxchʼutubʼ ribʼ re aatinak chirix li naʼlebʼ aʼin. 7 Saʼ xkʼabʼaʼ naq inkʼaʼ nekeʼxkʼe ribʼ saʼ aatin, kiwakliik laj Pedro ut kixye rehebʼ: «Ex wechpaabʼanel, nekeenaw naq chalen saʼ xtiklajik li Yos kixsikʼ wu saʼ eeyanq re naq li maawaʼebʼ aj judiiy teʼrabʼi chi xtzʼuumal we li chaabʼil esil ut teʼoq chi paabʼank. 8 Ut li Yos, li naxnaw li wank saʼ li chʼoolej, kixkʼutbʼesi naq kixkʼulubʼaʼebʼ naq kixkʼe rehebʼ li santil musiqʼej joʼ kixbʼaanu qikʼin. 9 Li Yos inkʼaʼ kixbʼaanu naq wanq xjalanil ebʼ laj judiiy rikʼinebʼ li maawaʼebʼ aj judiiy, kixchʼajobʼresi bʼan xchʼoolebʼ rikʼinebʼ li xpaabʼal. 10 Joʼkan bʼiʼ, kʼaʼut nekeeyal rix li Yos rikʼin xkʼebʼal saʼ xbʼeenebʼ li nekeʼtaqenk re li Jesús jun li iiq li inkʼaʼ xeʼxkuy xkʼambʼal li qaxeʼtoon chi moko laaʼo naqakuy? 11 Chʼolchʼo bʼan chiqu naq joʼebʼ aʼan laaʼo ajwiʼ tookoleʼq saʼ xkʼabʼaʼ li xnimal rusilal li Qaawaʼ Jesús».
12 Naq xeʼrabʼi aʼin, maakʼaʼ chik xeʼxye chixjunilebʼ. Ut xeʼok rabʼinkil chixjunil li yook xseeraqʼinkil laj Pablo ut laj Bernabé chirix ebʼ li sachbʼachʼoolej ut ebʼ li xninqal ru naʼlebʼ li kixbʼaanu li Yos saʼ xyanqebʼ li tenamit saʼ xkʼabʼaʼebʼ aʼan. 13 Naq xeʼraqeʼk chi aatinak, laj Santiago kixye: «Ex was wiitzʼin abʼihomaqin. 14 Tojeʼ kixseeraqʼi qe laj Symeón naq li Yos kixkʼulubʼa li maawaʼebʼ aj judiiy re risinkil saʼ xyanqebʼ jun li tenamit li troxloqʼi li xkʼabʼaʼ. 15 Ut aʼin naxchap ribʼ rikʼin li xeʼxye chaq ebʼ li Propeet, joʼ chanru tzʼiibʼanbʼil: 16 “Chirix chik aʼan, tinsutqʼiiq ut tinyiibʼ wiʼ chik li rochoch laj David li tʼanjenaq. Tinwaklesi li xpoʼlem ut tinkabʼla wiʼ chik, 17 re naq ebʼ li qas qiitzʼin li teʼkanaaq, teʼxsikʼ chi anchalebʼ xchʼool li Jehobʼa* rochbʼeenebʼ li qas qiitzʼin re chixjunilebʼ li tenamit, ebʼ li qas qiitzʼin aʼin aʼanebʼ li nekeʼxnima linkʼabʼaʼ. Joʼkan naxye li Jehobʼa* li nabʼaanunk re aʼin 18 li nawbʼil ru junxilaj”. 19 Joʼkan naq ninkʼoxla naq inkʼaʼ tqachʼiʼchʼiʼi li maawaʼebʼ aj judiiy li yookebʼ chi sutqʼiik rikʼin li Yos. 20 Tento bʼan tqatzʼiibʼahebʼ re naq teʼxtzʼeqtaana li muxbʼil ru xbʼaanebʼ li pechʼbʼil yos, teʼxtzʼeqtaana li muxuk ibʼ,* ebʼ li yatzʼbʼil xul* ut li kikʼ. 21 Chalen chaq junxil, saʼ li junjunq chi tenamit ak wankebʼ chaq li nekeʼxye resil chirix li kixtzʼiibʼa laj Moisés xbʼaan naq rajlal sábado* xeʼxyaabʼasi saʼ kawil kuxej ebʼ li esilhu aʼin saʼebʼ li naʼaj re loqʼonink».
22 Joʼkan naq ebʼ li apóstol ut ebʼ li cheekel winq ut chixjunil li chʼuut, xeʼxsikʼ wiibʼ oxibʼ li winq saʼ xyanqebʼ ut xeʼxtaqla Antioquía rikʼin laj Pablo ut laj Bernabé. Xeʼxtaqla laj Silas ut laj Judas li nakʼabʼaʼiik ajwiʼ joʼ aj Barsabás. Ebʼ li winq aʼin nekeʼkʼamok bʼe chi kʼanjelak saʼ xyanqebʼ laj paabʼanel. 23 Aʼanebʼ xeʼxtzʼiibʼa eere li esilhu aʼin li naxye:
«Laaʼo ebʼ li apóstol, ebʼ li cheekel winq ut leerechpaabʼanel nekexqatzʼiibʼa laaʼex qechpaabʼanel li maawaʼex aj judiiy li wankebʼ aran Antioquía, Siria ut Cilicia. Naqataqla xsahil eechʼool! 24 Xqabʼi resil naq wiibʼ oxibʼ saʼ qayanq chi inkʼaʼ taqlanbʼilebʼ qabʼaan, xkohebʼ eerikʼin ut xeʼxchʼaʼajkiik rikʼin aatin yal re eesachbʼal. 25 Joʼkan naq xqakʼubʼ saʼ komonil naq tqasikʼ wiibʼ oxibʼ li winq ut tqataqlahebʼ rikʼin laj Pablo ut laj Bernabé, li raarokebʼ qabʼaan. 26 Ebʼ li winq aʼin xeʼxqʼaxtesi li xyuʼamebʼ saʼ xkʼabʼaʼ li Qaawaʼ Jesukriist. 27 Joʼkan naq xqataqla eerikʼin laj Judas ut laj Silas re naq laaʼex ajwiʼ teerabʼi li esil aʼin chi xtzʼuumal rehebʼ. 28 Xbʼaan naq li santil musiqʼej ut laaʼo xqakʼoxla naq inkʼaʼ tqakʼe xtzʼaqobʼ li iiq saʼ eebʼeen, kaʼajwiʼ aʼin li aajel ru: 29 teetzʼeqtaana chixjunil li mayejanbʼil xul li nayeechiʼimank chiruhebʼ li pechʼbʼil yos, li kikʼ, ebʼ li yatzʼbʼil xul* ut li muxuk ibʼ.* Wi nekeetzʼeqtaana chi junajwa chixjunil aʼin, us texwanq. Cheeril eeribʼ».
30 Naq ak xeʼxchaqʼrabʼi ribʼ, xeʼkubʼeek Antioquía. Aran xeʼxchʼutubʼ chixjunilebʼ laj paabʼanel ut xeʼxqʼaxtesi rehebʼ li esilhu. 31 Naq xeʼxyaabʼasi li esilhu xeʼsahoʼk saʼ xchʼool xbʼaan li aatin li xwaklesink re xchʼoolebʼ. 32 Ut saʼ xkʼabʼaʼ naq laj Judas ut laj Silas wankebʼ ajwiʼ choʼq propeet xeʼxtenqʼa ut xeʼxwaklesi xchʼoolebʼ laj paabʼanel rikʼin naabʼal li aatin. 33 Moko najt ta xeʼkanaak aran, ut chirix chik aʼan xeʼchaqʼrabʼiik ut xeʼsutqʼisiik wiʼ chik rikʼinebʼ li xeʼtaqlank chaq rehebʼ. 34 * 35 Abʼanan, laj Pablo ut laj Bernabé xeʼkanaak Antioquía yookebʼ chi kʼutuk ut yookebʼ xkʼebʼal chi naweʼk li chaabʼil esil chirix li raatin li Jehobʼa* re naabʼalebʼ chik li qas qiitzʼin.
36 Wiibʼ oxibʼ kutan chirix aʼin, laj Pablo kixye re laj Bernabé: «Sutqʼiiqo anaqwan ajwiʼ chi rilbʼal chanru wankebʼ laj paabʼanel saʼ chixjunilebʼ li tenamit bʼarwiʼ xqaye resil li raatin li Jehobʼa».* 37 Ak wank saʼ xchʼool laj Bernabé naq teʼxkʼam chirixebʼ laj Juan li nakʼabʼaʼiik joʼ aj Marcos. 38 Abʼan laj Pablo inkʼaʼ kiraj naq txik chirixebʼ xbʼaan naq kixkanabʼebʼ aran Panfilia ut inkʼaʼ kirochbʼeenihebʼ chi xyeebʼal li raatin li Yos. 39 Aʼin kichiqʼok re xjosqʼilebʼ ut chixjunqalebʼ xeʼxchap xbʼe. Laj Bernabé kixkʼam laj Marcos chirix, xeʼtaqeʼk saʼ jun li jukubʼ ut xkohebʼ Chipre. 40 Laj Pablo kixkʼam laj Silas chirix ut naq ak xeʼtijok li rechpaabʼanel re naq li Jehobʼa* tixkʼut chiru li xnimal rusilal, laj Pablo kixchap xbʼe. 41 Ut xnumeʼk Siria ut Cilicia ut yook xkawubʼresinkilebʼ xchʼool ebʼ li chʼuut.